إزاي تصممي غرفة البيبي على طريقة منتسوري؟

أكيد كلنا سمعنا عن منهج “منتيسوري” في تعليم الأطفال. منهج منتيسوري هو أسلوب وطريقة في تعليم وتربية الطفل ابتكرتها الطبيبة والمربية الإيطالية ماريا منتيسوري علشان تخلّي الطفل منتج وفعال وبيعتمد على نفسه. منهج منتيسوري في تربية الأطفال معروف بتميزه وتفرده عن غيره، وبيشتغل بشكل أكبر على بناء طفل سليم صحيًا ونفسيًا، عشان كده المنهج ده ليه طريقة خاصة في تصميم غرفة الطفل بشكل يساعد على بناء شخصيته.

في المقال ده، هنقول لك إزاي تصممي غرفة طفلك على طريقة منتيسوري:

أولًا: الغرفة على طريقة مونتيسوري لازم يكون ديكورها بسيط ما فيهاش كراكيب وتكون مريحة للنظر وفيها مكان واسع الطفل يعرف يلعب فيه. اختاري الألوان المبهجة والرسومات والأشكال اللي بتساعد على زيادة انتباه طفلك وزيادة إدراكه من غير بهرجة كتير.
ثانيًا: أول ما الطفل يبدأ يتحرك بنشيل سرير الطفل لأن السرير بيمنع طفلك من اكتشاف غرفته براحته عشان كده بنحط مكانه مرتبة على الأرض ونفرش عليها غطا عليه الرسومات والألوان اللي تلفت انتباهه، علشان الطفل يقوم من على السرير ويتحرك في الغرفة على راحته تمامًا من غير أي قيود. وكمان يقدر يخرج من أوضته ويجي لك من غير أي صدمات أو مشاكل تمنعه من الحركة بحرية داخل غرفته.
ثالثًا: الأثاث أو العفش اللي في الغرفة بيكون قليل ومقاسه صغير على قد الطفل يعني المكتب والكراسي والمكتبة والدولاب بيكونوا صغيرين وفي متناول الطفل ويقدر يوصل له لوحده. كل ما نقلل الحاجات اللي موجودة في أوضة الطفل، إحساس القلق عنده بيقل وقدرته على استكشاف بيئته والتفاعل معاها بيزيد وده من الحاجات الأساسية لفلسفة مونتيسوري.
رابعًا: الدولاب لازم يكون مفتوح عبارة عن أرفف خشبية وأدراج ومن غير ضلفة ومناسب لطوله عشان يقدر الطفل يوصل للبسه بسهولة ويعتمد على نفسه بدري.
خامسًا: يفضل إننا نحط مراية بالعرض جنب السرير وفي مستوى طول الطفل وبتكون كبيرة علشان تسمح للطفل يتأمل نفسه ويتابع حركته ويبني علاقة مع نفسه.
سادسًا: لازم نراعي معايير السلامة تمامًا في غرفة نوم المونتيسوري لإنه الفكرة كلها إن الطفل يعرف يعمل كل حاجة لنفسه مع تصميم ركن مخصص للألعاب في غرفة طفلك على شكل مساحة مربعة فاضية في أحد أركان الغرفة والألعاب تكون على أرفف قصيرة عشان الطفل يوصلها ويلعب بها بكل سهولة. وفيه كمان ألعاب المونتيسوري اللي بتنمي ذكاء طفلك.
سابعًا: مهم جدًا أن يكون فيه براويز بسيطة على الحيطة متعلق جواها الأعمال الفنية والرسومات اللي الطفل عملها، نظام المونتيسوري بيعتمد على البساطة والفن والجمال البصري. كمان مهم إن يكون في غرفة طفلك مكتب صغير وكرسي يناسب حجمه عشان يقدر يستخدمهم ويكون متاح فيه بعض الألوان والورق الأبيض وساعديه في رسم الأشكال وتلوينها.

ودلوقتي هنسيبك تتفرجي على أفكار كتير لغرف الأطفال على طريقة المنتسوري