شم النسيم من أكتر الأعياد اللي بيحبها المصريين ويمكن أكتر حاجة بتفرّحنا به طقوسه الرائعة المتمثلة في أكل الفسيخ والرنجة والبصل الأخضر والبطاطس المحمرة مع أنهار من المياه الغازية. بس بجد محدش يقدر يقاوم العظمة الكامنة في الفسيخ والرنجة اللي لحد النهارده مش عارفين مصدرها إيه. بس كالعادة بتظهر المشكلة الأزلية لهم.. أعمل إيه في الريحة اللي لزقت في إيدي دي؟ لا صابون ولا شاور جيل ولا أي مطهر جايب نتيجة. علشان كده وإيمانًا مننا إنه لا يفل الحديد إلا الحديد، جبت لك شوية وصفات هتقدر تخلصك من المعضلة دي، بحيث تغسلي إيدك وتجهزي نفسك لماتش جديد مع طبق من الفسيخ والرنجة تبكي له من فرط اللذة.
في موقع wikiHow المتخصص في حل كل المشاكل المنزلية بطريقة فعالة، بينصحوا بشوية نصائح فعالة جدًا هاقول لك شوية منها:
- الخل: مش احنا بنحط الفسيخ والرنجة ذاتهم في الخل؟! بس ده لا يمنع إننا نستخدمه هو شخصيًا في غسيل رائحتهم. بكل بساطة هتحطي شوية خل في إيديكي وتفركيها كويس وبعد كده تغسليها بالشكل الاعتيادي، كرري الطريقة دي كذا مرة للتخلص التام من الريحة.
- معجون الأسنان: ودي بقى طريقتي المفضلة: معجون أسنان بريحة النعناع قادر يشيل ريحة الفسيخ وريحة أي شيء مزعج تلمسيه بإيدك زي البصل مثلًا أو الفراخ أو سمك.. حقيقي فعال!
- البن: مميز جدًا في الموضوع ده ويقدر فعلًا يشيل الريحة بسهولة وبيعمل زي إسكراب لبشرة إيديكي اللي هو نضافة ونعومة حاجة كده إتنين في واحد.
- الليمون: عارفة وانتي بتعصري الليمون على الفسيخ والرنجة، اوعي ترمي قشره. لأنه واحد من أقوى الأسلحة لمجابهة ريحة الفسيخ. بعد ما تخلصي أكلك كده تمسكي نص الليمونة الحلو ده وتدعكي إيدك كويس جدًا بيها وكذا مرة هتلاقي الريحة فعلًا راحت.
- بيكربونات الصوديوم/بيكينج صودا: فيه طريقة تانية عابرة عن معجون مكون من معلقة بيكربونات عليها تلات معالق مياه وتكوّني معجون تفركي بيه إيديكي كويس جدًا لحد ما تحسي إن الريحة راحت وبعد كده تغسلي إيديكي بالطريقة الاعتيادية.
الخمس طرق اللي فاتت دول أكتر طرق فعالة وناجحة في موضوع مقاومة ريحة الفسيخ والرنجة. أنا مجرباهم بنفسي علشان أتأكد إنها فعالة فعلًا. عيد شم النسيم 2020 جاي السنة دي في ظروف مش اعتيادية. لكن على الرغم من كده، حاولي انتي وأسرتك تتفقوا على إنكم تنبسطوا حتى بالأعياد البسيطة الجميلة دي. لأن سعادتكم مع بعض هي أفضل وسيلة لحمايتكم.. وكل سنة وانتوا طيبين.
التعليق باستخدام حساب فيس بوك