التحديات في زماننا دلوقتي بقت بتظهر كل يوم زيادة عن اللي قبله وبنواجهها في تربية ولادنا أكتر بكتير من الجيل اللي قبلنا، الحقيقة أنا كمان باشفق علي جيل الأطفال دلوقتي مين اللي بيشوفوه ولسه هيشوفوه في زمنهم المنفتح اللي مليان إغراءات. وفي رإيي الشخصي، أكتر حاجة ممكن تسندنا وتسندهم في حياتهم هي تمسكهم بالدين وقربهم من ربنا. سواءً كانت ديانتهم إسلام أو مسيحية، فحبهم لربنا وارتباطهم بدينهم وروحانياتهم هو اللي يمكن هيتطمننا عليهم شوية ويساعدهم يكونوا حاطين حدود لنفسهم.
ده غير إن الدراسات الحديثة في علم النفس الإيجابي أثبتت إن من أهم صفات الإنسان السعيد واللي قادر يفعل المشاعر الإيجابية اللي تضمن له صحة نفسية أحسن هي إنه يكون “متدين”. آه والله، الدراسات بتقول إن كل ما الروحانيات كانت أعلى، كل ما الإنسان بقى أسعد.
تعريف الأطفال بالدين وتبسيطه
- أول ست سنين في حياة الطفل، مهم قوي إن كلامنا في الدين وعن ربنا يكون كله ترغيب وكلام عن حب ربنا لينا، وعن نعمه اللي مغرقانا، من غير ما نتكلم نهائي عن النار أو العذاب أو تخويف من غضب ربنا، لإن خيال الأطفال الواسع ممكن يخليهم يتخيلوا النار والعذاب والعقاب بصورة مجسمة ترعبهم أو تنفرهم من الدين والروحانيات وأي حاجة لها علاقة بربنا.
- مفيد قوي كمان إننا نربط الحاجات الحلوة اللي في حياتنا بشكرنا لربنا عشان يتعودوا من بدري على فايدة حمد النعم وعلى فكرة وعد ربنا لينا إنها بتزيد كل ما بنشكره.
- على سن 3 سنين، نقدر نبدأ نحكي القصص اللي لها علاقة بالمناسبات الدينية وقصص الأنبياء، وممكن بعد شوية نعمل مع بعض مسابقات ونسأل بعض أسئلة عن المعلومات الدينية اللي اتعلمناها، بحيث إنهم يعرفوا ويركزوا فيها وتفضل مربوطة في مخهم بذكريات حلوة.
- بعد كده، نبدأ نعلمهم الأذكار والأدعية البسيطة زي دعاء النوم ودعاء الأكل في الدين الإسلامي أو التسبحة في الدين المسيحي.
- نربطهم نفسيًا كمان بالدعاء وبأماكن العبادات والطقوس الإسلامية زي: ناخدهم معانا صلاة العيد ولصلاة الجمعة. واحنا رايحين في الطريق نحكي عن أهمية يوم الجمعة عند المسلمين، أو ناخدهم الكنيسة ونحكي لهم عن أهمية وجودنا في الكنيسة والراحة اللي بتحصل لنا لما بنكلم ربنا حتى لو مش شايفينه.
- أهم نقطة في ارتباط الأطفال بدينهم وبعقيدتهم هي الإجابة على أسئلتهم كلها من غير توتر أو قلق أو جمل زي “إزاي تقول كده عن ربنا؟/حرام تسأل سؤال زي ده!”، حتى لو فيه أسئلة حسينا وقتها إننا متثبتين ومش عارفين لها إجابة يبقي نقولهم أنا محتاجة اشوف إجابة سهلة أقدر أوصلها لك فهاسأل وارد عليك.
وآخر وأهم حاجة هي إننا نعيش الحالة اللي عايزين ولادنا يكبروا عليها، يشوفونا بندعي ونتصدق وبنصلي ونقرا القرآن والإنجيل، يشوفونا بنعامل الناس بطيبة وتسامح ونحكي لهم إننا بنعمل كده عشان بنحب ربنا وهو بيحب يشوفنا كده، نستغل المواقف في حياتنا في كلامنا عن ربنا ورحمته وعظمته في مخلوقاته من الحيوانات والنباتات.
عشان نقدر نبني في ولادنا قاعدة عريضة من حبهم وارتباطهم بربنا ولجؤهم ليه أي وقت واللي هنقدر نبني عليها حبهم لدينهم وارتباطهم بروحانياته.
التعليق باستخدام حساب فيس بوك