إزاي أجهز ابني لإنترفيو المدرسة؟

مقابلات المدارس بقت واقع في حياتنا الأيام دي، وللأسف هي واقع مخيف بسبب الضغط والتوتر اللي بيتعرض له الأهل واللي بالتالي بيتنقل للطفل وتتحول رحلة التقديم للمدارس من فترة جميلة ومليانة إيجابية للأم والطفل لفترة كلها ضغط وتوتر لحد ما الطفل يتقبل بالسلامة

إزاي تجهزي ابنك لإنترفيو المدرسة وإزاي تحضّريه لإجابة أسئلة الإنترفيو

• أول حاجة بننصحك بيها أنك تزوري المدرسة مع طفلك قبل الإنترفيو يتفرج عليها ويلعب في منطقة اللعب play area فيها عشان تكسري حاجز الرهبة والخوف من المكان الجديد.
• شجعيه ومهدي له الإنترفيو قبل المعاد بشهر على الأقل عن طريق الحواديت والقصص اللي تخليه متحمس للمدرسة ومتشجع إنه يروح.
• قولي له إنه خلاص بقى ولد كبير وشاطر. عشان كدا جه الوقت إنه يروح مكان جديد وأحلى للولاد الكبار يتعلم فيه ويبتدي فيه مغامرات جديدة.
• هدوئك وعدم توترك مهمين جدًا قبل المقابلة لأن توترنا وخوفنا بيتنقل لولادنا على طول حتى لو حاولنا نخبي. ما تقوليش لطفلك إنه رايح يمتحن عشان يدخل المدرسة. لكن ممكن تقولي له إنها زيارة عادية للمدرسة الجديدة عشان نشوف المدرسين ونتعرف عليهم ونشوف الفصل الجميل بتاع الكبار اللي زينا وعشان كمان يوريهم هو قد إيه ذكي ويعرف معلومات كتير.
• اتأكدي إنه نايم كويس وبدري ليلة الإنترفيو عشان يكون فايق ومش مقريف.
• بلاش تقولي له جمل زي “اتكلم بصوت عالي” و”ما تخافش وعلّي صوتك” و”ركز مع الميس ورد على الأسئلة” لإن الجمل دي بتجيب نتيجة عكسية وبتنقل الخوف والتوتر للطفل.

نصائح تساعد الطفل إزاي يجاوب على أسئلة الإنترفيو؟

• استخدمي الـ flash cards بأسامي الحيوانات والأشكال والألوان وحطّيهم قدامه دايمًا في مكان يقدر يشوفهم كتير وطول ما هو بيلعب.
• وانتِ بتراجعي معاه اربطي دايمًا المراجعة بنشاط لذيذ أو لعبة أو أغنية عشان يفتكرها أسرع وتثبت في دماغه.
• لو متاح إنه يتعرف على المدرسين اللي هيعملوا له الإنترفيو قبل المقابلة، خليه يتعرف عليهم ويتكلم معاهم عشان يكون متطمن.
• لو الطفل ما اتقبلش في المدرسة بعد المقابلة، ما تتكلميش قدامه عن الموضوع بسلبية ولو سألك ليه مش هيروح قولي له إنكم عرفتوا إن مفيش مكان في المدرسة دي وإنكم لقيتوا مدرسة أحلى بكتير وهيتبسط بيها أكتر، عشان كدا هتخليه يروح المدرسة التانية.

وأخيرًا، حاولي ما تضغطيش على طفلك بأي طريقة نفسيًا أو أكاديميًا عشان يدخل مدرسة معينة واتأكدي إن المدرسة اللي بتختاريها مش بتضغط على الأطفال في السن دا وبتراعي نفسيتهم والفروق الفردية بينهم.