“القطنة ما بتكدبش”
شعار المرحلة وكل مرحلة في حياة كل ست بيت. من يوم ما ست نظيفة قالت الشعار ده، واحنا وقعنا في دايرة شر حكم القطنة. بس دلوقتي أنا قررت أساعدك واديكي من خلاصة خبرتي بعد ما جربت كل الوصفات اللي هاكتبها لك دلوقتي وحقيقي بتفرق جدًا. بس تعالي الأول أقول لك شوية نصائح عامة لما تمشي عليها هتساعدك كتير في نضافة الأجهزة المنزلية.
نصائح للنظافة
- ما تستنيش البقعة تنشف. حاولي تتعاملي معاها مباشرة، ده هيسهل عليكي النظافة جدًا ويخليكي تفضلي محافظة على أجهزتك.
- خلي دايمًا فيه بخاخ تنضيف وفوطة أو بكرة مناديل مطبخ جاهزة وقريبة من إيدك، بحيث أي بقعة تحصل، تتعاملي معاها على طول.
- لو بتستخدمي قطع القماش في التنضيف، خليكي حريصة على تنضيفها بشكل مستمر.
تقدري هنا تشوفي منتجات لتنظيف وتطهير البيت
دلوقتي أنا هحصر لك الأجهزة المنزلية اللي موجودة تقريبًا في كل بيت، وهاقول لك كل جهاز ازاي تستخدميه بشكل سليم وازاي تهتمي بنضافته.
التلاجة
التلاجة تنضيفها بينقسم لقسمين:
- الهيكل الخارجي: أفضل طريقة تنضيف للهيكل الخارجي هي بخاخة فيها كوباية مياه وكوباية خل مع بعض ومعاهم بكرة المنديل. اعتبريه روتين يومي إنك كل يوم تمسحي التلاجة من بره، ده هيحافظ على نضافتها الخارجية ويحافظ على تعقيمها.
- الهيكل الداخلي: لازم يكون عندك حرص على ترتيب التلاجة باستمرار، وتشيلي أي خضروات بايظة أو أي أكل بايظ، لان التلاجة مكان مغلق وإمكانية تكوّن البكتيريا حتى في جوها البارد ممكن، وبيخلي ريحة التلاجة غير محببة بجانب إن الحاجة بتبوظ فيها بسرعة. الحاجة التانية اللي محتاجة تعمليها إن بنفس البخاخة اللي فيها الخل والمياه، تمسحي التلاجة من جوه كل أسبوع. الحاجة التالتة والأخيرة إن كل شهر التلاجة هتحتاج منك تنضيف عميق، بمعنى إنك هتستخدمي منظف مخصص للتلاجة واللي بتكون ميزته إنه بيكون منظف عضوي ومش بيأثر على الأكل اللي في التلاجة.
- نصيحة مني : حطي قطع فحم في التلاجة وغيريها بشكل دوري. المميز في الفحم إنه بيمتص الروائح الكريهة وبيحافظ على نضافة التلاجة.
الغسالة
الغسالات في بيوتنا بقى فيها تنوع: موجود الأوتوماتيك، الفوق الأوتوماتيك، هاف أوتوماتيك، غسالة ملابس الأطفال. عمومًا أيًا كان نوع غسالتك، فطريقة تنضيفها بتنحصر في نقطتين:
- تنضيف فلتر الغسالة: من الأمور المهمة جدًا إن كل واحدة مننا تاخد بالها منها. في الغسالات الأوتوماتيك، التعامل مع الفلتر مش سهل، هتحتاجي كل فترة تجيبي حد مختص يجي ينضفه لك لأن الفلتر بيفرق في كفاءة الغسالة. لو غسالتك من النوع اللي بيتعبى من الأعلى، الفلتر بيكون في حوض الغسالة نفسها وسهل عليكي نزعه وتنضيفه وتركيبه تاني.
- أيًا كان نوع غسالتك، لازم تعملي لها دورة تنضيف اسمها دورة خل. هي بتكون عبارة عن دورة غسيل بس لها تعليمات معينة: أولًا: الغسالة تكون فاضية، يعني مفيش فيها هدوم. اختاري أطول برنامج تنضيف ويُفضل يكون بالمياه السخنة. هتحطي في درج المسحوق كوباية خل مع كوباية بيكربونات، وشغليها. وبعد ما تخلصيه، افتحي باب الغسالة علشان تبرد وتنشف.
