تعليم الأطفال وتعويدهم على الالتزام في الصلاة من الحاجات اللي بتاخد وقت طويل وسنين على ما نقدر نوصل لنتيجة ونتطمن عليهم إنهم قدروا يتعودوا ويلتزموا بالصلوات الخمس. أما بقى صلاة التراويح ليها وضع تاني. نعودهم ازاي على عدد الركعات الكبير ده واللي بيبقى شهر واحد في السنة ويا سلام بقى لو حابين كمان ننزل بيهم المسجد ويصلوا معانا. علشان كده في المقال ده هنعرف سوا إمتى بالظبط نبدأ تعليم صلاة التراويح للأطفال.
إيه السن المناسب اللي نبدأ نعلمهم يصلوا معانا التراويح؟
سن تعليم صلاة التراويح ما يفرقش عن سن تعليمهم الصلاوات الخمس وهو سن 7 سنين، يبدا يفهم الفكرة ويمكن قبل كدة كمان نتكلم معاهم عن سبب صلاة التراويح وعدد ركعاتها وفضلها علينا.
ازاي نعلّم صلاة التراويح للأطفال؟
-
بالقدوة
أحسن وأكبر طريقة تأثيرها بيدوم هي إننا نبدأ بنفسنا، وقت صلاة التراويح نفهم الولاد احنا هنعمل إيه، نطلب منهم التلفزيون يتقفل والصوت يبقى هادي، نجهز مكان الصلاة والمصحف وفي آخر الصلاة نسمّعهم دعانا ليهم.
-
تعليم الأطفال الصلاة بالتدريج
لما الطفل يكون في السن المناسب للتعويد على الصلاة، وقت ما يدخل رمضان نزود في روتين الصلاة بتاعه ركعتين لصلاة التراويح معانا في صلاة الجماعة، ونكافئه بمفاجئة بعد فترة من الالتزام ولما يتعود نتفق معاه إننا هنزود عدد الركعات لحد ما يحب.
-
بالترغيب
من أهم الحاجات اللي بتحبب الأطفال في الروحانيات هي فكرة التجهيز بالأشياء المبهجة زي إننا نشتري إسدالات مخصوص أول رمضان شبه بعض سوا أو سجاجيد صلاة خاصة بالأطفال أو عليها أساميهم، وممكن نجهز سوا ركن التراويح في البيت ونزينه ونعطره استقبالًا لصلاة التراويح.
-
صلاة التراويح في المسجد
طبعًا من أهم ما يميز صلاة التراويح ورابطنا بيها روحانيا احنا شخصيًا من صغرنا هو الصلاة في المسجد، وعشان ناخد الأطفال المسجد ونربطهم ونحببهم فيه مهم إننا نكون محضرينهم ومعرفينهم كويس آداب المسجد. ويا سلام لو الطفل بينزل مع باباه صلاة الجمعة من قبل كده، وعارف طريقة التصرف الصح في المسجد. وممكن قبل النزول في صلاة التراويح الطويلة اللي الطفل بيكون معرض فيها للزهق والرغبة في الحركة الكتير إنك تاخدي الطفل معاكي من قبلها وإنتي بتصلي في جامع النادي مثلا، وتورّيه ازاي الناس بتلتزم بالصوت الهادي وعدم الجري أو الحركة الكتير في المسجد. وبعد ما الطفل يتعود ويتفهم الموضوع شوية ممكن تشركيه معاكي في صلاة التراويح في المسجد ونبتدي برده بركعتين ونزود تدريجي.
التعليق باستخدام حساب فيس بوك