أهم 20 نصيحة للعناية بنفسك بعد الولادة

بعد الولادة، كل أم بتكون متلخبطة جدًا، مش بس بسبب الهرمونات، لكن حياتها الواقعية اختلفت، سواء كان البيبي الجديد هو الطفل الأول أو التاني، لإنه فرد جديد في الأسرة، له احتياجاته ومتطلباته، والأم لسا صحتها متأثرة من الحمل والولادة والرضاعة، والأب حاسس بالمسؤولية الجديدة ومش عارف يساعد ازاي، وفي الزحمة دي كلها الأم تنسى نفسها وتعيش في ضغوط لحد ما توصل لمرحلة انهيار نفسي وصحي، وعلشان إحنا معاكي في كل حالاتك، هنقولك على أهم 20 نصيحة للعناية بنفسك بعد الولادة:

1. استشيري الطبيب.
2. اطلبي المساعدة.
3. نظمي المهام.
4. قربي من جوزك.
5. قصي شعرك.
6. الأكل الصحي.
7. ارجعي بيتك.
8. اتكلمي.
9. البسي حلو.
10. انضمي لمجموعات الدعم.
11. اشتغلي.
12. اتسلي.
13. ما تفكريش.
14. حددي أولوياتك.
15. اتعلمي.
16. عيطي.
17. حافظي على النضافة الشخصية.
18. ابعدي عن السوشال ميديا.
19. اعملي تمارين الامتنان.
20. مارسي رياضة.

• استشيري الطبيب:

في فترة ما بعد الولادة، النصايح الطبية بتكتر قوي حواليكي، وكل واحدة مرت بالتجربة قبل كده حتى لو من 20 سنة، لازم هتديكي خلاصة تجربتها، والكلام ده بيعمل عليكي ضغط رهيب لإنه مش كل صحيح ومش كله مناسب لحالتك، فبتحسي إنك تايهة وإن حالتك مش بتتحسن على النصايح دي، علشان كده لازم ترجعي للطبيب المتابع لحالتك وحالة البيبي واستشاري الرضاعة الطبيعية، علشان تسأليهم في أي حاجة تلاحظيها، ومهم جدًا الطبيب النفسي مش بس طبيب النساء والتوليد.

• اطلبي المساعدة:

ما تستقويش نفسك وتحسي إنك هتعرفي تعملي كل حاجة لبيتك ولنفسك ولجوزك ولبيتك، ده مش واقعي ومش هيحصل، ولو حصل هتضغطي جدًا وهييجي يوم وتنفجري، اطلبي المساعدة من جوزك أو مامتك أو أي حد بترتاحي له وقريب منك، أو لو عندك إمكانيات مادية ممكن تجيبي ناني تساعدك أو عاملة تنظيف للبيت.

• نظمي المهام:

المهام كترت جدًا، وبقت في أكتر من مجال، نظميها واعملي الأهم فالمهم، والحاجات اللي ممكن تتأجل أجليها من غير ما تحسي بالذنب أو تأنيب الضمير.

• قربي من جوزك:

قربي من جوزك

أغلب شكاوى الأمهات في فترة ما بعد الولادة، إن جوزي بيخرج كتير، جوزي مش حاسس بيا، والحقيقة إن هو كمان بيشوفك بعيدة عنه، وطول وقتك مع البيبي أو مع مامتك، وإن الحياة كلها بقت بتدور حوالين الكائن الصغير اللي جه حياتكم، علشان كده لازم تحلي المشكلة دي، خلي وقت الانشغال بالبيبي وجوزك في الشغل، ولما يرجع قابليه وخصصي وقت تقعدوا تتكلموا مع بعض فيه زي زمان، اتفرجي معاه على التلفزيون أو اعملوا أي حاجة مشتركة والبيبي نايم، اشركيه معاكي في المهام المتعلقة بالطفل الجديد، اتكلمي معاه في أي أحاسيس أو مخاوف بتمري بيها.

• قصي شعرك:

قصي شعرك بعد الولادة

دي النصيحة اللي بتتقال لأي بنت أو ست بتمر بحالة نفسية سيئة، بس الحقيقة إنها في حالة بعد الولادة هتفرق معاكي جدًا، لإنك بتكون طالعة من الحمل وداخلة في الرضاعة الطبيعية وده بيأثر جدًا على صحة شعرك ومظهره، فإنتي محتاجة تقصي المتقصف منه، وفي نفس الوقت تغيري ستايلك علشان تجددي نفسيتك، وهيسهل عليكي كمان العناية بشعرك في الفترة دي.

• الأكل الصحي:

كلمة السر دايمًا للصحة الجيدة، الأكل الصحي المتوازن، وخصوصًا بعد الولادة، لإنك محتاجة فيتامينات وعناصر غذائية علشان الرضاعة، وعلشان تستعيدي عافيتك في أسرع وقت.

• ارجعي بيتك:

طبعًا النصيحة دي مناسبة لو حالتك الصحية تسمح، بعد الولادة متعودين إن كل ست بتروح عند مامتها علشان تقدر تعتني بيها وبطفلها، بس في ناس الفترة دي بتمتد معاهم لشهور طويلة، وده بيسبب عدم استقرار على الأم والزوج ولو في أطفال كبار، علشان كده نصيحتي ليكي إنك أول لما تتعافي ترجعي بيتك وتستقري وتخلي حياتك شبه طبيعية، وتطلبي من مامتك أو حماتك والمقربين مساعدتك في بيتك.

