الطفل الخجول هو طفل ما بيقدرش يتعود على الناس بسهولة، مش بيعرف ينفتح بسرعة ويبقى مرتاح وجاهز للكلام والتواصل مع الناس حتى لو يعرفهم وشافهم 100 مرة. مع إن نفس الطفل ده غالبًا بتلاقيه عادي في البيت رغاي واجتماعي ونشيط ومش بيبطل لعب وتواصل مع مامته وأخواته طول اليوم. وللأسف ده ممكن يستفز الأهل ويخليهم يضغطوا علي الطفل الخجول لما يحسوا إنه بيضيّع على نفسه أوقات حلوة وفرص للتواصل بره البيت بخجله. فالمشكلة تزيد أكتر ويبدأ الطفل ينسحب ويتقوقع أكتر وخجله يكبر معاه. عشان كده هنكلمك عن أسباب الخجل عند الأطفال وعن كيفية التعامل مع الطفل الخجول.
أسباب الخجل عند الأطفال:
أول حاجة لازم نعرفها إن الخجل ده صفة طبيعية موجودة في تكوين شخصية البني آدم، ما تعيبش الطفل في حاجة وبتختلف درجاتها من طفل للتاني. بس فيه أطفال ممكن تزيد عندهم بسبب خوف الأهل الزايد عليهم والحماية الزايدة، أو بسبب الانتقاد المستمر والعقاب الشديد، أو المقارنة بينه وبين أخواته أو أصحابه، أو خناق الأب والأم كتير قصاد الطفل، اللي بيوتّره ويحسسه بعدم الأمان. كل ده بيظهر على شكل إنه ينطوي ويبعد عن الناس.
كيفية التعامل مع الطفل الخجول
- مهم قوي إننا ما نضغطش على الطفل ونحسسه إنه عنده مشكلة كبيرة ونعلّق عليها كتير أو نزعق له عشان مش راضي يسلّم على حد أو مش عايز يقوم يلعب مع باقي الأطفال، وكمان ما نقولش قدامه جمل زي: “معلش أصله بيتكسف” أو “سيبك منه هو علطول مكسوف كده” لأن ده مش هيساعد الطفل نهائي. بالعكس ده هيزود المشكلة أكتر.
- مهم كمان إننا نبيّن له تفهمنا وتعاطفنا وإننا حاسين بيه وبخجله ومقدّرين ده وعايزين نساعده لو طلب مساعدتنا.
- لو حاسّين الطفل مهزوز أو عنده مشكلة في ثقته في نفسه، نرجع نعامله باحترام ونقلل الانتقاد وننتقد الموقف نفسه مش الطفل، ودايمًا نقارن الطفل بنفسه مش بحد تاني.
- نشركه في ألعاب جماعية ونشاطات تطوعية ونكون متوقعين إنه هيقاوم في الأول ويرفض فما نستسلمش بسهولة ونشجعه على أي تقدم صغير بيعمله.
- نخلّيه يبقى عنده مسؤوليات ومهام هو مسؤول عنها، يعملها بنفسه وبطريقته، من غير تدخل زيادة مننا لأن ده بيدّي للطفل ثقة في نفسه ويعرف إنه يقدر يتعامل مع الناس ويتصرف لوحده.
- من أنجح وأحب الطرق لقلبي في التعامل مع الأطفال هو “التمثيل” أو الـrole playing بمعنى إننا نمثّل الموقف في البيت لما نبقى عارفين إننا خارجين أو هنواجه موقف الطفل بيظهر خجله فيه ونوفّر للطفل بدايل يتصرف بيها عشان يكون مستعد.
وما تستعجليش في التعامل مع الطفل الخجول وادي له وقته. خليكي صبورة وادعميه وشجعيه واشحني ثقته بنفسه. وبالوقت والمواقف، خجله هيقل وهيقدر ينفتح ويتواصل بسهولة أكتر. انتي كمان احكي لنا قدرتي تتصرفي إزاي مع طفلك الخجول وتشجعيه؟
التعليق باستخدام حساب فيس بوك