أهم المعلومات عن عسر القراءة عند الأطفال: الديسلكسيا

أغلبنا اتفرج على فيلم “إيشان” واتأثرنا جدًا بقصته، وكان أجمل ما فيه التركيز على دور المعلم مع الأطفال، وللأسف أطفال كتير دلوقتي بيلاقوا صعوبات مختلفة في التعليم، لأسباب معروفة زي طول وقت الشاشات، والجينات والوراثات، وأسباب تانية غير معروفة، بس ناس كتير بتقول على أي اضطراب في التعليم: ديسلكسيا أو فرط حركة وتشتت انتباه، والحقيقة إن التشخيص مش بالسهولة دي، لإن صعوبات واضطرابات وإعاقات التعلم، كتيرة جدًا ومختلفة وبالتالي التعامل معاها مختلف.

وفي المقال ده هنقولك على أهم المعلومات عن عسر القراءة عند الأطفال “الديسلكسيا”:

• إيه هي الديسلكسيا؟

هي نوع من أنواع “صعوبات” التعلم مش “إعاقات” التعلم، وتشخيصه بالزبط إنه خلل في الجزء المسؤول عن اللغة في الدماغ، بيكون مش قادر يربط بين أصوات الحروف وأشكالها، وبتتسمى عُسر القراءة، أو صعوبات القراءة.

• إيه أعراضها؟

الديسلكسيا مش بس بتظهر في السن اللي بيبدأ فيه الطفل بالقراءة، هي لها أعراض ودلالات قبل العمر ده، وفي أعراض في عمر المدرسة، وفي أعراض في عمر البلوغ، هنقولك على كل واحد فيهم بالتفصيل:

• أعراض الديسلكسيا قبل عمر المدرسة:

1. تأخر وصول الطفل لبعض محطات النمو الهامة مقارنة بأقرانه، زي: الحبو، المشي، النطق.
2. صعوبات في الكلام، زي نطق الكلمات بطريقة خاطئة.
3. يتسبب عسر القراءة بتحفيز ظهور بعض أمراض المناعة الذاتية مع تقدم الطفل في العمر، زي: الربو، الأكزيما، الحساسية الموسمية.
4. شاكل في تذكر أو تسمية الحروف والأرقام والألوان.
5. صعوبة في تعلم أغاني الأطفال أو لعب الأغاني الموسيقية.

• أعراض الديسلكسيا في عمر المدرسة:

1. تلعثم أو بطء أو صعوبات في القراءة، تظهر بشكل واضح لما الطفل يبدأ يتعلم بعض المهارات اللغوية في المدرسة، زي المهارات دي: حفظ الأحرف، القواعد اللغوية، كتابة الإنشاء، قراءة النصوص.
2. صعوبات في الكتابة، زي كتابة بعض الأحرف أو الأعداد بطريقة معكوسة.
3. نسيان بعض الكلمات الجديدة بعد ما يتعلمها بفترة قصيرة جدًا.
4. مشاكل وصعوبات أخرى مالهاش علاقة باللغة، زي: مشاكل في التنسيق العضلي العصبي، صعوبة تمييز الاتجاهات، صعوبة التركيز، ربط الأفكار بشكل غير منطقي، الاكتئاب، تدني مستويات الثقة بالنفس.
5. صعوبة في العثور على الكلمة المناسبة أو تكوين الإجابات عن الأسئلة.
6. الصعوبة في ملاحظة (وبالتالي في سماع) أوجه التشابه والاختلاف في الأحرف والكلمات.
7. عدم القدرة على قراءة نطق كلمة غير مألوفة.
8. قضاء وقت طويل ومش طبيعي في المهام الخاصة بالقراءة والكتابة.
9. تجنب الأنشطة الخاصة بالقراءة.

• في عمر البلوغ والمراهقة:

1. صعوبة في القراءة، واستخدام الصوت العالي وقت القراءة.
2. بطء شديد في القراءة والكتابة.
3. صعوبة في النطق.
4. النطق الخطأ للأسماء أو الكلمات أو المشاكل في استعادة الكلمات.
5. مواجهة مشاكل في فهم النكات والقفشات، أو المصطلحات اللي بتدل على غير معناها، زي كلمة “الامتحان مياه” يعني سهل جدًا.
6. صعوبة في تلخيص قصة.
7. صعوبة في تعلم لغة أجنبية.
8. صعوبة في الحفظ.
9. صعوبة في حل مسائل الرياضيات.

• أنواع الديسلكسيا:

1. عسر القراءة الرئيسي (Primary dyslexia): وهو أكتر أنواع عسر القراءة انتشارًا، وينتج عن خلل وظيفي في منطقة معينة من الدماغ، وده للإسف مش بيخف مع الوقت.
2. عسر القراءة الثانوي (Secondary or developmental dyslexia): ينشأ النوع ده من عسر القراءة عادة نتيجة حصول مشاكل أثناء عملية نمو وتطور دماغ الجنين في الرحم، ولكن غالبًا بيخف وبيتحسن جدًا مع تقدم الطفل في العمر.
3. عسر القراءة المرتبط بحادث (Trauma dyslexia): ممكن يظهر النوع ده من عسر القراءة نتيجة تعرض المنطقة المسؤولة عن معالجة اللغات من الدماغ لحادث أو إصابة، وهو نوع نادر الحدوث.

• أسباب الإصابة بالديسلكسيا:

1. الوراثة والجينات، ووجود تاريخ عائلي لصعوبات التعلم.
2. ولادة الطفل بوزن منخفض أقل من الطبيعي.
3. ولادة الطفل مبكرًا (الأطفال الخدج).
4. تعرض المرأة أثناء الحمل بالطفل لمواد كيميائية ضارة قد تؤثر بشكل سلبي على نمو الجنين في الرحم، زي: الكحول، دخان السجائر والنيكوتين، بعض أنواع الأدوية، المخدرات.

بالفيديو: تأخر الكلام عند الأطفال مع الخبيرة نجوى خضر

• علاج الديسلكسيا:

لحد دلوقتي مفيش علاج نهائي لحالات الديسلكسيا، بس العلاجات الموجودة هي بتحسن الحالة وبتأهل الطفل بالطرق دي:

1. تقييم حالة الطفل المصاب وتصميم برنامج تعليمي خاص بيه ويلبي احتياجاته الفردية.
2. استخدام أدوات تعليمية خاصة لتحسين قدرة الطفل على تلقي واستيعاب المعلومات.
3. الحصول على استشارات منتظمة بشأن حالة الطفل من مختصين متابعين لحالته.
4. مناقشة بعض الخيارات اللي ممكن تساعد على تسهيل التجربة التعليمية على الطفل مع مدرسته، زي منح الطفل المصاب وقتًا إضافيًا أثناء الامتحانات.
5. تقسيم المهام الكبيرة لمهام وخطوات صغيرة لرفع قدرة الطفل على إنجاز المهام دي بصعوبات أقل.
6. تصميم بيئة عمل ودراسة خاصة تناسب حالة الطفل وتساعده على التعلم بدون مشتتات.

• الآثار الجانبية للديسلكسيا:

1. مشكلات التعلم، لأن القراءة بتمثل مهارة أساسية لمعظم المواد الدراسية التانية، فبيكون الطفل اللي يعاني خلل القراءة في وضع غير مناسب في معظم الصفوف الدراسية، وممكن جدًا يواجه صعوبة في مواكبة أقرانه.
2. المشكلات الاجتماعية، ممكن يؤدي عدم علاج خلل القراءة لانخفاض تقدير الذات ومشاكل السلوك والقلق والعدوانية والانسحاب من محيط الأصدقاء والآباء والمعلمين.
3. مشكلات البالغين، لإن عدم القدرة على القراءة والفهم ممكن يمنع الطفل من إبراز قدراته مع مراحل النمو. ويمكن أن يكون لده عواقب تعليمية واجتماعية واقتصادية طويلة المدى.
4. الأطفال اللي بيعانوا من عسر القراءة أكثر عرضة لخطر الإصابة باضطراب نقص الانتباه مع فرط النشاط (ADHD)، والعكس كمان، يعني ممكن يسبب اضطراب نقص الانتباه مع فرط النشاط صعوبة في مواصلة الانتباه، فضلاً عن فرط الحركة والسلوك المتهور، وده ممكن يخلي عسر القراءة أكثر صعوبة في العلاج.

• هل الديسلكسيا لها علاقة بالذكاء؟

الأشخاص المصابين بعسر القراءة معدل الذكاء عندهم بيكون طبيعي جدًا، وعندهم قدرات بصرية طبيعية، وممكن جدًا ينجحوا في التعليم مع أساليب التأهيل اللي قولنا عليها، مع دعم عاطفي قوي.

ومهم جدًا إنك لما تلاحظي أي ملاحظة على طفلك وتشكي إنها عرض للديسلكسيا، إنك تتوجهي للطبيب المختص على طول، وما تضيعيش الوقت في استشارة الأقارب والأصدقاء، ولا تنساقي ورا النصايح اللي من نوع: “عادي ابني كان كده في الأول بس دلوقتي بقى كويس وبيقرأ بسرعة”، “ولا يهمك العيال كلهم بقوا صعبين قوي دلوقتي”، لإن ده مش كلام علمي أبدًا، ولازم تعرفي إن التشخيص المبكر للصعوبات دي بيوفر خطوات كتيرة وصعبة على الأهل وعلى الطفل، والعكس صحيح، لإن تأخير التشخيص بيعمل مضاعفات، فهتضطري تعالجي الأصل والمضاعفات وهتطولي رحلة العلاج والتأهيل.

ومرات كتير بنكون إحنا الأمهات خايفين زيادة عن اللزوم، بس لما بنروح للطبيب المختص ويعمل الفحوصات والقياسات، بيطلع الطفل طبيعي تمامًا بس محتاج مننا شوية متابعة مش أكتر، فزيارة الطبيب مش معناها خوف أبدًا.

وتقدري تتفرجي على فيلم إيشان من هنا، علشان تقدري تتخيلي أكتر كل التفاصيل اللي اتكلمنا عليها:

مع تمنايتنا لكل الأطفال بالصحة والسلامة.

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.

المصادر:

webteb.com

mayoclinic.org