• اتكلمي:

اتكلمي مع صاحباتك ومامتك وجوزك ومع أي حد ترتاحي له، اتكلمي عن مخاوفك، عن قلقك، أو عن المشاعر الحلوة اللي بتمري بيها، فضفضي ودردشي، ولو معندكيش الشخص اللي تقدري تتكلمي معاه في كل حاجة، اتكلمي مع الورق واكتبي كل اللي في قلبك، حتى لو قطعتي الورق ورميتيه بعد كده أو احتفظتي بيه، الفضفضة دي مهمة جدًا لنفسيتك.

• البسي حلو:

البسي حلو واهتمي بنفسك

من الحاجات اللي بتتعب النفسية جدًا بعد الولادة، إن الست بتلاقي نفسها متبهدلة وبتلبس لبس مناسب للرضاعة الطبيعية ولوزنها الجديد، وده بيخليها مش راضية عن شكلها، فنصيحتي ليكي إنك تحاولي تلاقي لبس مناسب لجسمك الجديد، بحيث تكوني راضية عن مظهرك وواثقة في نفسك طول الوقت، وماتستنيش لما تخسي أو جسمك يتزبط.

• انضمي لمجموعات الدعم:

مجموعات الدعم مش “جروبس الماميز” اللي بيقعدوا يدوا نصايح مش واقعية، وبيصوتوا ويندبوا طول اليوم، ويشيروا حاجات عن الحوداث وأمراض الأطفال، فحاولي تدوري على مجموعات لسيدات بيمروا بنفس المرحلة بتاعتك علشان تقدروا تدعموا بعض، وتتشجعوا وتمر الفترة دي بأقل خساير ممكنة.

• اشتغلي:

قومي يا بت اشتغلي بعد الولادة

مش معنى الشغل إنك تنزلي شركة أو مكتب يوميًا وتسيبي البيبي، لا اشتغلي أي حاجة مهما كانت بسيطة، لو بتحبي تعملي أشغال يدوية، لو بتكتبي، أو بتعملي أي حاجة على الانستجرام، لو بتسوّقي من البيت، اللي اقصده إنك تتشغلي في حاجة خاصة بيكي ترفع روحك المعنوية بس برضو بدون ما تحسي إنك مضغوطة ما بين الشغل والبيبي والبيت.

• اتسلي:

بعد فترة من الولادة هتحسي إنك بتعملي نفس المهام كل يوم، والأيام تشبه بعضها، حاولي تدخلي عوامل تسلية ضمن المهام دي، يعني مثلا لو بترضعي طفلك رضاعة طبيعية، تقدري تستغلي الوقت ده في التسلية زي إنك تقرأي أو تسمعي حاجة، أو تعملي تليفون محبب ليكي مع حد، وهكذا.

• ما تفكريش:

إيه النصيحة الغريبة دي، آه أنا جايالك من هناك وبقولك ماتفكريش، لإن أمهات كتير بيبدأوا لا إراديًا يفكروا في البيبي وحياته ومستقبله، طب لو حصله كذا طب لو مقدرتش أعمله كذا، طب لو أنا -لا قدر الله- سيبته، ودي بتكون دوامة اكتئاب وتعب نفسي رهيبة، فحاولي أول لما تحسي إنك هتدخلي فيها تتكلمي مع حد أو تشغلي نفسك بحاجة تانية، ولو مقدرتيش تتحكمي فيها يبقى تستشيري حد متخصص.

• حددي أولوياتك:

تفاصيل حياتك كترت مع البيبي الجديد، وفجأة بتلاقي اللي حواليكي زعلانين منك علشان مقصرة معاهم، وبتلاقي نفسك مش راضية عن وزنك و..و.. وبتدخلي في دايرة إحباط كبيرة، الحل إنك ترتبي أولوياتك، وتنسقي حياتك الجديدة، وتعرفي إنك أكيد مش هتقدري تعملي نفس كل حاجة كنتي بتعمليها قبل مجيء المولود الجديد، فشوفي إيه المهم ماديًا واجتماعيًا وصحيًا، ورتبي قائمة الأولويات على أساسه.

• اتعلمي:

هتقابلك مواقف كتير إنتي مش عارفة تتصرفي فيها، وده صحيح بيبدأ من فترة الولادة بس بيستمر على طول بعد كده في رحلتنا مع أولادنا، الحل مش إننا نقعد نعيط ونشتكي، الحل إننا نتعلم ونطور من نفسنا وأساليبنا، ونفهم اللي بيحصل ده بيحصل ليه وأتعامل معاه إزاي، صدقيني هتفرق جدًا في راحة أعصابك وفي حياتك كلها.

• عيطي:

هو إنتي أكيد مش محتاجة توصية، بس بقولهالك احتياطي، إنك لو حسيتي إنك مضغوطة وعاوزه تعيطي، عيطي.

• حافظي على النضافة الشخصية:

ودي مش نصيحة لبعد الولادة، دي نصيحة في كل الأوقات، بس بعد الولادة محتاجة تركزي أكتر، لإن عندك عناية بجرح ولادة طبيعية أو قيصرية، وعندك عناية معينة للرضاعة الطبيعية.

• ابعدي عن السوشال ميديا:

وخصوصًا في الأوقات اللي بتنتشر فيها الأمراض والأوبئة والحوادث، لإن الأخبار والمعلومات والصور والفيديوهات دي هتأثر على نفسيتك سلبًا ومش هتفيدك في أي حاجة.

• مارسي الامتنان:

لإن من كتر المشاغل اليومية بننسى نمتن لكل النعم والحاجات الحلوة اللي مرت في اليوم.

ليه ممارسة الامتنان في حياتنا مهم

• اعملي رياضة:

ودي من أهم الحاجات اللي تعمليها (طبعًا بعد استشارة الطبيب) علشان نفسيتك وصحتك ووزنك، وتقدري تشتركي في Fit Mama at Home Program

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.