محتويات المقال
الأطفال اللي بتتربي وتكبر في وجود حيوان أليف في البيت، بالذات كمان لو كلب، بيكونوا معتبرينه صاحبهم الظبط، وفي، وفرد من افراد الأسرة اللي ما يقدروش يستغنوا عنه، وللأسف لو تعب أو كبر في السن فراقه بيبقي من أصعب الحاجات اللي ممكن الطفل يقبلها. موت الحيوان الأليف بالنسبة للطفل زي موت أقرب الناس له بالظبط. وده للأسف حصل قريب قدامي مع بنت صديقتي والبنت دخلت في حالة نفسية سيئة جدًا بعد موت كلبها.
فقررت أكتب مقال النهارده يكون فيه بعض النقط المهمة اللي نركز فيها لو عدينا مع ولادنا بموقف زي ده، لإن بمساعدة الأهل، موقف موت الحيوان الأليف هيعلم الطفل مهارات مهمة كتير تفيده طول عمره بعد كده لو اتعاملنا معاها صح.
ما تضحكوش عليهم:
بنتخيل ساعات إننا لما نكذب علي ولادنا، ونقول لهم إن الكلب هرب مثلًا أو تاه أو رجع لمامته، احنا كده بنحميهم من مشاعر الحزن أو على الأقل هيكون وقعها أخف عليهم. لكن الحقيقة إن تخبية الحقيقة عنهم هتخليهم يفقدوا ثقتهم فينا لو سمعوا الحقيقة من أي مصدر تاني، ده غير إن حمايتهم من الأخبار الصعبة دي مش مفيدة ليهم بالشكل اللي احنا متخيلينه. بالعكس فرصتنا وهم صغيرين وفي حضننا ندربهم علي شكل الدنيا اللي هيشوفوه بعدين.
عرفوهم الحقيقة من غير تزويق علي قد سنهم:
يعني لو الكلب عيان، نبدأ نتكلم معاهم بطريقة مناسبة لسنهم عن مرضه وإننا بنحاول نساعده ونعرّفهم الدكاترة هيقدروا يعملوا إيه معاه ونبدأ نهيأهم نفسيًا إن الحيوانات زي الناس ليها وقت بتقضيه في الدنيا ولما بيخلص بيروحوا ل بنا باختلاف الطريقة (يعني ما نربطهاش بمرض مثلًا عشان ما يخافوش من فكرة المرض عامة بعد كده).
استعدوا لرد فعلهم وشاركوهم مشاعرهم:
بعد موت الحيوان الأليف الطفل بيبدأ يحس بالوحدة، بالغضب، وفيه أطفال حزنها بيبان بصورة تغيير عام في السلوك، وده اللي مطلوب مننا نكون فاهمينه ومتقبلينه وبنساعدهم يخرجوا منه. بإننا نفهمهم إن مشاعرهم دي طبيعية وإننا كمان حاسين بزعل على الكلب بتاعهم وفاهمين هم بيعدوا بإيه وفاهمين هو قد إيه غالي عليهم. ممكن لو عندنا أي تجارب لينا مشابهة عدينا بيها واحنا صغيرين، نحكي لهم عليها ونشاركهم عملنا إيه عشان نخرج من حالة الحزن ده. الأطفال بترتاح لما تحس إن اللي حاسين بيه ده طبيعي ومقبول وإن الكبار كمان بيعدوا بيه زيهم وده بيخليهم يعبروا بطريقة مريحة أكتر عن مشاعرهم فيعدوا اسرع من الحزن وألم الفقد.
جاوبوا على كل أسئلتهم:
بعد موت الحيوان الأليف بيفضل الطفل فترة متأثر بفكرة الموت عامة أو المرض أو شكل الحياة بعد الموت وبيسألوا كتير، فمهم إننا نكون مجهزين إجابات بطريقة بسيطة والسؤال اللي ما نعرفش إجابته عادي جدًا إننا نقول لهم “هاسأل وأرد عليك”.
نفكر معاهم إزاي نتأقلم بعد كده:
نحكي معاهم القصص اللي بتضحك، اللذيذة اللي عيشناها مع الكلب بتاعهم، نشجعهم نجمع الصور بتاعته معانا ونعمل بيها تابلوه كبير ونعلقه أو ألبوم صور كل ما يوحشنا نتفرج عليه، التفكير في الذكريات السعيدة والصور الحلوة هتخلي مخهم يتغلب بصورة أفضل على أفكار ومشاعر الحزن اللي ارتبطت بمرض أو موت حيوانهم الأليف وتبدلها بالأفكار ومشاعر الذكريات السعيدة اللي عاشوها مع بعض.
التعليق باستخدام حساب فيس بوك