محتويات المقال
كل سنة وقرب وقت دخول المدرسة ووقت التقديم للسنة الدراسية الجديدة، بنبدأ نشوف تساؤلات الأمهات عن أحسن سن تدخل ابنها فيه المدرسة، وأمهات محتارة هل هي كده متأخرة علي التقديم لطفلها في المدرسة، وأمهات تانية خايفة تكون استعجلت ومدخلة طفلها المدرسة بدري.
سن الالتزام
الدراسات بتقول إن أنسب سن الطفل يكون مستعد فيه لدخول المدرسة والالتزام بقواعدها هو ست سنين. وقبل كده، تعليم الطفل يكون عن طريق اللعب والرسم والألوان والأغاني، يعني سنتين الـkg هم مجرد سنتين تهيئة للطفل لدخول المدرسة الحقيقي.
أضرار دخول المدرسة بدري
فيه دراسة اتعملت في جامعة بريطانية سنة 2017 أثبتت إنه رغم إن دخول المدرسة بدري يبان أكتر حاجة مناسبة للطفل وإن الأهالي بيشوفوا تحصيل ولادهم وتركيزهم كافي ويقرروا يدخّلوا الطفل بدري عن سنه، إلا إن أضرار دخول المدرسة بدري ما بتبانش في السن الصغير، على قد ما بيبان أكتر كل ما الطفل بيكبر وبيزود التحديات النفسية والأكاديمية اللي بيقابلها في الدراسة، لإن الدراسة مش مجرد فكرة إنه يتعلم يقرا ويكتب، لكن كمان فكرة إنه يتعلم الالتزام ويتعلم يقعد فترة منتبه من غير ما يتحرك.
ده غير إن الطب النفسي أثبت إن السنة اللي أوقات بنستعجلها عشان ندخل ولادنا فيها، هي وقت طويل جدًا بيحصل فيه تغييرات ونمو كبير في عقل الطفل، وكمان بتفرق كتير في نموه النفسي واللي بيبان أكتر في فترة المراهقة.
العكس
على الرغم من كل الدراسات اللي بتحذر من الاستعجال في دخول الطفل المدرسة، إلا إن فيه تجارب كتير ناجحة لأطفال دخلت المدرسة في سن الخمس سنين وكانوا فعلًا قادرين يتعايشوا ويبقوا زي أقرانهم الأكبر منهم بسنة أكاديميًا واجتماعيًا، وده في رأيي، بيرجع لانتشار أنظمة التعليم الدولية المختلفة، ولبعض التغييرات كمان اللي اتطورت في التعليم المصري اللي خلّى جزء كبير من الدراسة بيعتمد على البحث والـprojects بدل الحفظ.
اعرفي من هنا 5 حاجات ما ينفعش تفرضيهم على أطفالك
الخلاصة
عشان كده، أكيد الموضوع مش قاعدة ثابتة، لكن وفقًا للدراسات، فبننصح الأمهات إنهم الأفضل ما يستعجلوش في دخول المدارس قبل السن المناسب، ويتخيلوا إنهم بيوفروا سنة على طفلهم، في حين إن السنة دي ممكن تأثر كتير علي الطفل بعد كده. و في جميع الحالات، سواء الطفل دخل بدري أو متأخر، فأهم حاجة ما نقارنوهوش أبدًا بأخواته أو بأصحابه، لأن كل طفل متميز بنفسه وله طريقة تحصيل وتركيز خاصة بيه، مش لازم يكون زي غيره أو زي ما احنا عايزين نشوفه.
التعليق باستخدام حساب فيس بوك