زي اليومين دول وفي وقت راس السنة الجديدة، بنقف مع نفسنا وقفة، وتلاقي صوتنا بقى جاد جدًا كده، ونقول لا خلاص بقى كفاية فعلا، أنا من أول السنة الجديدة هغير كذا وكذا وكذا..
وتيجي السنة الجديدة ونبدأ أول إسبوع تمام، أو شهر بالكتير، وبعد كده ننسى كل اللي خططنا له
-بيحصل ولا مابيحصلش؟
-بيحصل يا ستي، نعمل إيه طيب؟
أنا هقولكم نعمل إيه، ورقة وقلم ومعايا يا ست الكل:
- قسمي الورقة 4، واعملي جزء لخططك الشخصية، وجزء لخططك لأسرتك، وجزء لخططك في شغلك، وجزء لأي خطط عامة.
- كل جزء قسميه 2، جزء خطط سريعة، وخطط ممتدة على مدار السنة، فمثلا من خططك الشخصية إنك هتخسي 20 كيلو، دي خطة ممتدة على طول السنة مش هتخلص في أول شهر.
- ممكن تلاقي خطط موسمية، زي مثلا خطط للصيف، أو لرمضان أو لدراسة الأولاد.
- بعد ما كتبتي كل حاجة، ارجعي رتبيهم على حسب أهميتهم، فمثلا لو حاطه خطة دراسات عليا وخطة شغل، شوفي الأهم فيهم واللي له أولوية عندك، وحطيه الأول.
2021
- لو لقيتي خطط متعارضة شيلي الأقل أهمية بالنسبة لك، فمثلا لو ناوية تجيبي عربية وتجيبي بيت، وميزانيتك مش سامحة بالاتنين في نفس الوقت، يبقى تحذفي الخطة الأقل أهمية بالنسبة لك وتركزي عالخطة المهمة.
- يستحسن إنك تعملي خطط قليلة قدر المستطاع في كل جزء من الأربعة، لأن إحنا بشر، فمش متوقع أبدًا إنك تمشي على 40 خطة في نفس الوقت طول السنة، وللأسف لما بتوقفي بعد فترة قصيرة بتحسي بالإحباط والفشل، ومابتكونيش عارفة المشكلة فين.
- ابدأي حطي تفاصيل الخطة، هخس 20 كيلو، يبقى أنا محتاجة رياضة ودايت، ودايت ورياضة، شوفي هتمشي على أي دايت، وهتمارسي الرياضة فين وإزاي، وحاولي تخليهم عادة يومية، بحيث حتى لو وصلتي لهدفك، تفضل العادة دي في حياتك، نفس القصة بالنسبة للقراءة أو حفظ القرآن أو أي عادة مفيدة.
تقدري تمارسي الرياضة من البيت باستخدام برنامج راحة بالي الرياضي: Fit Mama at Home Program
- الخطط الخاصة بأسرتك، لازم تخليهم يشتركوا معاكي في تقريرها، فمينفعش تحطي خطة إني هخلي ابني يمارس رياضة السباحة، وهو مش عايز أصلا، أو حتى لو خطة زي إن كل أفراد الأسرة يشتركوا في المهام المنزلية، بردو لازم تشاركيهم الخطة علشان يكونوا عارفين إنك هتشتغلي على الموضوع ده، وأكيد ده هيوصلكم للهدف مع بعض أسرع.
- حطي خطط واقعية، ومش مقصود بالواقعية إنك ماتحلميش، بس واقعية بالنسبة لظروفك، مينفعش مثلا يكون كل مدخراتك 100 ألف جنيه، وتقولي أنا السنة دي هشتري فيلا في كومباوند، إلا طبعًا لو إنتي عارفة إن في مصادر دخل هتجيلك أثناء السنة، أو هتسعي لكده زي إنك هتبيعي قطعة أرض من ميراثك..مثلًا.
2021
- من أهم النصائح اللي الخبراء بيقولوها في موضوع تحديد الأهداف، إنك متتكلميش عن أهدافك طول الوقت للناس، مش عشان الحسد لا، بس لما بتتكلمي، مخك بيحصل فيه درجة رضا معينة بيخلي إرادتك في الاستمرار تقل لحد ما تنعدم، ممكن الكلام ده ميكونش دقيق أوي، بس هي حاجة بتحصل بالفعل بصرف النظر عن تفسيرها العلمي إيه، ياما اتكلمنا عن الدايت ونزول الوزن، وفجأة ضعفنا جدًا بعد ما اتكلمنا قدام الناس، أو كتبنا على الفيسبوك، أول حاجة بتيجي في دماغنا إننا اتحسدنا، بس هو مش حسد فعلا.
- بعد ما تنسقي ورقة أهدافك، علقيها في مكان واضح لعينك، عشان تشوفيها يوميًا لو نسيتي، واشتغلي على حاجة حاجة وبالراحة.
- السنة قدامك طويلة، متخلصيش طاقتك كلها في أول شهر وبعدين تكسلي، وحتى لو حصل وكسلتي، ارجعي للبداية تاني وما تحبطيش.
شاركينا طريقة تخطيطك لأهدافك، وكل سنة وانتي طيبة.
التعليق باستخدام حساب فيس بوك