- نصيحة مني: حاولي ما تسيبيش الغسيل وهو مبلول في الغسالة لأن ده بيخلق بيئة مناسبة لنمو البكتيريا في الغسالة وبيخليكي تواجهي مشكلة إن الغسيل بيطلع ريحته مش حلوة مهما استخدمتي من مساحيق.
لو عايزة تعرفي أفكار وحيل تسهل عليكي حياتك، ادخلي هنا.
المكنسة الكهربائية:
من الأجهزة المنزلية اللي بتحتاج رعاية خاصة. أي مكنسة بتتكون من تلات أجزاء هي اللي بتحتاج منك النضافة علشان تقدري تحافظي على كفاءة الجهاز.
- كيس المكنسة: ده بيحتاج تنضيف كل أسبوع أو أسبوعين حسب سعته. فيه مكانس كيسها صغير وفيها كبير. انتي هتحتاجي تنضفيه بحيث تفضّيه كويس جدًا من التراب اللي فيه، استخدمي المياة الفاترة في شطفه. وبعد كده، اغسليه في الغسالة عادي وسيبيه ينشف وركبيه عادي.
- خرطوم المكنسة دايمًا اتأكدي إن مفيش حاجة واقفة فيه، سواء أجزاء صلبة أو وبر أو أي شيء بيخفف من قوة شفطها.
- راس المكنسة: مع الوقت، راس المكنسة نفسها بتراكم أتربة ووبر في أجزائها الداخلية. هتلاقي نفسك كل كام شهر محتاجة تفكي مساميرها وتنضفيها وتركبيها تاني. لو بتخافي تبوظ في فكها وتركيبها، وديها لحد مختص.
- نصيحة مني: لما تيجي تركبي كيس المكنسة، قومي بفتح كيس من الفانيليا المستخدم في عمل الحلويات على الأرض، وخليه أول شيء المكنسة تكنسه. ده هيكون له ميزة إن كل مرة هتشغلّي المكنسة هتلاقي ريحة الفانيليا ظهرت بدل من رائحة التراب اللي موجود في المكنسة.
الميكروييف
من أكتر أنواع الأجهزة المنزلية اللي بيشكل تنضيفها تحدي بالنسبة لكل واحدة فينا هو الميكروييف. ده لأنه أوقات البقع فيه بتاخد شكل انفجاري. هتلاقي البقع فيه في كل حتة، وده شيء مزعج، بس أنا جبت لك أسهل طريقة:
- هتجيبي بولة مخصصة للدخول في الميكروييف، وهتملي نصها مياه وعليها كوباية خل. دخليها في الميكروويف وشغليه وحطيها على نظام بحيث المياه تغلي وتطلع بخار. بعد ما الميكروويف يقف، افتحيه وبفوطة نضيفة أو منديل مطبخ، امسحى الميكروييف، هتلاقي كل البقع اللي فيه سهل تنضيفها وزالت بسهولة. بالنسبة لطبق الميكروييف، بيتغسل بشكل عادي زي أي طبق بس استخدميه وهو ناشف.
- نصيحة مني: لازم تقري كتالوج الميكروييف كويس. كل نوع من أنواع الأطعمة، له تعليمات وعدد دقايق معين في الميكروييف. اتباعك للتعليمات دي هينقذك من مواقف مزعجة ممكن تحصل.
الأجهزة المنزلية الصغيرة
- الأجهزة المنزلية الصغيرة زي الخلاط، الكيتشن ماشيين، البويلر، الهاند بلندر: كل دول هيحتاجوا بخاخ المياه والخل اللي قلت لك عليه في الأول مع مناديل المطبخ. علشان تحصلي على أفضل نضافة ليها، بعد كل إستخدام، هترشي شوية على منديل المطبخ وتمسحي سطح الجهاز اللي انتي عايزاه بعد انتهائك من استخدامه.
أعتقد إني قلت لك على أكتر أجهزة منزلية صعبة في تنضيفها في بيت كل واحدة فينا. جربي الطرق دي وقولي لي في التعليقات هل نفعتك وساعدتك زي ما نفعت معايا ولا لأ؟
التعليق باستخدام حساب فيس بوك