محتويات المقال
طول الوقت باسأل نفسي وأنا في المطبخ يا ترى إيه هي أنواع حلل الطبخ الصحية؟ وهل حلل استانلس أيكيا مثلًا زي حلل استانلس الأنواع التانية زي زهران ونوفال مثلًا؟ تطلع لي الإعلانات وتقول لي الجرانيت صحي أكتر، خدي أواني طهي جرانيت ماركة كذا، لأ أواني طهي ماركة كذا صحية أكتر.
ترتيب المطبخ مش سهل، وباختصار أواني الطهي الصحية فعلًا هي اللي تقدري تنضّفيها كويس بدون ما تتجرح أو تتخدش، وما تنسيش إنه مهما كانت الأواني صحية وماركتها كويسة هتكون خطر على صحتك وصحة أسرتك لو ما اتنضفتش كويس، بسبب تراكم البكتيريا والجراثيم عليها، أواني الطهي اللي تدفعي فيها فلوس بجد هي اللي هتصمد معاكي في الاستهلاك اليومي، الترشيحات الجاية في المقال ده هي الأكثر متانة والصحية أكتر من غيرها.
الاستانلس
أواني الطهي الاستانلس
بيسموه الفولاذ المقاوم للصدأ، بيتكون في الأساس من الحديد والنيكل والكروم، لذلك ما بيصديش أبدًا، وبيقاوم التآكل والصدأ، لذلك نقدر نعتبر الأدوات الاستانلس من أروع الاختيارات في الطبخ: بنتكلم عن توزيع متساوي للحرارة، على سطح الحلة، والأكل فيها ما بيلزقش، كمان سعره مناسب بالمقارنة بالأدوات التانية، لذلك دايمًا بارشح الاستانلس لأي صديقة بتجهز بينها كأفضل اختيار في السعر والخامة.
الزهر
أواني الطهي الزهر
الأواني الزهر تاني أكتر اختيار صحي ممكن تستخدميه في مطبخك، وهي أكتر نوع مفضل عند الطباخين الكبار لإنها بتدي الأكل طعم مش ممكن تحسي بيه في باقي الأنواع التانية، وخصوصًا كمان إن الاكل مش بيلزق فيها، زيها زي التيفال. اللي ناس كتير ما تعرفهوش إنها مكوّنة بالأساس من الحديد واللي بيتسرب للأكل لذلك هي أفضل اختيار للناس اللي عندها فقر دم، مشكلتها إنها غالية جدًا لذلك ما حطيتهاش كاختيار رقم واحد. كمان ليها طريقة تنظيف معينة محتاجة تلتزمي بيها. وفي المقابل هتعيش معاكي لعشرات السنين، مش هتحتاجي تجيبي غيرها ولا هتقشر زي السيراميك أو تتفاعل مع الأكل.
البايركس
أواني الطهي البايركس
البايركس اختيار عبقري لو انتي من الناس اللي بتحب الأكل الصحي وبتعتمدي على الفرن بشكل كبير، البايركس هو أكتر حاجة هتعملي فيها الأكل وانتي متأكدة إنه مش هيتفاعل مع الأكل بأي شكل من الأشكال، ولا هيسرب حديد زي الزهر ولا ألومنيوم زي الحلل والطاسات الألومنيوم ولا نيكل زي الاستانلس، مشكلته الوحيدة إنك ما تقدريش تحطيه على النار بشكل مباشر ولو طلع من الفرن سخن واتحط على سطح بارد ممكن ينفجر. لذلك ما ينفعش تستخدميه إلا لو انتي فاهمة كويس طريقة التعامل معاه.
المصدر:Healthline
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك