محتويات المقال
إيه هو نوع بشرتك؟ سؤال بسيط لكن إجابته مش سهلة، والسبب للسعي إننا نوصل للإجابة الصحيحة بيكون علشان نعرف ازاي نقوم بالعناية بالبشرة. وبمجرد إنك تعرفي إيه اللي بتدوري عليه، وتعرفي إيه المعلومة الصحيحة والعلمية، هتلاقي إن الموضوع بقى سهل جدًا عليكي. علشان كده، هنا هنقدم لك دليل سريع لتحديد نوع بشرتك علشان لما تقرري تهتمي بيها، تعملي ده بالشكل الصحيح وتحصلي على البشرة اللي بتحلمي بيها وتستحقيها.
أولًا: فيه أربع أنواع من البشرة: العادية والجافة والدهنية والمختلطة. هتلاقي ناس بتقول لك فيه نوع خامس اللي هو بشرة حساسة، بس البشرة الحساسة حالة طبية ممكن تصيب أي نوع بشرة، ولا تصنف كنوع بشرة في حد ذاته. وبالتالي وده من حسن حظنا إنها حالة مؤقتة. يعني عادي جدًا إن تلاقي عندك نوع معين من البشرة مصحوب بحالة جلدية زي حب الشباب أو الحساسية فيها. وعلشان تكون عندك صورة كاملة، لازم تعرفي إن نوع بشرتك بيتحكم فيه بشكل كبير عوامل مختلفة، زي السن والنظام الغذائي والحالة الصحية وحتى الأحوال الجوية. علشان كده، مهم تعرفي أنواع البشرة، وتحددي نوع بشرتك وبالتالي الطريقة الأمثل لرعايتها.
-
أنواع البشرة:
-
البشرة العادية
البشرة العادية بشرة جميلة جدًا وسهل العناية بيها، بتتميز إنها طبيعية ومتوازنة، فهي مش جافة جدًا ولا دهنية جدًا. ده غير إنها ما فيش فيها عيوب، ولو وجدت هتكون قليلة. مش حساسة، مساماتها صغيرة جدًا، تكاد تكون غير مرئية. متألقة ونضرة، وهي نادرة على فكرة.
-
البشرة الجافة
البشرة الجافة بتكون متقشرة وخشنة الملمس، وأوقات بيكون لونها باهت شوية. غالبًا مسام الجلد مش هتكون باينة قوي، لكن غالبًا بتظهر فيها الخطوط الدقيقة واضحة.
لو بشرتك جافة بتحسي بإيه؟
البشرة الجافة خشنة أوقات في بعض الأماكن، وأوقات بتحسي بأنها مشدودة بعد التنظيف. لو كانت بشرتك جافة، فتوقعي إنها تكون معرضة للتهيج والحساسية. طيب إيه هي العلامات التانية للبشرة الجافة؟ ممكن تحسي بأنها قاسية ومشدودة خاصةً لو كنتي بتستخدمي منتج التنظيف الغلط، وممكن تكون متقشرة. وهتحسي إن تأثير أي مرطب بتستخدميه مش بيدوم غير لساعات قليلة بس.
أسباب جفاف البشرة
البشرة السليمة أو العادية بتحتوي على زيوت طبيعية بتتولى مهمة الحفاظ على البشرة ناعمة ونضرة، والاحتفاظ بترطيب البشرة ومنع تهيّجها. البشرة الجافة بتحتوي على مقدار زيوت أقل من البشرة الطبيعية. ومع العوامل البيئية الزي الرياح والبرد والتلوث وحتى الهواء الساخن، بتتجرد البشرة من الرطوبة الأساسية، واللي بيحصل إن بشرتك بتتساب في حالة جفاف وخشونة وحالة سيئة.
-
البشرة الدهنية:
أهم علامات البشرة الدهنية هي الوجه اللامع خصوصًا عند منطقة T-zone اللي هي الجبين والأنف والذقن، مع شوية مسامات واسعة باينة جدًا، وشوية بقع كده على الماشي، بالإضافة طبعًا إنك هتلاقي صعوبة في الحفاظ على المكياج لوقت طويل.
لو بشرتك دهنية بتحسي بإيه؟
بيكون ملمس سطح البشرة الدهنية دهني جدًا ومليان زيوت وسهل تحسي بالأتربة المتراكمة على بشرتك، يعني نادرًا ما هتشوفيها جافة أو مشدودة.
إيه أسباب البشرة الدهنية؟
في الطبيعي، بيحتوي الجلد على زيوت طبيعية بتحافظ على البشرة مرنة وناعمة، بجانب إنها بتحافظ على ما يسمى بالحاجز الدهني في حالة جيدة. فاللي بيحصل لما يزداد نشاط الغدد الدهنية، بفضل تغير مستويات الرطوبة، فهرموناتنا وحتى الإجهاد بيخليها تفرز زيوت كتير بشكل زائد يخلّي شكل البشرة بيكون لامع. ده بجانب سد مسام البشرة.
-
البشرة المختلطة:
لو بشرتك مختلطة، فهتلاقي إنها دهنية في منطقة T-zone (الجبين والأنف والذقن)، ومعرضة لظهور بقع جافة خاصة عند الخدين. ومسام الأنف أكبر من مسام الخدين.
لو بشرتك مختلطة بتحسي بإيه؟
زي ما قولنا قبل كده، هتحسي إن منطقة T-zone (الجبين والأنف والذقن) دهنية الملمس، ومنطقة الخدين جافة ومقشرة ومشدودة.
إيه أسباب البشرة المختلطة؟
بشرة مختلطة يعني أن عندك نسيجين أو أكثر مختلفين في تكوين وجهك. يعني ممكن تكون المسام الموجودة على الأنف والذقن والجبين نشيطة جدًا في إفراز الدهون، وبالتالي بيظهر اللمعان. وفي نفس الوقت، بتكون المسامات على خديك أقل نشاطًا، وأوقات ممكن تحسي بالجفاف، ممكن لبعض المرطبات أن تسد المسام، وأنواع تانية تكون عامل لزيادة ظهور العلامات دي، بالإضافة طبعًا إلى التعرض للشمس والتوتر وقلة ممارسة الرياضة.
طيب دلوقتي بعد ما حددنا كل نوع من أنواع البشرة، جات فقرة الاختبار، اللي من خلالها هتتأكدي من نوع بشرتك، وبالتالي هتقدري تعتني بيها بالشكل الصحيح.
اختبار :ازاي اعرف نوع بشرتى:
لو كنتي محتارة في تحديد نوعية بشرتك حتى بعد كل العلامات اللي قلتها فوق، يبقى انتي محتاجة تقومي بالاختبار ده:
- اغسلي وجهك كويس من المكياج أو الزيوت باستخدام الماء وغسول الوجه المناسب لها. وبعد كده، جففيه بلطف باستخدام فوطة ناعمة ونظيفة. سيبي وجهك لمدة ساعة كاملة من غير وضع أي كريم أو مكياج عليه.
- دلوقتى اقفي أمام المراية، امسكي منديل ناعم واضغطي من خلاله على كل المناطق في وجهك زي الجبين، والأنف، والجبهة، والذقن، والخدود. شوفي آثار كل منطقة بدقة على المناديل، وبعدها هتقدري على تحديد نوع بشرتك حسب النتائج اللي ظهرت لك.
- لو كانت بشرتك من النوع الدهني فهتلاقي آثار الزيوت الدهنية في مناطق الأنف والجبين والجبهة والذقن.
- إذا كانت بشرتك مختلطة فهتلاقي آثار الدهون في مناطق الأنف والجبين أما باقي مناطق الوجه زي الذقن والخدود فهتلاقيها جافة.
- لو كانت بشرتك من النوع الجاف فمش هتلاقي آثار للدهون،هتلاقي المناديل جاف تمامًا لكن هتلاقي شوية قشور بيضاء دلالة على جفاف البشرة وتقشرها.
