“أقول لابني إزاي إن جدته اتوفت؟ كان متعلق بيها جدا” أو “أبلغ ولادي إزاي بوفاة باباهم؟” أو ” مش عارفه نفهم الأطفال فكرة الموت ببساطة إزاي؟ ”
أسئلة جات لنا من أمهات فقدوا حد عزيز عليهم وكان اللي بيصعب الحزن هو الطريقة اللي هيوصلوا بيها الخبر لأولادهم. موضوع تقيل على الروح بس مهم جدًا لصحة ولادنا النفسية بما إننا إحنا اللي مسؤولين عن تشكيل أفكارهم عن الحياة.
علشان كده هنقول لك شوية نصايح مناسبة لإزاي نفهم الأطفال فكرة الموت في كل الأعمار لكن طبعا لو الأطفال أكبر من 9-10 سنين، أسئلتهم هتكون أكتر فممكن نستخدم معاهم نفس النصائح بس نزود عليها التفاصيل اللي يفهموها وتكون مناسبة لسنهم.
ازاي أتكلم مع ولادي عن فكرة الموت؟ وازاي أبلغهم بوفاة حد قريب منهم؟
- أهم و أول حاجة محتاجة تقوليها هي الحقيقة، نقول أنه كل واحد لما حياته بتخلص وبييجي الوقت اللي المفروض يموت فيه، بيموت، وبيروح الجنة عند ربنا. بلاش أبدًا نقول كلام زي إن الشخص اللي اتوفى نايم على طول أو مرتاح لإنهم ممكن يخافوا من النوم.
- مهم إنك ما تكلميهوش عن القبر وما تتكلميش عن الموت أنه شيء وحش ومخيف لأنه جزء من حياتنا ومش مفروض يخافوا منه.
- اللي هيتكلم معاهم، لازم يكون بيتكلم وهو متماسك من غير انهيار، لازم نبرة الصوت تكون هادية وثابتة ومطمئنة.
شوفي هنا .. إزاي أحمي ابني من التحرش الجنسي في المدرسة؟
طيب نقول إيه لأولادنا واحنا بنعرّفهم خبر الوفاة؟
- قبل ما نبتدي نتكلم ونشرح فكرة الموت للأطفال، هنتكلم عن ربنا سبحانه وتعالى وعن الجنة بشكل بسيط وجميل وأد إيه فيها نعيم ونحكي عن ربنا وأد إيه بيحبنا وبيدي لنا نِعَم كتير في الدنيا وكمان حضّر لنا حاجات أحلى بكتير من اللي عندنا دلوقتي في مكان جميل اسمه الجنة ووعدنا إننا هنتبسط هناك وعشان هي مكان جميل فالناس بتروح لها بالدور لما عمرها بيخلص. لما الدور بييجي على حد مننا، ربنا بينده له عشان ندخل الجنة.
- بعدين نكمل ونقول إن الشخص المتوفى جه دوره عشان يدخل الجنة وأكيد هيوحشنا جدًا. ومفيش مشكلة إنه يوحشنا. بس ممكن ندعي له كتير وهو هيسمعنا وهيتبسط بكل الحاجات الكويسة اللي إحنا بنعملها.
- لازم نحاول نشرح لهم شكل حياتهم في الفترة الجاية لو وفاة الشخص دا هتأثر على حياتهم بشكل مباشر. ولو مش هم اللي هيتأثروا، يبقى نتكلم عن الشخص اللي هيتأثر ونطمنهم عليه ونقول لهم إنه هيبقى كويس وهيعمل إيه وهيعيش إزاي.
- لازم كمان تشجعيهم يعبروا عن مشاعرهم ويحزنوا بطريقتهم لأن جزء كبير من تخطي الأزمة هو التعبير عن مشاعر الحزن وممكن الطفل يعبر عن حزنه بالكتابة أو بالرسم أو بتجميع صوره مع المتوفى ويعمل بيهم ألبوم.
- توقعي بعض التغيرات في سلوكيات الطفل بعد وفاة شخص قريب منه، بالذات لو حياته هتتغير بشكل أو بآخر. بس لو لاحظتي تغييرات سلوكية أو مزاجية واضحة على الطفل لمدة أكتر من 6 شهور، ممكن تطلبي مساعدة أخصائي نفسي للأطفال.
هنا ممكن تشوفي أشهر أماكن العلاج النفسي وأفضل أطباء نفسيين للأطفال في القاهرة
وأخيرًا بننصحك أنك ما تخافيش عليهم من مشاعر الحزن، لأنها هتساعدهم يكونوا مستعدين أكتر في المستقبل إنهم يتعاملوا مع الأزمات بشكل إيجابي.
هنا ممكن تشوفي .. كيف نعد أطفالنا منذ الميلاد لمرحلة الحضانة؟
التعليق باستخدام حساب فيس بوك