في أول أيام بعد الولادة، بيبقى صعب عليكي تفهمي ليه طفلك بيعيط، بتبقى متأكدة إنه مش جعان ومرتاح ومش خايف من حاجة. لكن مع الوقت، بتقدري تميزي سبب عياطه وكمان بتقدري تميزي صوت عياطه من بين أصوات الأطفال التانيين. إزاي مهارة تمييز السبب وتمييز الصوت دي بقت عندك؟ وإيه اللي بيحصل في مخك أول ما تسمعي صوت عياط طفلك؟ هتعرفي في المقال ده.
- فيه دراسة اتعملت سنة 2011 واتنشرت على موقع Very Well Family بتقول إن الحمل بيغير مخ الأم لمدة سنين لأنه بيزود هرمون الدوبامين بشكل كبير عشان يحضر مخها للأمومة.
- في نفس الدراسة، الباحثين اكتشفوا إن الأمهات اللي ولدوا طبيعي وبيرضعوا طبيعي بتتطور عندهم المهارة دي بشكل أكبر من الأمهات اللي ولدوا قيصري أو رضعوا صناعي، ده لأن فيه هرمون اسمه أوكسيتوسين بيتفرز مع الولادة الطبيعية والرضاعة الطبيعية وهو اللي بيأثر بشكل كبير على استجابة الأم لعياط البيبي. بس دا مش معناه إنك لو ولدتي قيصري أو بترضعي صناعي، فانتِ أقل كأم أبدًا، انتِ بس هرموناتك مختلفة.
- هرمون الأوكسيتوسين ده بينزل مع لبن الرضاعة وعشان كده بيحصل واصل بين الأم والطفل وبكده بيتخلق الترابط والتعاطف بينهم. دا بيخلي عقل الأم يميز عياط طفلها. فلو فيه أكتر من طفل في المكان، مخ الأم بيعرف فورًا لو ابنها عيط لأنه بيميزه عن الباقي.
- الأمهات بيستجيبوا لعياط الطفل في خلال 5 ثواني بس. وده بيبان سواء في السلوكيات أو في المخ. فيه دراسة اتنشرت في دورية وقائع الأكاديمية الوطنية وعرفناها من CNN الباحثين فيها عملوا رنين مغناطيسي على مخ الأمهات كشف إن فيه مناطق معينة في المخ نشاطها بيزيد لما بتسمع صوت البيبي والمناطق دي مرتبطة بتقديم الرعاية والحركة والكلام. وفي الدراسة لقوا إن استجابة مخ الأمهات بتكون في خلال خمس ثواني بس من بداية عياط البيبي.
- جزء السمع في المخ بيتنشط جدًا حسب روبرت فرومكي عالم الأعصاب في جامعة نيويورك.
- لو الأمهات كانوا بيعانوا من ضغط قبل كده في حياتهم، سواء صدمات نفسية أو أمراض عقلية ممكن ده يؤثر على تنشيط المخ اللي اتكلمنا عنه.
عياط البيبي هي طريقة من طرق تواصله معاكِ في أول أيامه، احنا عارفين إن أوقات أعصابك ما بتقدرش تتحمل عياطه، وعشان كده كان لازم نشرح لك إيه اللي بيحصل في جسمك.
مصادر ساعدتنا في كتابة المقال:
