ناس كتير شايفة إن لما بنيجي نتكلم عن البلوغ مع الأطفال، بنكلم كل جنس عن التغييرات اللي بتحصل في جسمه هو بس، وإن البنت بس هي اللي بنشرح لها البيريود، مالوش لازمة إن الولد يعرف دلوقتي عن البيريود وإنه كده كده بكرة يكبر ويعرف مش لازم نفتح عينه دلوقتي.
لكن الحقيقة إن الطفل الولد ده حقه، وحق اللي حواليه عليه، إنه يبقي فاهم وعارف مامته أو أخته بيعدّوا بإيه كل شهر لو عايزين نكبر رجالة واعية ومتعاطفة ومتفهمة للتغييرات اللي بتحصل في جسم مراته بعد كده، مش مجرد ولد عرف المعلومات من أصحابه أو من التلفزيون ومالقاش حد يتكلم معاه فيها.
طيب أشرح لابني الولد عن البيريود ازاي؟
- افتحي الموضوع تدريجي وبالصدفة، زي إنكم تشوفوا إعلان فوط صحية في التلفزيون أو يشوفك بتشربي في رمضان فيسألك مش صايمة ليه، فتبدأي تتكلمي معاه مش لازم يكون على شكل قعدة ومحاضرة، خليكي casual وطبيعية علي قد ما تقدري. عشان ده هينعكس على طفلك لأنه بيتعلم حقائق ربنا خلقها في جسمنا مش حاجة عيب.
- وزي ما اتكلمتي معاه عن البلوغ وعن التغييرات اللي بتحصل في جسمه، احكي له إن البنات تكوين جسمهم مختلف عشان ربنا خلق جسمهم جواه مكان يشيل فيه البيبي غير الرجالة، وإن عند سن معين الجسم بيبدأ يستعد لاستقبال البيبي.
- الجزء ده اسمه “الرحم” وفيه حاجة اسمها “المبيض” وده اللي بيتجهز كل شهر ولما بيكون لسه مفيش عملية تكوين بيبي، فالجسم بيتخلص من الحاجات اللي جواه الزيادة وبتنزل على شكل دم.
- مهم جدًا إننا نفهمهم إن الدم ده مش عشان إصابة أو تعويرة أو البنت بتتألم وهو بينزل.
- لكن بيكون فيه بعض التقلصات في البطن، وأوقات كتير البنت بتبقى حساسة وبتحس بالضيق أو العصبية الأيام اللي قبل البيريود، وده من المعلومات المهمة إنه يعرفها عشان يتفهم طبيعة الست بجد ونعرف نكبر رجالة واعية.
من أهم الحاجات اللي لازم نركز عليها في كل الكلام ده هو إننا نأكد جدًا على الطفل إن ده شيء خاص، ده لا حاجة تقرف ولا تكسف، ولكنها حاجة خاصة ما ينفعش نتكلم فيها مع أي بنت تانية ولا نسألها عن البيريود بتاعتها، نشجع الولاد يسألوا ونشكرهم علي أسئلتهم ونطمنهم إنهم هيلاقوا كل الإجابات اللي محتاجينها عندنا مع التأكيد على فكرة خصوصية الحوار.
يمكن كتير يبقى شايف إنه مالوش لازمة الشرح التفصيلي، وكتير تاني متخيل إنه بنفتح عيونهم أو بنزيد فضولهم، لكن الحقيقة هي حق الطفل عليكي إنه يبقى عارف وفاهم كل حاجة عن جسمه وجسم غيره حسب سنه وحسب أسئلته، ويبقى فاهم البنات اللي في حياته بيحسه بإيه وليه سواء مامته أو أخته أو مراته بعد كده.
المصادر:
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك