الغازات من الحاجات الشائعة جدًا اللي بتحصل للبيبي من عمر يوم لحد عمر 3 لـ 4 شهور على حسب طبيعة كل طفل، وللأسف بتعمل له ألم ومغص ممكن يصحى بسببهم من النوم، أو بيفضل “مأريف” وقت طويل، والأم بتكون مش عارفه إيه اللي مدايقه بالزبط، علشان كده هنقولك إيه أعراض وأسباب الغازات عند البيبي و طرق إخراج الغازات من بطن البيبي أو الرضيع.
-
أعراض الغازات عند الرضع
- عياط
- انتفاخ في البطن
- الإحساس إن بطن البيبي جامدة شوية
- أصوات الغازات
- تشنجات.
-
أسباب الغازات عند البيبي
- ابتلاع الهواء أثناء الرضاعة أو أثناء البكاء.
- عدم نضوج الجهاز الهضمي عند الطفل.
- عدم تحمل اللاكتوز الموجود في الحليب.
3 طرق للتخلص من الغازات عند الرضع
أهم نصيحة طبعًا هي استشارة الطبيب المتابع لحالة الطفل، لإنه أقدر واحد على تشخيص الحالة والنصيحة بعلاجها، لكن في حالة إن الدكتور طمنك إن طفلك طبيعي، فهنقولك على 3 طرق ونصايح لتخفيف حدة الغازات من بطن البيبي وإخراجها منه:
-
الطريقة الأولى لـ إخراج الغازات
استخدام قطرات ضد الغازات المخصصة للرضع، واللي بتحتوي على مادة السيمثيكون، ووظيفتها إنها بتفجر الغازات في البطن، وبالتالي بيرتاج البيبي، لكن لازم تستخدميها تحت إشراف طبي مع الالتزام بالجرعات المكتوبة.
-
الطريقة التانية لـ إخراج الغازات
تدليك البطن، وطبعًا لازم يكون التدليك بزيت، وأنسب زيت في الحالة دي، هو زيت اللوز الحلو، وطريقة التدليك بتكون بحركة دائرية بإيدك بالراحة على بطن البيبي مع اتجاه عقارب الساعة، هتلاحظي إن البيبي بدأ يهدأ ويرتاح، وممكن تسمعي صوت خروج الغازات وبعدها ينام.
-
الطريقة التالتة للتخلص من الغازات
ودي تقدري تعمليها مع الطريقتين اللي فاتو، وهي إنم تاخدي بالك من الأكل اللي انتي بتاكليه لو انتي بترضعي طبيعي، لإن الأكلات اللي زي القرنبيط والكرنب بتأثر على هضم البيبي، ولو انتي بترضعي صناعي، يبقى لازم تاخدي بالك من نوع اللبن اللي بتستخدميه، والمعايير تعمليها بدقة، ودرجة حرارة المياه اللي بتعملي بيها الرضعة.
ولو ابنك من بيعاني من الارتجاع -لاقدر الله- تقدري تشوفي المقال ده: الارتجاع عند الأطفال .. أسبابه وأعراضه وطرق علاجه
مع تمنياتنا بالسلامة لكل الأطفال.
المصدر:
التعليق باستخدام حساب فيس بوك