محتويات المقال
أغلب الآباء والأمهات، إن ما كانش كلهم، بيحبوا أولادهم، ونِفسهم يشوفوهم أحسن ناس ويربوهم أحسن تربية، وكتير من الآباء والأمهات بيحاولوا يجتهدوا جدًا في تربية ولادهم. لكن للأسف على الرغم من اجتهادنا، ساعات بنغلط وبنعرّض الطفل لإساءات التربية. فيه قاعدة بتقول: “الآباء الجيدون يرتكبون أشياء سئية والأمهات الجيدات بما يكفي يرتكبن الأخطاء”. يعني حتى الآباء الصالحين ساعات بيرتكبوا الأخطاء، احنا دورنا نتعلم علشان نقلل الأخطاء دي على قد ما نقدر.
فيه كتاب ممتاز اسمه “أبي الذي أكره” بيتكلم عن الإساءات النفسية اللي بتحصل للأطفال وازاي بتأثر عليهم لما يبقوا كبار. وفي أول فصل من الكتاب، بيعرض المؤلف د. عماد رشاد عثمان أربع أنواع للإساءات اللي بيتعرض لها الأطفال في التربية ومثال على كل إساءة. تعالوا نشوفها سوا.
10 جمل عجبتني من كتاب أبي الذي أكره.. اعرفيها من هنا
الإساءة النفسية
- لما بنقارن الطفل طول الوقت بأطفال تانيين من العيلة أو باخواته، ونطلب منه دايمًا يكون على نفس مستواهم ويحقق اللي بيحققوه.
- لما بنطرد طفل من البيت أو نهدده بالطرد، ودي بنعلمها أكتر مع المراهقين.
- تجاهل الطفل وعدم الاهتمام باحتياجاته.
- التفرقة بين الأخوات على أساس السن (الكبير والصغير) أو الجنس (الولد والبنت).
- الألقاب المهينة، زي ما بنسمي الطفل بالتخين أو العبيط أو الخرتيت أو أو …
- التنمر: زي التعليق على وزن الطفل وشكله وملامحه ولون بشرته، وقلة ذكاؤه لو بيغلط كتير.
- منع الطفل من التعبير عن مشاعره، زي إننا نمنعه من الغضب أو نقول له: “ما تعيطش”.
- صراع الأم والأب أمام الأولاد وإظهار الجفاء والخصومة وقلة الاحترام.
- لما بنتكلم عن الطرف التاني بشكل وحش أمام الأولاد في وقت الانفصال.
- إجبار الأولاد نفسيًا على الانحياز لطرف من الأطراف أثناء الصراع أو الانفصال.
- غياب التقدير والتشجيع والحفاوة.
- لما الأب والأم أو كلاهما بيزعق أو بيرمي حاجات ويكشر ويشتم أمام الأطفال.
- التسلط المفرط وقمع حرية الطفل وعدم احترام اختياره، وإجباره يعمل حاجات مش عايز يعملها بالعافية.
- دوام المن بالإنفاق: يعني لما نفكّر الأطفال طول الوقت بإننا بنصرف عليهم، ونحسسهم إنه دي جميلة وإنهم عالة علينا.
- إننا نخلف الوعود اللي بنوعدها لأولادنا.
- الحماية المفرطة بطريقة الهيليكوبتر. علشان تعرفوا إيه هي طريقة الهيليكوبتر شوفوا المقال ده.
- الدلع المبالغ فيه، وعدم رفض أي طلب للطفل حتى لو مش منطقي.
- إجبار الطفل ياكل أكل بيكرهه بالعافية.
- إجبار الطفل وعقابه على دخول الحمام بدري وهو مش مستعد نفسيًا. اعرفي أكتر من الوقت السليم للبوتي تريننج من هنا.
- تهديد الأم أو الأب للأطفال بإنهم هيسيبوا البيت.
الإساءة الروحية
- فرض الشعائر الدينية على الطفل بشكل مبالغ فيه وإجباره عليها وعقابه لما ما يعملهاش.
- التهديد بالجحيم وعذاب القبر ودخول النار.
- إننا نقول للطفل على كل حاجة مش عايز يعملها إن ده “عقوق آباء”، وإنه ربنا هيتضايق منه لو ما سمعش كلام بابا وماما.
- التخويف من الجن والعفاريت وأمنا الغولة.
- التخويف طول الوقت من ربنا.
الإساءة الجنسية
- التحرش بالطفل عن طريق اللمس أو النظر أو أي شكل.
- التعري أمام الطفل بعد سن تمييز الجسم.
- ممارسة الأب والأم المداعبات الجنسية أو الجنس أمام الأبناء.
- ردود الفعل المتخاذلة، لو الطفل حكى إنه تعرض للتحرش، أو تحسيسه بالذنب أو إنه هو السبب في التحرش اللي حصل له أو أمره بكتمان الواقعة. اعرفي من هنا تعملي إيه لو ابنك اتعرض للتحرش.
- وفقًا لوارزة الصحة المصرية ودار الافتاء يعتبر ختان البنات من الإساءات الجنسية كما إنه فعل غير قانوني.
الإساءة البدنية
زي الضرب واللكم والصفع والقرص وإيذاء الجسد أو الربط والتكتيف والتذنيب.
وأخيرًا، احنا مش ملايكة، ووارد كلنا نغلط، لكن المهم نحاول نفهم ونتعلم ونتدارك الأخطاء. وياريت نعتذر بشكل مباشر للطفل، لو حسينا إننا عملنا أو بنعمل غلط من دول.
It is never too late
التعليق باستخدام حساب فيس بوك