لما بيكون عندك تعلق غير آمن ممكن تلاقي نفسك تجنبية بتبعدي عن العلاقات الحميمة، أو تبقى قلقانة و “لازقة”.
ممكن تكوني قرأتي قبل كدة عن تأثير صدمات الطفولة على الإنسان.. صدمات الطفولة ساعات بتخلي الإنسان يعيش في دور الضحية أو يبقى جاني بيأذي غيره.. صدمات الطفولة ممكن تخلي الإنسان ما يعرفش يعبر عن مشاعره ويستخدم العنف السلبي بدل ما يواجه.. صدمات الطفولة ممكن تخلي الشخص ما يعرفش يقول لأ.. كل ده ممكن تكوني عارفاه.. لكن إللي محتاجة تعرفيه كمان إنه صدمات الطفولة هتأثر على علاقاتك لما هتكبري.. خصوصا العلاقات الحميمة مع الناس القريبيين.
قرأنا قبل كدة عن نظرية التعلق وفهمنا إنه علاقتنا بالأم وإحنا صغيريين أو بمقدم الرعاية الأول بتأثر على علاقتنا وإحنا كبار وعرفنا إنه فيه 3 أنواع من التعلق: التعلق الآمن والتعلق التجنبي والتعلق المضطرب القلق.
اعرفي أكتر عن نظرية التعلق
الناس إللي طفولتهم مكانش فيها صدمات هتلاقي نمط التعلق بتاعهم آمن وده معناها إنه متوازنين في علاقاتهم.. لا “بيلزقوا” في الشخص اللي معاهم زي أصحاب النمط القلق ولا بيزقوا الناس بعيد عنهم زي أصحاب النمط التجنبي.. ومش معنى كدة إنه اصحاب التعلق الآمن ما عندهمش مشاكل في علاقاتهم .. أكيد ممكن يكون عندهم مشاكل لكن مشاكلهم مالهاش علاقة بإنه نمط التعلق بتاعهم غير صحي.
لو أهلنا كانوا بيرفضونا وإحنا صغيرين ومهملين تمامًا لطلباتنا وبالذات العاطفية ففيه فرصة كبيرة إننا نكوّن نمط تعلق تجنبي
Avoidant Attachment Style
لو إنتي نمط التعلق بتاعك تجنبي هتلاقيكي بتخافي من العلاقات الحميمة أو بتحافظي على مسافة عاطفية بينك وبين إللي بتحبيه.. غالبا هتبقي بترتاحي أكتر وإنت بتداري مشاعرك وهتلاقي عندك أسرار كتيرة وهتلاقي إنك بتحسي إنك مش مرتاحة لما الطرف التاني بيتكلم عن مشاعره أو بيطلب منك تتكلمي عن مشاعرك ومع كل ده هتلاقي نفسك خايفة من الوحدة وحابة إنه يكون ليكي شريك حياة لكن مش عايزة حد لازق فيكي ومهتم قوي.
لو أهلنا كانوا بيعاملونا معاملة فيها لخبطة، شوية فيها حنية واستجابة لمشاعرنا، وشوية فيها إهمال وعنف وقسوة ففيه فرصة كبيرة إننا نكوّن نمط تعلق قلق
Anxious Attachment Style
لو إنتي نمط التعلق بتاعك قلق هتلاقيكي بتخافي تبقى لوحدك ومحتاجة دايمًا تكوني في علاقة ودايمًا محتاجة تكونة قريبة من شريك حياتك وهتبقي دايما “لازق فيه ” وهتبقي علطول خايفة ليخونك أو يبعد عنك. ودايمًا هتحسي إنه الطرف التاني وكإنه بيبعد عنك أو مش عارف يتواصل معاكي بالشكل إللي إنت عايزاه.
طيب بعد ما قرأت الكلام ده اعمل إيه ؟
معرفتك بأنماط التعلق ممكن تساعدك
دلوقتي بعد ما عرفتي نمط التعلق بتاعك ونمط التعلق بتاع شريكك (سواء كان آمن أو تجنبي أو قلق) هتقدري تفهمي إنت ليه بتتصرفي كدة وهو ليه بيتصرف كدة، وهتقدري تعرفي طبيعته ولما يعمل تصرف مش هتقولي لنفسك هو ما بيحبنيش هتقول لنفسك إنه طبيعته كدة وإنتي كمان هتلاقي نفسك بتاخدي بالك من حاجات في تصرفاتك ماكنتش فاهماها.
إنك تتكلمي مع شريكك عن نمط تعلق كل واحد منكم ممكن يساعد برضه
إنكم تتكلموا سوا عن نمط تعلق كل واحد فيكم ده هيساعدكم جدًا،، هتفكروا بعض.. لو مثلا شريكك بيعمل تصرفات فيها قلق وشاكك فيكي ولازق فيكي بزيادة هتقدري تفكريه إنه يحجم نفسه شوية .. ولو شريكك تجنبي وانعزالي هتقدر يتفكريه يحاول يعبر عن مشاعره شوية أكتر والهدف إنكم تقربوا من ستايلات تعلق بعض شوية بشوية وتفهموا بعض.
حاولي تدور يعلى شريك نمط التعلق بتاعه ماشي معاكي إلى حد ما
طبعا أحسن علاقة في الدنيا بتكون بين اتنين نمط تعلقهم آمن.. لكن ده مش سهل يكون موجود وعادة ما بتمشيش كدة.. بعد ما فهمتي أنماط التعلق حاولي تختاري حد نمط التعلق بتاعه مختلف عنك شوية وكمان حدته تكون مقبولة بالنسبالك.. يعني لو إنت تجنبية وارتبطت بشريك تجنبي هيبقى فيه مشكلة كبيرة في التواصل، ولو إنتي نمط تعلقك قلق وارتبطتي بواحد نمط تعلقه قلق برضه هتبقوا مقضيين حياتكوا جري ورا بعض وشك في بعض وخناق.. فيفضل تختاري حد نمط التعلق بتاعه متناسب معاك.
صدمات الطفولة بتتعالج.. اشتغلي عليها
أثبتت الدراسات إنه على الرغم من إن صدمات الطفولة بتغير حاجات في المخ إلا إنه ممكن بناء مسارات عصبية جديدة بمعاني جديدة في مخنا. معرفتك بنمط التعلق بتاعك وملاحظتك لتصرفاتكم وتصرفات شريكك ممكن تفرق معاك جدا ومع الوقت تلاقوا نفسكم بقيتوا بتتصرفوا بشكل مختلف جوة العلاقة.
التعليق باستخدام حساب فيس بوك