الولد الصغير اللي مستخبي في حضني فجأة كبر وبقى أطول منه وكمان بدأ يبان له شنب صغير يخض كده! كبر إمتى وازاي محدش متخيل. المشكلة كمان إنه ممكن يكون كبر من غير ما يعرف عن نفسه والتغيير الكبير اللي بيحصله ده حاجة، وأوقات إحنا بنتخيل إن الطفل هيعرف أوتوماتيك لما يعدي بتجربة البلوغ أو الموضوع مش محتاج كلام. ودي حاجة تكسف ما أقدرش اتكلم فيها أو نفضل نأجل فيها لحد ما نكتشف إنه عارف كل حاجة من بره ويا ترى صح ولّا غلط؟ هنقول لك ازاي وامتى تكلمي ابنك الولد عن البلوغ.
إمتى مفروض أكلم ابني عن البلوغ ومين اللي يكلمه؟
بداية من سن 10 سنين، محتاجة أبدأ أفتح الموضوع تدريجي مع الطفل وأعرّفه التغييرات اللي هيعدي بيها خلال السنين الجاية. وبالنسبة للولاد، يفضل إن الأب هو اللي يتكلم مع الولد عشان يكون عدى بنفس التجربة ويحكي له عن نفسه ومشاعره كمان وقتها وده هيساعد في الراحة في الكلام لو كان فيه كسوف. لكن لو الأب مش موجود أو مش مستعد يتكلم، فدور الأم مهم جدا هنا وما فيهوش أي مشكلة إن هي اللي تتكلم مع الطفل وتجاوب علي كل أسئلته.
نقول إيه وإزاي؟
-
التدرج أساسي
مش قعدة واحدة ومحاضرة طويلة نصدم بيها العيال ونقوم نجري، مهم إننا نمهد تدريجي ونبقي بادئين في التربية الجنسية من بدري، ونستغل فرصة أي حوار بيننا عن ظهور الشعر في الجسم مثلًا أو عن إن صوتك هيتخن بحيث إنه يبدأ يسألنا ويتعرف على مصطلح البلوغ نفسه.
-
شكل الجسم والنضافة الشخصية
وقت البلوغ اللإيد والرجل بيكبروا وبيبدأ ظهور الشعر في الجسم وكمان ملامح الوش بتبدأ تتغير وبنقول عليها بمصطلحاتنا “بدأ يخنشر”. وهم يا حبايبي أطفال كتير ثقتها في نفسها بتتهز بسبب التغييرات ده، فمهم أكون معرفاهم إن ده فترة مؤقتة وإن ده نمو طبيعي ومهم للجسم. وأساعدهم كمان بطرق جديدة يحافظوا بيها على نظافتهم الشخصية ويتعاملوا مع الشعر والعرق والحبوب.
-
كل حاجة بتتغير
مهم واحنا بنتكلم مع الطفل عن التغييرات اللي هتحصل في جسمه نأكد إن التغييرات ده مش بس جسدية لا كمان في تغييرات نفسية وتغييرات في التفكير وهرمونات ممكن تأثر على الموود ونفهمهم بطريقة علمية ليه ده بيحصل، وما ننساش كمان نعرفهم بأن زي ما بيحصل لهم تغييرات، فالبنات كمان بيعدوا في المرحلة ده بصورة مختلفة.
-
الاحتلام والاغتسال
من أساسيات التعليم عن البلوغ إن الطفل يبقي متهيأ نفسيا إنه ممكن يصحي من النوم في يوم يلاقي لبسه مبلول، فلازم يعرف إن ده علامة البلوغ وإن ده شيء طبيعي، ويتعلم إزاي الطريقة الصح للاغتسال بعدها.
-
الحب والمشاعر
ماننساش بقى واحنا بنتكلم مع ولادنا عن البلوغ نعرفهم إننا متفهمين جدًا إن مشاعرهم بتكبر كمان وبتتغير وإن هيبقى فيه إنجذاب من نوع جديد ناحية البنات، وده عادي ومقبول طول ما هو جوا حدودنا وقيمنا.
والأهم في كل ده، إننا نفضل مركزين إننا نحافظ على علاقة صداقة مريحة بينا وبين الولاد لأنهم بيكونوا متلخبطين وتايهين في الفترة ده ومحتاجيننا في حياتهم أصحاب أكتر بكتير من أي دور تاني.
التعليق باستخدام حساب فيس بوك