محتويات المقال
فيه علاقة عكسية بين الأطفال والأكل وبالذات الأكل الصحي في العموم سواء خضار أو فاكهة أو شوفان أو لبن وقيسي على كده بقى من ده كتير.. زي بضبط علاقة توم بجيري.. الاهلي بالزمالك.. علاقة الحاج عبد الغفور وعبد الوهاب قبل ما يعقل ويقوله انا هشتغل معاك في الوكالة.. علاقات صعبة وموترة للأعصاب عمرهم ما بيتفقوا أبدًا ومهما عملنا لا عمر ابنك هيحب الأكل الصحي ولا الأكل الصحي هيبقى حاجة حلوة زي الوجبة المفرحة ولا حتة شوكولاتة ولا بيضة كيندر في نظر عيالك.. كتير كنت بعمل لولادي أكل هيلثي ولقيت مصيره طيران من بقهم على هدومي بسرعة الفنان أحمد زكي الضوئية في فيلم النمر الأسود وبقيت أتقوقع في ذاتي وأعيط زي فاطنة وهي بتقول لعبد الوهاب متنساش تستغطى كويس في الغربة يا بني.. ومن هنا إبتدت الأسئلة الوجودية طيب ليه بيحصلي كده يا صغيرة عال هم يا لوزة؟.. حطيت نفسي مكانهم يعني لو حد حط قدامي خضار سوتيه مسلوق هاكله بحب ولا هاكله وانا متكدرة و”بتقطع من جوايا ونسيت طعم الفرح”؟.. عشان كده ابتديت أجرب وأدور وأكلم ماما وأعيط وأعمل أكل وأكله أنا في الآخر لحد ما قدرت أوصل لسر الخلطة السرية أستاذ كنتاكي بنفسه ميعرفهاش ورضت حلمات التذوق عند ولادي اللي متقمصين دور جوردون رامسي الشرق الأوسط
في المقال ده هقولك على وصفتين أكل لذيذ تعمليهم لولادك.
الفرنش توست (French Toast)
الأكلة اللي بتغسلني من جوه شخصيًا بتحسسني بالدفا وتهون عليا مرار البوتي ترينينج والتيربل توز على قد ما الأكلة هايفة ومفيهاش مجهود بس بتدخلي فيهم عدو ولادك اللدود وهو البيض.
هتحتاجي عشان تعملي حوالي 8-10 قطع
- توست متقطع مثلثات
- معلقتين لبن كبار
- عدد 2 بيضة
- رشة فانيليا
- معلقة صغيرة قرفة
- مكعب زبدة صغير
الطريقة
- في طبق هتحطي البيض ومعلقتين اللبن والقرفة والفانيليا وتضربيهم كويس أوي مع بعض وبعدين تغطسي فيهم التوست من الناحيتين.
- هتطلعي التوست من الخليط على طول على الطاسة السخنة اللي فيها الزبدة وتسويه كويس أوي من الناحيتين لحد ما يبقى لونه دهبي غامق شوية.
- هتقدميه لولادك مع العسل عشان محطيناش سكر مع الخليط اللي غطسنا فيه التوست أو مربى معمولة في البيت أو زبدة فول سوداني وعليها عسل وممكن كمان عسل أسود بالطحينة.. الوجبة دي تنفع تتعمل في فطار هيكون مغذي جدًا عشان فيها بروتين ودهون صحية والفطار ده هيديهم طاقة و أهم حاجة إنهم مش هيكونوا عارفين إن الوجبة فيها بيض.
مكرونة بصلصة الخضروات
كلنا نفسنا ولادنا ياكلوا كوسة وبروكلي وجزر وأي خضروات مفيدة بس فيه منهم ذواقة كتير فبيصعبوا على نفسنا ونفسهم الموضوع عشان كده بقيت أدخل الخضار في الصلصة من غير ما يحسوا.
هتحتاجي عشان تعملي وجبة تكفي 4 أفراد
- كيس مكرونة سباجتي أو أي شكل تحبيه.
- عدد 4 طماطم حجم متوسط
- كوسة مبشورة
- جزرة مبشورة
- بصلة مبشورة
- لحم مفروم (إختياري)
- زبدة أو سمنة بلدي
- ربع كوب شوربة فراخ أو لحمة
- التوابل المفضلة ليكي
الطريقة
- هتسلقي المكرونة وبعدين هتحطي الجزرة المبشورة والكوسة والطماطم في الخلاط وتضربيهم مع بعض وبعدين تصفيهم في مصفاة.
- هتحطي الزبدة أو السمنة وعليهم البصلة المبشورة وتصفريها شوية وبعدين تحطي عليها اللحمة الفرومة تعصجيها بطريقتك وتضيفي ليها الفلفل الأسود والملح.
- هتضيفي عليها الصلصة بتاعتك اللي ضربتيها في الخلاط وعليهم ربع كوباية الشوربة وملح وفلفل ورشة سكر وتغطي عليها وتسيبيهم يتسبكوا كويس.
- بعد ما الصلصة تستوي ضيفي عليها المكرونة.
ملحوظة مهمة
- لو ابنك عنده حساسية من أي مكون يفضل إنك تشوفي أحسن بديل ليه.
- لو تحبي ممكن تسلقي الكوسة والجزر في وصفة المكرونة، بس انا بحطهم من غير سلق لانهم بيستووا كويس أوي وقت الطبيخ.
- ممكن تستبدلي الكوسة والجزر ببروكلي أو بنجر أو حتى سبانخ بس تزودي الطماطم عشان طعمهم ميبانش في الأكل.
- ممكن تعملي الفرنش توست بملح وفلفل ويتحط عليه جبنة.
- الفرنش توست ينفع كفينجر فود جدًا قبل السنة بس طبعًا من غير سكر أو عسل، هتقطعيه للبيبي صوابع وتحطي عليه موز أو أي فاكهة وتسيبيه يأكل نفسه بس تفضلي مراقباه عشان الشرق.
بتمنى تكون الوصفات عجبت ناقد الأكل الصغير اللي عندك في البيت وألف هنا وشفا.
التعليق باستخدام حساب فيس بوك