إحنا عارفين إنك تعبانة! بلاها سوبر وومان

الباب المقفول هو الباب اللي بتعيشي وراه براحتك، هو اللي رغم إنه يبان حابسك، بس هو حريتك، ما كدبتش “فرجينيا وولف” لما قالت إن كل ست بتحتاج “غرفة تخصها وحدها”. باب مقفول هنا هو سلسلة مقالات هتحاول تساعدك ترجعي لنفسك، تنسي شوية إنك زوجة وأم وابنة وعاملة، وتفتكري بس إنك ست، وإن لكي وقتك ومكانك في الدنيا.

في أول مقال في السلسلة، هاكلمك عن إحساسك (الطبيعي والمبرر) بالتعب والإنهاك. كلنا سمعنا جملة “الأمومة مش سهلة، بس مستاهلة”، وعارفين إنك واقع عليكي حِمل كبير. ما تفكريش إن ماحدش حاسس بيكي لإننا شايفين المجهود اللي بتعمليه عشان تستمري كل يوم في كل تفصيلة من تفاصيل حياتك وحياة أسرتك، وبيتك.

بلاها سوبر وومان

الحقيقة إن تشبيهك بسوبر وومان مش قليل على كل المجهود اللي بتعمليه. لكن برضه تشبيهك بسوبر وومان مش في صالحك قوي. تخيلي كده لما يبقى في حياتك شخص لها قدرات خارقة، تخيلي مدى اعتمادك عليها هيكون قد إيه، ما هي خارقة بقى! فاطلعي وانزلي وهاتي وشيلي وحضري وإياكي تشتكي، انتي خارقة، فاهمة؟

عشان كده، لازم تاخدي بالك من حاجة مهمة قوي: ما تديش للناس تصور عنك إنك ست خارقة أو سوبر وومان، انتي إنسانة، وأهم حاجة للإنسان عشان يعيش إيه؟ لا لا .. قبل الأكل والشرب والاحتياجات الأساسية التانية، قبلهم.. أيوة، الراحة. المجتمع طول الوقت ضاغط علينا كستات وكبشر عمومًا إنك لو عملتيش كل الأدوار الاجتماعية من زوجة لأم لموظفة لابنة لأخت لصديقة لجارة على أكمل وجه، تبقى مقصرة، ولو لا سمح الله فكرتي تاخدي أجازة من اللف في الساقية، تبقى إنسانة أنانية ببساطة.

بس تعالي نفكر فيكي شوية كده: امتى آخر مرة قررتي إن الولاد هيعتمدوا على نفسهم في الحاجة الفلانية وأنا هآخد الساعة دي لنفسي، هاسمع مزيكا، أتفرج على نتفلكس، اقرا، اخد شاور طويل ودافي، هابرد ضوافري، أو حتى أبحلق في السقف؟

أنا عارفة إن دي بقت بالنسبة لأمهات كتير رفاهيات وما حدش ممكن يتخيل انتي هتعملي إيه عشان تعمليها. بس لازم تبدأي تحسسي اللي حواليكي إنك مش سوبر وومان، إنك لما تحتاجي وقت لنفسك me time، ده مش كسل ومش أنانية. والأقرب في الخطوة دي أحسن، عشان كل ما الوقت بيمر وفيه وضع معين، الناس بتتعود عليه وبيكون صعب جدًا تغييره، ولو تعبتي في الآخر من كتر الضغط على نفسك وانفجرتي في وش حد، مش هيلاقوا لك مبرر، هيقولوا عنك إنك دراما كوين. وانتي مش كده. اقفلي الباب واقعدي لوحدك، وتابعي باب مقفول واعرفي أكتر عن نفسك.