- أمّا إذا كانت بشرتك من النوع العادي فسوف تبقى المناديل نظيفة تمامًا، بحيث لن تجدي أي آثار للدهون أو القشور عليها أبدًا.
طريقة العناية بكل نوع بشرة:
- البشرة الدهنية: بتظهر عليها طبقة ومسام واسعة، ولكن أصحاب النوع ده من البشرة بينعموا بتأخير ظهور التجاعيد عليها. للتخفيف من إفرازات الدهون، استخدمي ماسك الطين الأبيض اللي هتلاقيه في محلات العطارة، لإنه مصنوع من خليط الطين من الأعشاب والتوابل زي الكركم، والشبة، والبابونج، والطحالب البحرية. اخلطي شوية منه مع ماء الورد وكام نقطة من عصير الليمون، افرديه على بشرتك وسيبيه لحد ما ينشف، وبعد كده، افركيه لإزالته عن البشرة. استخدام الماسك ده بشكل دوري يخفف من إفرازات البشرة وبيحافظ على نقائها.
- البشرة المختلطة: بتختلط فيها مميزات البشرة الدهنية بمميزات البشرة الجافة. اهتمي بها بواسطة قناع الزبادي اللي بيحتوي عادة على بكتيريا نافعة جدًا بالإضافة إلى مواد مغذية ومرطبة. ضيفي كام نقطة من ماء الورد إلى نصف كوباية من الزبادي وافردي الخليط ده على بشرتك، سيبيه لمدة 15 دقيقة، وبعد كده اغسليه بمياه فاترة.
- البشرة الجافة: في العادي، بتكون صافية وخالية من حب الشباب، ولكنها بتفتقر للترطيب اللي بيحافظ على نضارتها ويحميها من الشيخوخة. استخدمي ماسكات غنية بالزيوت والمواد المغذية، جربي قناع الموز المهروس مع ملعقة صغيرة من زيت الزيتون وملعقة صغيرة من العسل. سيبي الماسك على البشرة لمدة 15 دقيقة. وبعد كده، اغسليه.
- البشرة العادية: مظهرها في العادي دايمًا صحي ومتوازن، ولكنها أكيد بتتأثر بالعوامل الخارجية المرتبطة بالظروف المناخية وبالعوامل الداخلية المرتبطة بالنظام الغذائي، واللي ممكن تحولها إلى جافة أو دهنية. اهتمي بيها من خلال استخدام دوائر الطماطم عليها أو حضري ماسك الطماطم والدقيق من خلال إضافة 4 معالق من عصير الطماطم لملعقتين من الدقيق. افرديهم على بشرتك علشان تمديها بالكولاجين الطبيعي اللي هيحافظ على نضارتها.
نصائح لتنعمي ببشرة نضرة:
الحفاظ على نضارة البشرة بيتطلب مجهود يومي وتبني روتين تجميلي يناسب طبيعتها. ولكن افتكري دايمًا: إن البشرة اللي بتعاني من العيوب والمشاكل أو آثارها بتحتاح إلى عناية خاصة أكتر من اللي بتحتاجها البشرة الخالية من أي عيوب أو مشاكل.
علاج عيوب ومشاكل البشرة مهما كانت مستعصية، أسهل بكثير من علاج الآثار الناتجة عنها. علشان كده، ما تنتظريش تفاقم أي مشكلة بتعاني منها بشرتك، وارجعي لطبيبك بسرعة علشان الحل المناسب لها.
المواد الطبيعية والمنزلية طريقة كويسة وناجحة في العناية ببشرتك، ولكن بعضها بيحتاج إلى وقت أطول للحصول على النتيجة المرغوبة، بالإضافة إلى أن اختيار الطريقة الطبيعية للعناية بالبشرة لازم يتم بدقة لضمان التأثيرات التي تعمل عليها هذه المواد، وعدم الحصول على نتائج عكسية.
المصادر
www.healthline.com
www.nectarusa.com
www.sevenminerals.com
التعليق باستخدام حساب فيس بوك