إزاي نفطم البيبي من التتينة (اللهاية)

وإحنا بنحضر شنطة الولادة لأول طفل بنشتري له تتينة (لهاية)، من غير ما نعرف هنستخدمها إزاي وإمتى، وبدون ما نعرف كمان إذا الطفل هيتقبلها ولا لا، ورغم إن أطباء وخبراء بيقولوا إن لها آثار سلبية على صحة الطفل، لكن دايمًا بنحس إننا منقدرش نعيش من غيرها.

وده حقيقي، وخصوصًا في الفترة الأولى بعد الولادة، لأن الوظيفة الأساسية للتتينة هي تهدئة الطفل، سواء قبل النوم أو على مدار اليوم، ولأن الطفل في السن ده عامل التهدئة الأساسي له غير حضن الأم، هو الرضاعة، فالفترات اللي بيكون شبعان فيها بنديله التتينة علشان يهدى وتقدر الأم تاخد لها وقت تفصل شوية.

أفضل طرق تجفيف لبن الثدي وقت الفطام

وعلى أد ما التتينة مريحة وقت الاستخدام، إلا إن من سلبياتها الأساسية هو وقت الفطام منها، زي الفطام من الببرونة والرضاعة الطبيعية، ودي الفترة اللي بتخوف أغلب الأمهات، لأنك بتسحبي من طفلك وسيلة تهدئة أساسية له، علشان كده النهارده هنقولك على طرق فطام طفلك من التتينة أو اللهاية على حسب ما بتسميها:

في 3 طرق لفطام الطفل من التتينة:

• طريقة بطيئة.
• خطة 3 أيام.
• الطريقة المفاجئة.

الطريقة البطيئة:

• هي الطريقة التدريجية، وأكيد محتاجة صبر لأنها هتاخد وقت، ومحتاجة قواعد أساسية تمشي عليها، زي مثلا إن مش هناخد التتينة معانا برا البيت، أو مش هناخدها في النهار خالص وهناخدها وقت النوم بس، وهكذا..
• فهمي طفلك لو كبير شوية ويقدر يدرك معنى كلامك، إنه بقى كبير ولازم يوقف استخدام التتينة لأنها مخصص للأطفال مش للكبار.

الطريقة السريعة:

وهي خطة الفطام لمدة ثلاثة أيام، وهي بتشتغل على نفسية الطفل:

1. اليوم الأول: بلغي طفلك إنكم هتبطلوا تستخدموا التتينة في يوم كذا مثلا، وحاولي تكون لهجة كلامك إخبارية مش إنك بتسأليه أو تستأذنيه.
2. اليوم الثاني: قولي لطفلك تاني وكرري عليه معلومة التخلي عن التتينة وحاولي تقنعيه.
3. اليوم الثالث: وده أصعب يوم، لإنك هتمنعي استخدام التتينة تمامًا، طبيعي إن تحصل نوبات غضب وأوقات انهيار، بس حاولي تسليه بحاجات تانية، زي لعبة بيحيبها أو مكان أو تواصل مع حد بيتسلى معاه، أهم حاجة في الخطوة دي إنك متستسلميش لانهيارات طفلك، لإنك لو رجعتي للتتينة تاني هترجعي لنقطة الصفر.

الطريقة المفاجئة:

وبيسموها “طريقة الديك الرومي البارد” وبيتقال الاسم ده على أي حاجة الإنسان بيدمنها وبيبطلها فجأة، والطريقة دي مربكة للطفل وأكيد هتأثر عليكي إنتي كمان كأم.

وفي الآخر بنفكرك إن رحلة الأمومة رحلة ممتعة مع إنها مش سهلة، وفيها محطات صعبة زي الفطام، لكن الحلو فيها إنها بتعدي وبتبقى اللحظات الحلوة.

المصادر:

healthline

webmed

Cleveland Clinic

new health guide