محتويات المقال
إنك تكوني أم، فده في حد ذاته عمل بطولي ومهمة راقية، والأمومة بتخليكي تبذلي من وقتك وجهدك وعمرك ونفسيتك علشان تبني أولادك، كل البذل ده بيكون يومي وبلا مقابل وغير مشروط، بس مرات كتير بنقع، وبنتعب وبنحس بالفشل والإحباط، وبنحتاج نرجع نرتب أولوياتنا وحياتنا تاني علشان نقدر نستمر في مهمتنا، فما بالك لما تضيفي لده كله إنك تكوني أم عاملة، فالمجهود بيكون مضاعف والاحتياج للترتيب والروتين بيكون ضروري جدًا، وإلا الدنيا هتفلت منك خالص، ومش هتقدري تنجحي على صعيد الأمومة ولا على صعيد الشغل، وهتعيشي في دوامة من الإحباط الدائم هتأثر على جودة العطاء في البيت وفي الشغل، علشان كده سألت أمهات راحة بالي العاملات عن أهم النصائح اللي ممكن يفيدوا بيها الأمهات العاملات، لإن النصائح ده هتكون من وحي تجاربهم وهتكون واقعية وحقيقية ومفيدة، تعالي نشوف مع بعض قالوا إيه:
-
ما تستسهليش مجهودك ووقتك:
هاتي كل وأي حاجة تريحك وتوفر مجهودك لراحتك وسعادتك، زي مثلا غسالة الأطباق، أو أكل جاهز، وطبعًا كله على حسب إمكانياتك المادية.
-
تخلي عن المثالية:
مش لازم كل حاجة تبقى بيرفكت ممكن تقع مننا حاجات، هوّنى على نفسك واتبسطى بنفسك، وإنك بتعملى حاجات مش أى حد يقدر يعملها.
-
خصصي جزء من فلوسك لنفسك:
لازم تعملي حاجة بجزء من فلوسك كل شهر، لإن لو فلوسك كلها رايحة على أولادك، مش هتحسي بقيمة تعبك في الشغل، وهتبقي مضغوطة طول الوقت.
أسباب غريبة بتخلّي الأمهات تتفرج على مسلسل لؤلؤ
-
رتبي مهام البيت:
- اعتمدي على حد يجهز لك الخضار متقطع وجاهز على الطبخ.
- يوم التنضيف وغسيل الهدوم يوم واحد في الإسبوع.
- أولادك لازم يتعلموا المشاركة في إنجاز مهام البيت.
- اللعب مكانها غرف الأطفال بس، مش البيت كله.
- اعملي روتين لنوم الأطفال، علشان تقدري تاخدي وقت رايق لنفسك.
- استعيني بعاملة تنضيف للبيت، يومية أو إسبوعية على حسب إمكانياتك المادية.
-
اطلبي المساعدة من جوزك:
تقدري تحملي الزوج بعض المهام البسيطة ويكو الهدف منها المشاركة والإحساس بيكي، بس اختاري مهام هو بيعرف ويقدر يعملها، زي إنه ياخد الأطفال ويخرج بيهم شوية، أو يقعد بيهم في البيت، وهكذا..
-
افصلي:
اعملي حاجة مميزة تفصلي بيها كل فترة، زي جلسة مساج، أو سفر لوحدك أو مع صاحباتك بدون الأطفال، الحاجات دي مهمة جدًا في إنها تشحن طاقتك علشان ترجعي تمارسي نشاطك بتألق تاني.
أفكار مشاريع صغيرة مربحة وناجحة من المنزل
-
خصصي لنفسك مكان للشغل:
لو إنتي بتشتغلي من البيت في وظيفة، أو عاملة مشروع من البيت، لازم تخصصي لنفسك مساحة خاص للشغل مهما كان البيت مساحته صغيرة، لإن ده هيسهل عليكي جدًا الشغل وهيحافظ على متعلقاتك بعيد عن عبث الأطفال، وهيوفر عليكي وقت تجهيز أغراض الشغل في كل مرة تشتغلي فيها.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك