محتويات المقال
فترة الحمل والولادة في حياة السيدة، هي فترة استثنائية جدًا، علشان كده بتحاول السيدات تعرف معلومات كتير عن كل ما يتعلق بالحمل والولادة، علشان كده هنلاقي كتير من الأسئلة الشائعة اللي بتتردد، بس مش دايمًا بتكون الإجابات عليها صحيحة ودقيقة، علشان كده هنسأل الدكتور حسام الشنوفي أستاذ مساعد النساء والتوليد، عن أكتر الأسئلة الشائعة عن الحمل والولادة:
الأسئلة الشائعة في الحمل:
-
لأي مدى أثق في نتيجة اختبار الحمل المنزلي؟
عادةً اختبارات الحمل المنزلية بتكون دقيقة بنسبة 99%، لكن في عوامل كتير ممكن تأثر في الدقة دي، زي تداخل بعض الأدوية، أو عمل الاختبار في وقت مبكر جدًا من الحمل، أو استعماله بطريقة خاطئة.
-
هل في اختلافات بين الحمل الأول والتاني؟
كل حمل مختلف عن التاني في العموم، لكن اللي بيحصل في الحمل التاني إن الحامل بتكون أخدت خبرة أكتر، وبالتالي بتحس بأعراض الحمل وحركة الجنين بشكل أبكر بكتير من الحمل الأول، وكمان لو اتعرضت السيدة للولادة المبكرة واكتئاب ما بعد الولادة في الحمل الأول، فهي بتكون معرضة ليهم برضه بنسبة كبيرة في الحمل التاني.
-
إمتى أقدر أعرف جنس الجنين؟
مش قبل الإسبوع الـ 16 للحمل، ومش كل الحالات زي بعضها في أجنة بتتأخر لما بعد الإسبوع الـ 16.
-
إيه أهم الفحوصات المطلوبة من الحامل؟
- فحص فصيلة الدم، و (Rh).
- فحص تعداد الدم.
- فحص السكر فاطر وصايم، وده بيتعمل بين الإسبوع الـ 24 والـ 27، وممكن يطلب منك الطبيب تحللي في الإسبوع الـ 16 للحمل حسب تاريخك الطبي.
- مزرعة بول وحساسية.
- الأجسام المناعية للحصبة الألماني، وده بيتعرف منه عندك مناعة ولا لا.
- في فحوصات زيادة ممكن يطلبها منك طبيبك على حسب حالتك الطبية، زي مثلا لو انتي -لا قدر الله- مصابة بالضغط العالي هيتطلب منك تحاليل وظائف الكلى.
-
إيه هو الحمل خارج الرحم؟
الطبيعي إن الحيوان المنوي لما بيخصب البويضة في قناة فالوب، بتنتقل البويضة المخصبة دي للرحم علشان تبدأ رحلة تكون الجنين، لكن في حالات استثنائية البويضة ما بتتنقلش الرحم وبتلتصق بالأعضاء الخارجية وبتكون الأنبوبة في أغلب الأحيان، ووقتها بنحتاج لتدخل طبي فوري.
-
هل ينفع الحامل تاخد لقاح فيروس كورونا؟
اللقاح المناسب للحامل هو فايزر، أما أنواع اللقاحات التانية فهي غالبًا آمنة، لكن مفيش أبحاث كافية عليهم لحد دلوقتي وبالتالي مش قادرين نرشحهم بصفة رسمية. و لو واحدة أخدت أي نوع تطعيم و حملت في خلال ٦ شهور من التطعيم مفيش مشكلة. التوصية هي تأجيل الحمل مدة ثلاث شهور علشان تكوني مطمنة.
-
هل أقدر أعرف جنس المولود من خلال الجدول الصيني؟
الجدول الصيني لتوقع جنس المولود مجرد لعبة مسلية منتشرة على الانترنت، لكن مفيش أي أساس طبي وعلمي له، والحاجة الوحيدة اللي بتكشف جنس المولود هي السونار في الشهر الرابع.
