محتويات المقال
لو الطبخ بالنسبة لك مش مهمة بتأديها وخلاص، لكن بتكوني مبسوطة وانتي بتطبخي وبتحبي تفنني وتقدمي أطباقك بشكل حلو، وكل صحابك شايفينك مرجعيتهم في الوصفات ودايمًا يكلموكي ويسألوكي لو محتاجين وصفة معينة. لو حاسة إن هيكون ليكي بصمة وشخصية مميزة في وصفاتك وطرق تقديمها وإنك عندك أسلوبك الخاص في الطبخ وفي شرح الوصفات بطريقة سلسة ومميزة، يبقى انتي الشخصية المناسبة اللي عندها جزء كبير من مقومات الفوود بلوجر المحترفة.
دلوقتي السوشيال ميديا بقت فاتحة أبوابها بشكل كبير لأي حد عنده موهبة. بسهولة يقدر يظهرها للناس ويتواصل معاهم ويتواصلوا معاه ويعرف رأيهم في المحتوى اللي بيقدمه، ولو حقيقي موهوب والناس حبوه، بتتفتح له أبواب كتير وفرص كتير من خلال موهبته دي. وعشان احنا يهمنا إنك دايمًا يكون ليكي بصمة وتنجحي في أي مجال بتحبيه، جمعنا لك مجموعة خطوات ونصايح تساعدك تبقي فوود بلوجر محترفة:
-
ابدأي بعمل حساب على السوشيال ميديا
لازم يكون عندك حساب على وسائل السوشيال ميديا المختلفة زي فيسبوك أو إنستجرام غير حسابك الشخصي، عشان من خلاله تقدمي المحتوى اللي له علاقة بموهبتك ألا وهي الطبخ. ولازم الحسابات دي تكون عامة أو public عشان تقدري توصلي لأكبر عدد من الناس يتعرفوا عليكي وعلى المحتوى اللي هتقدميه. أما لو حبيتي يكون عندك البلوج الخاص بيكي، فلازم تستعدي كويس جدًا وتطلبي مساعدة حد يكون عنده خبرة في تصميم المواقع web designer عشان يعمل لك تصميم للبلوج بشكل احترافي وبصورة تليق عليكي وعلى شخصيتك.
-
اختاري اسم مميز
اختيارك لاسم الحساب بتاعك عامل مهم جدًا من عوامل نجاحك. لازم يكون بيعبر عن المحتوى اللي بتقدميه وعن شخصيتك وكمان يكون مميز ومختلف عشان يعلّق مع الناس ويلفت نظرهم لشغلك. خدي وقتك كويس قوي وانتي بتفكري فيه.
-
ابدأي في تجهيز محتوى متنوع
خلاص عملتي حسابات على السوشيال ميديا؟ لازم تبدأي تسألي نفسك: هتقدمي إيه للناس وهتقدميه إزاي؟ بمعنى مثلًا: هل هتنزّلي صور للأكلات ولا الفيديوهات ولا وصفات مكتوبة؟ وابدأي شوفي إيه المهارات اللي ناقصاكي عشان تقدري تقدمي ده. يعني لو انتي إمكانياتك في التصوير ضعيفة وحابة إنك تتعاملي مع الموضوع بشكل احترافي وعندك الإمكانيات المادية، ممكن جدًا تستثمري فلوسك في كاميرا محترفة وتاخدي دورات تدريبية عن التصوير (متاحة أونلاين) وتنسيق الأكل أو “الفوود ستايلينج” وأكيد موهبتك وإبداعاتك هيظهروا وتكوني متميزة. ولو ما عندكيش الوقت أو الإمكانيات إنك تشتري كاميرا وتاخدي كورسات، ما تقلقيش خالص، ممكن تستخدمي كاميرا الموبايل زي كتير من الفوود بلوجرز وتعلمي نفسك بنفسك وتتفرجي على فيديوهات على اليوتيوب. هتلاقي كم رهيب من المصادر اللي عن طريقها هتقدري تصوري صور روعة بكاميرا الموبايل وكمان تتعلمي تنسيق الطعام أو الفوود ستايلينج.
-
اتفرجي كتير
وسّعي آفاقك وأفكارك بإنك تتفرجي كتير على فوود بلوجرز مشهورين من كل مكان مش بس مصريين. اتفرجي أكتر على صور أكلاتهم، وصفاتهم اللي بيقدموها، وحاولي كمان تتعلمي من أسلوبهم سواءً في التصوير أو كتابة الوصفات ووصف الأكلات والمطاعم. لكن اوعي تنقلي منهم: اتعلمي واستفيدي وخليهم مصدر إلهام ليكي لكن خلّي دايمًا ليكي شخصيتك وأسلوبك المميز.
-
تابعي كل ما هو جديد أو تريندي
مجال تدوين الطعام ده مجال كل يوم بيتغير ويتطور ويظهر فيه حاجات جديدة وتقليعات، زيه زي مجال الموضة والأزياء. حاولي تكوني دايمًا متابعة كل جديد وخلّي ده ينعكس على المحتوى اللي بتقدميه.
-
نمي مهاراتك وطوري من نفسك
دايمًا حاولي تتعلمي كل يوم حاجة جديدة وتنمي مهاراتك وما تتكسفيش أبدًا إنك تسألي عشان تعرفي أي معلومة مش عارفاها. ابعتي للفوود بلوجرز المعروفين واسأليهم واستعيني بخبراتهم. خدي كورسات كتير، مصر بقى فيها مجموعة كبيرة من مدارس تعليم الطبخ تقدري تاخدي دورات تدريبية في الحاجات اللي ما عندكيش عنها معلومات كتير عشان تكوني دايمًا في تطور مستمر.
-
كوني نفسك وما تقلديش حد
حافظي دايمًا على إنك تكوني نفسك وما تقلديش حد أو تنقلي من حد. عشان تنجحي وتتميزي، لازم يكون ليكي أسلوبك في كل اللي بتقدميه ولو حد ألهمك أو حبيتي تاخدي وصفة حد معروف وتطوريها، لازم تقولي ده وتظهريه لمتابعينك.
نتمنى يكون المقال مصدر إلهام وإفادة ليكي، وخليكي دايمًا متأكدة إنك طول ما عندك شغف تجاه موهبتك، يبقى أكيد هتوصلي وتحققي كل اللي بتتمنيه.
التعليق باستخدام حساب فيس بوك