لحظة اكتشاف الأب والأم إن طفلهم عنده مشكلة ما أو احتياج خاص أو هيعيش بطريقة مختلفة طول العمر دي لحظة أكيد مش سهلة ووقعها قوي جدًا علي نفسية الأهل، فيض من المشاعر والأفكار الملخبطة “طفلي هيتأقلم إزاي \ هقدر أساعده بإيه\ طب اللي حوالينا هيعاملوه إزاي \ طب لو اتعرض للمضايقة من أطفال تانية نعمل إيه وغيرها وغيرها من الأسئلة اللي في الأول الأم مش بتبقي قابلاها ولا شايفالها أي إجابات ممكنة.
في مقال النهارده هنقولك علي أهم خطوات تساعدك في تقبل الفكرة عشان تقدري تساعدي طفلك يتأقلم ويعيش حياة طبيعية.
خدي وقتك في التقبل:
الزتونة كلها في الكلمتين دول “خدي وقتك” حقك تزعلي وتخافي وده مش معناه إنك معترضة علي قضاء ربنا، ممكن تحسي بالإحباط أوبقلة الحيلة أو بالغضب إن ده بيحصل مع طفلك وده مرحلة من المراحل اللي في الأغلب هتعدي بيها بعد ما تعرفي الخبر، فمتحسيش بالذنب أو تسيبي اللي حواليكي يقنعوكي إن مش من حقك تزعلي وإن ده مش رضا، لأن كل ده مشاعر طبيعية أي بني آدم مكانك غالبا هيحس بيه عشان توصي بسلام لمرحلة التقبل.
استعيني بمساعدة لايف كوتش أو معالج نفسي
لو فضلتي فترة كبير حاسة بنفس المشاعر السلبية ومش عارفة تتعايشي مع الواقع، ممكن تطلبي المساعدة من لايف كوتش أو معالج نفسي يقدر يساعدك علي إدارة مشاعرك ويساعك كمان تحددي هدفك من رحلتك مع طفلك اللي ممكن تغير منظورك تماما للموقف كله.
مجموعات الدعم:
حاوطي نفسك بناس وأهالي أطفالهم نفس حالة طفلك، ادخلي علي جروبات الفيسبوك الخاصة بيهم، إتعرفي عليهم واخرجي معاهم واستفيدي من خبراتهم ويكون عندك المساحة الآمنة بتاعتك معاهم.
رتبي حياتكوا بأنسب طريقة ممكن تسهل عليكي التعامل ع الوضع الجديد:
بعد ما تاخدي وقتك وتدخلي في مرحلة التقبل وتبدإي تدوري علي الطريقة اللي هتدعمي وتساعدي بيها طفلك، ما تنسيش إن إنتي كمان مهمة، سهلي حياتك عليكي بمعني لو البيت محتاج إعادة ترتيب لتسهيل حركة طفلك مثلا من غير مساعدتك اعملي كدة، لو في أي مساعدة خارجية أو نظام معين حتي لو غريب علي اللي حواليكي بس هيساعدك ويشيل عنك في خدمة ودعم طفلك اعملي كدة من غير تفكير.
مارسي الإمتنان:
ممارسة الإمتنان إاتكلمت عليها وعلي فوايدها كتير قبل كدة لكن في حالة أمهات أطفال ذوي القدرات الخاصة بتكون أساسية لأنها بتساعدك تشوفي المنحة جوا المحنة وتشوفي الأمل والخير في اللي عندك واللي جي وبالتالي هتفعل عندك المشاعر الإيجابية اللي هتساعدك في التقبل أكتر بكتير.
احكي لنا إنتي كمان لو مريتي بالتجربة دي؟
التعليق باستخدام حساب فيس بوك