محتويات المقال
لو الطبخ من هواياتك وبتحبيه وعندك شغف تجاهه ونفسك تتعلمي وصفات جديدة من بلاد مختلفة زي الأكل الهندي أو الصيني أو الإيطالي، أو عايزة تتعرفي على أساسيات فنون الطبخ اللي تقدري بيها تحسني مهاراتك في المطبخ، يبقى المقال ده يهمك.
الحقيقة في الخمس سنين الأخيرة، كتير من الستات بقى عندهم وعي واهتمام كبير بالطبخ وفنونه وأنواعه المختلفة. وبدأت تظهر رغبة عند كتير من الناس مش بس الستات إنهم يتعلموا ويدرسوا فنون الطبخ على أصولها. وكان لازم يكون فيه أماكن تحتضن كل عشاق الطبخ وتقدم لهم الخدمة دي. ومن هنا، ظهرت في مصر مجموعة لا بأس بها من مدارس تعليم الطبخ مش بس للكبار، لكن كمان للأطفال والمراهقين. دورات تعليم الطبخ للأطفال بقى عليها إقبال كبير جدًا. وده لأن كتير من الأمهات دلوقتي بقوا فاهمين كويس قد إيه الطبخ والتعامل مع المواد المختلفة جوه المطبخ له فوايد مهمة جدًا لولادهم، ويعتبر من الأنشطة الممتعة والمفيدة لأنه بيشغل كل الحواس عندهم وبينمي مهاراتهم في الاستكشاف والعمل الجماعي، ومن خلاله، بيطلعوا طاقه كبيرة ويبدعوا.
عشان كده، قررنا النهارده نشارك معاكي مجموعة من أشهر مدارس تعليم الطبخ في مصر. تقدري تتواصلي معاهم وتستمتعي بمجموعة من الكورسات سواء ليكي أو لأولادك، عشان تقدروا تنمّوا مهاراتكم وتشبعوا شغفكم وحبكم للطبخ.
The Egyptian Chefs Associationجمعية الطهاة المصريين
مقر الجمعية:
القاهرة,العجوزة
طرق التواصل:
نبذة عن المكان:
جمعيه الطهاة المصريين جمعية بتمثّل الطهاة المحترفين في مصر. ومن ضمن أنشطة الجمعية الدورات التدريبية اللي بتقدمها للشيفات المحترفين وكمان الهواة، وكل حد مهتم بالطبخ كمان. وده اللي كتير من الناس ما تعرفهوش: إن مش شرط تكون شيف محترف أو عضو في الجمعية عشان تشترك في الدورات دي. طبعًا اللي بيدي الدورات دي شيفات محترفين ومعلوماتهم قيمة جدًا. الدورات التدريبية دي بتكون في أماكن متنوعة. بالتواصل مع الجمعية، تقدروا تعرفوا التفاصيل عن كل كورس. وأحيانًا كمان بينظموا رحلات تعليمية لمزارع أو مصانع منتجات غذائية بتكون الحقيقه مفيدة ومثرية جدًا وممتعة في نفس الوقت.
Monapetit
- مقر المدرسة:
الجيزة، 6 أكتوبر
- طرق التواصل:
- نبذة عن المكان:
مدرسة Monapetit من أشهر مدارس تعليم الطهي في مصر أسستها الشيف منى البنا سنة 2014، وطورت فيها بشكل كبير على مدار السنين. المدرسة مجهزة بأحدث التجهيزات والمعدات وبتتميز بإنها بتدي كورسات متنوعة مش بس للهواة، لكن كمان للمحترفين من الشيفات. وكمان بيقدموا كورسات للأطفال والمراهقين. والكورسات بتتضمن تعليم مطابخ عالمية وفنون الخبز ودورات تعليم الحلويات وتزيين الكيك، وكمان تعليم الفوود ستايلينج وكل ما يتعلق بالأكل والطبخ.
The cooking school
- مقر المدرسة:
التجمع الخامس
- طرق التواصل:
- نبذة عن المكان:
تم افتتاحها مؤخرًا في التجمع الخامس عشان تلبي شغف سكان المنطقة دي، والمناطق الي حواليها. والحقيقة بالرغم من المدة القصيرة، إلا إنها حققت نجاح كبير جدًا في أقل من شهر. كورساتهم متنوعة ومهتمين جدًا بكورسات الأطفال. المدرسة مبهجة جدًا ومجهزة بشكل عصري ومحترف. تقدري تتواصلي معاهم وتتعرفي على جدول الكورسات اللي بيتم إصداره شهريا وتختاري منه اللي يناسبك.
The house of cooking
- مقر المدرسة:
المعادي
- طرق التواصل:
- نبذة عن المكان:
من أماكن تعليم الطبخ في المعادي. فيها فريق من الشيفات المحترفين بيدّوا كورسات متنوعة عن السلاطات الصحية، الأطباق الرئيسية الفاخرة والأطباق الجانبية والباستا وغيرها وكمان عندهم مجموعة كورسات للأطفال.
Arabi kitchen
- مقر المدرسة:
الإسكندرية
- طرق التواصل:
- نبذة عن المكان:
من أوائل مدارس الطبخ اللي فتحت في الإسكندرية. بيدوا كورسات في موضوعات متنوعة. وأغلب الشيفات والفوود بلوجرز المشهورين حتى اللي منهم مش من سكان إسكندرية، بيزوروها من وقت للتاني عشان يدوا كورسات لمحبي الطبخ من سكانها.
موضوعات الكورسات متنوعة ومتميزة جدًا زي كورسات تعليم الأنواع المختلفه من الأجبان، الوصفات الخالية من الجلوتين، ورش عمل عن طرق التقطيعات المختلفة وتزيين الأطباق وتقديمها وغيرها.
Vintage cooking school
مقر المدرسة:
الإسكندرية
طرق التواصل:
Master chef cooking academy
- مقر المدرسة:
حي الجامعة الرئيسي بالمنصورة.
- طرق التواصل:
بكده، نكون جمعنا لك 7 أماكن لكورسات تعليم الطبخ في مصر. تقدري تتواصلي معاهم من خلال صفحاتهم على مواقع التواصل الاجتماعي، وتختاري اللي يناسبك. احنا ما ذكرناش أسعار الكورسات لأنها متفاوتة من مكان للتاني، وكل كورس حسب مدته والمنيو بتاعته بيختلف في سعره. نتمنى إنك دايمًا تهتمي بنفسك من خلال تنمية مهاراتك وممارسة الأنشطة اللي بتحبيها لإن ده هينعكس بشكل إيجابي على بيتك وأسرتك.
التعليق باستخدام حساب فيس بوك