-
هل الرضاعة الطبيعية بتمنع الحمل؟
الرضاعة الطبيعية بتمنع الحمل فقط في أول ست شهور و على شرط إنها تكون حصرية (يعني الطفل معتمد في تغذيته عليها بس بدون أي مكملات تانية ولا حليب صناعي)، لكن من الأفضل إن الأم لو محتاجة تمنع الحمل فعليًا، ما تعتمدش على الرضاعة الطبيعية كوسيلة منع حمل لوحدها.
الأسئلة الشائعة عن الولادة
د/حسام الشنوفي يجيب على أهم الأسئلة الشائعة عن الحمل والولادة
-
هل الولادة بدون ألم حقيقة؟
الولادة بدون ألم هي طريقة معينة في التخدير، سواء في الولادة الطبيعية أو الولادة القيصرية، لإن كل ولادة فيهم لها طريقة تخدير معينة مناسبة ليها، وعادةً طريقة التخدير المناسبة لحالتك، الطبيب المتابع هو اللي بيقررها.
-
إيه الأسباب اللي بتؤدي للولادة القيصرية؟
- ولادة قيصرية سابقة.
- وضعية الجنين في الرحم غير مناسبة للولادة الطبيعية، زي إنه يكون بالمقعدة في أول حمل.
- الحمل في توأم.
- قصور في نمو الجنين، فالطبيب يقرر إن الجنين مش هيستحمل ضفط الولادة الطبيعية.
- أسباب في المشيمة، زي المشيمة المتقدمة.
- أسباب صحية عند الأم، زي إصابات الحوض والعمود الفقري.
- بعض الأمراض المزمنة عند الأم، لكن في أمراض مزمنة مش بتعتبر من مسببات الولادة القيصرية، زي السكر والضغط وأمراض القلب، بالعكس الولادة الطبيعية ممكن تكون أكتر آمانًا.
-
هل ينفع أولد طبيعي بعد الولادة القيصرية؟
دي حاجة الطبيب المتابع هو اللي يقررها، بس في حالات كتير بتكون في مخاطرة كبيرة إن السيدة تولد طبيعي بعد الولادة القيصرية، منها احتمالات تمزق الرحم من منطقة جرح الولادة القيصرية.
-
ازاي أعتني بجرح الولادة القيصرية؟
- جفاف الجرح تمامًا وإبعاده عن البلل والرطوبة مهم جدًا.
- حافظي على نضافة الجرح باستعمال الكحول والبيتادين.
- داومي على استعمال المراهم والأدوية اللي طبيبك كاتبها لك.
- لو لاحظتي أي تغيرات أو آلام في الجرح لازم ترجعي لطبيبك فورا.
- اتحركي بهدوء.
- تجنبي الرياضات العنيفة، وخصوصًا اللي بتستهدف عضلات البطن.
-
إيه طريقة الاعتناء بجرح الولادة الطبيعية؟
- حافظي على جفاف الجرح تمامًا، وبعد دخول الحمام جففي “منطقة العجان” ولازم تتأكدي إن إيديكي نضيفة جدًا، واستعملي البيتادين بعد التجفيف.
- استخدمي مقاعد طرية ومريحة.
- لازم تغيير الفوط الصحية بانتظام مع غسل إيديكي قبل وبعد التغيير.
- اعملي تمارين الحوض (تمارين كيجل) في أسرع وقت ممكن بعد الولادة والمواظبة عليها لأن التمارين دي بتزيد تدفق الدم في المنطقة وتعجل من التئام الجرح.
-
ازاي ممكن الـ “دولا” تساعد في الولادة الطبيعية؟
الدولا هي مدربة الولادة الطبيعية، والمهام اللي بتقوم بيها هي:
- أساليب التنفس والاسترخاء ووضعيات الولادة المناسبة والتدليك لتشعري بالراحة.
- التأكد من تناول الغذاء بشكل كافي.
- اتخاذ القرار بخصوص التوقيت الأمثل لدخول المستشفى.
- تقديم المساعدة والنصايح للأب.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك