مشوار السوبر ماركت بالنسبة لينا كستات بيعتبر من أهم المهام إلي بنقوم بيها سواء أسبوعيا أو شهريا أو أياً كان أسلوبك في شراء طلبات البيت .ومع رتم الحياة السريع إلي إحنا عايشينه دلوقتي والمهام الكتير المطلوبة مننا بقينا محتاجين نقوم بالمشوار ده بشكل سريع ونكون عارفين كويس ومحددين قائمة بالمشتروات عشان مناخدش وقت طويل و ننجز بسرعة ،ومش بس كده إحنا بقينا بندور على أي منتجات ممكن تسهل لنا حياتنا وتوفر علينا في الوقت والمجهود وإحنا بنحضر الوجبات اليومية لينا ولأولادنا. عشان كده إحنا النهارده هنرشحلك مجموعة من المنتجات إلي تقدري تشتريها من السوبر ماركت عشان تضيفيها لقايمة مشترواتك وتساعدك إنك متقضيش وقت طويل في المطبخ ويكون عندك وقت أطول لباقي مهامك اليومية.
1-خضراوات السلطة الجاهزة
مصدر الصورة:superkidsnutrition
من أكتر المهام إلي بتستهلك وقت في المطبخ عشان تحضري طبق سلطة هي غسيل وتنضيف وتقطيع الخضار، من فترة قريبة مكنش متوفر في السوبر ماركت الإختيار ده لكن شركات كتير بقت بتوفرلنا المنتج ده بتشكيلات متنوعة من خضار السلطة المغسول ومتقطع وجاهز للأكل.
2-دريسينج السلطات الجاهز
gettyimages
عشان السلطة تكمل هتحتاجي دريسينج وساعات مبيكونش عندنا وقت للإبتكار وعايزين حاجة جاهزة، عشان كده هتلاقي تشكيلات متنوعة من الدريسينج الجاهز للسلاطات تقدري تنوعي وتجددي طبق السلطة كل يوم.
3-الطماطم المعلبة وعصير الطماطم الجاهز
مصدر الصورة:chexfoods
سواء الطماطم المتقشرة ومعلبة مع عصيرها أو عصير الطماطم الجاهز الي بقى متوفر جدا وشركات مصرية كبيرة بتنتجة بجودة عالية يعتبر صديق الأم المستعجلة لأي طبخة مصرية: بسلة ،بامية ،صوص مكرونة أي طبخة محتاجة عصير طماطم.
4-البهارات و التتبيلات الجاهزة
بهارات جاهزة للفاهيتا، بهارات للمشويات، بهارات للحواوشي والبرجر أنواع كتير قوي موجودة في الأسواق، جربي كل مرة نوع جديد لحد متوصلي للأنواع إلي تناسب ذوقك. هتسهل عليكي جدا تتبيل اللحوم أو الفراخ وتجدد طعم أكلك.
5-الخضراوات والفواكه المجمدة
runtastic
صديقة كل أم مستعجلة وبتشتغل ومفيش غنا عنها في الفريزر وعلى فكرة الخضراوات والفواكه المجمدة بتكون محتفظة بقيمتها الغذائية مش زي ما ناس كتير فاكرين إنها عشان مجمدة تبقى مش مفيدة. كمان لو بتحبي تعملي لولادك عصاير طبيعية في البيت يبقى مينفعش تستغني عن الفواكه المجمدة وخصوصا في الصيف. أحلى سموذي فراولة هتحضريه في ثواني بشوية فراولة مجمدة مع لبن أو زبادي وشويه من العسل وكمان تقدري تعملي لولادك أحلى مثلجات بالفاكهه الطبيعية Frozen Popsicle زي المانجا أو التوت كل إلي هتعمليه إنك هتضربيهم في الخلاط مع شوية ميه و عسل و تحطيهم في القوالب المخصصة للنوع ده من المثلجات و عالفريزر .
6-البقوليات المعلبة
food52
أغلب البقوليات بتحتاج وقت طويل عشان تجهز، بتحتاج تتغسل وتتنقع وتتسلق وستات كتير عاملات معندهمش الوقت لده.مفيش مانع أبدا إنك تستعيني بالحمص المعلب عشان الكشري، أو تطبخي أحلى فاصوليا بيضا بالصلصه بفاصوليا معلبة ، أو تعملي سلطة مكسيكية لذيذة بالفاصوليا الحمرا والسودا. أهم حاجة إنك تغسلي كويس المعلبات تحت ميه جارية وتصفيها قبل ما تستخدميها.
7-الأكياس الحرارية
cleverhousewife
متعددة الإستخدامات وبتطلع نتيجة هايلة وبتسرع من وقت التسوية وبتحافظ على النكهات وعلى طراوة اللحوم أو الفراخ المطبوخة جواها وكمان بتقلل بهدلة الصواني من شوي اللحوم والفراخ جوه الفرن طب هنعوز إيه أكتر من كده.في منها أحجام كتير جدا وتقدري تسوي فيها ديك رومي كامل أو فخدة كمان. أهم حاجه إنك تتبعي التعليمات الموجودة على العبوة الخاصة بطريقة استخدامها.
8-الأكياس محكمة الغلق zipper bags
ziploc
تقدري تستخدميها عشان تقللي من كميه الفوضى والبهدلة في مطبخك زي إنك مثلا تتبلي فيها اللحوم أو الفراخ ولو بتعملي أي أكلة بالبيض والبقسماط تقدري تستخدميها بدل متنضفي أكتر من طبق وتبهدلي الدنيا حواليكي.
9-صوص البيستو الجاهز
dietdoctor
صوص البيستو متعدد الإستخدامات وعشان تعمليه بإيدك في البيت هيحتاج مكونات كتير وتحضير ،عشان كده برطمانات صوص البيستو الجاهز هيوفرلك وقت كتير.إستخدميه مع صلصة المكرونة ،حوطيه مع شوية من الكريمة عشان تعملي صوص لذيذ للفراخ أو الستيك وممكن كمان تخلطيه مع المايونيز وتستخدميه زي سبريد للساندويتشات.
10-برطمانات التوم المفروم الجاهزة
gettyimages
كلنا عارفين أد إيه مهمة تقشير التوم مهمة سخيفة وبتحتاج وقت ومجهود وبتسيب ريحة مش ظريفة في الإيد ،عشان كده برطمان التوم المفروم الجاهز هيسعفك وينقذك في الأزمات.دايما إستخدمي معلقة نضيفة وإنتي بتاخدي منه وحطي شويه زيت على وش البرطمان عشان تحافظي عليه مدة أطول.
11-الخلطات الجاهزة للكيك و الحلويات
thehoneyblonde
ستات كتير بتلاقي صعوبة في تحضير الكيك والكوكيز والحلويات في البيت وأغلب أطفالنا بيحبوها ،عشان كدi الخلطات الجاهزة مناسبة جدا ليكي وهتوفرلك وقتك في إنك تحضري المكونات وتعايريها وتبقي مش واثقة من نجاح الوصفة.كل إلي عليكي إنك هتقري التعليمات الموجودة عالعبوة وتنفذيها .
التعليق باستخدام حساب فيس بوك