محتويات المقال
لما واحدة بتبشرنا بحملها بعد فترة من محاولاتها في الحمل، بتقول حملت بعد ما أخدت إبرة تفجيرية، أكيد بنحرج نسألها إيه هي دي وبتعمل إيه؟
علشان كده هنقدم لكم النهاردة كل المعلومات والأسئلة اللي كل سيدة بتكون عايزه تعرفها عن الإبرة التفجيرية.
إيه هي الإبرة التفجيرية؟
الإبرة التفجيرية هي إبرة مُصنعة من هرمون الحمل بجرعات بسيطة وهو زي هرمون تاني بيفرز بشكل طبيعي من الغدة النخامية لما البويضة بيكتمل نموها واللي بترتفع نسبته جدًا قبل خروج البويضة من المبيض بـ36 ساعة.
إيه هي الحالات اللي بيلجأ فيها الأطباء لاستعمال الإبرة التفجيرية؟
في حالات تأخر الحمل سواء تم استعمال منشط للمبيض (في الأغلب) أو لا، وبعد عمل متابعة تبويض ولو لقينا بويضة مكتملة النضج وفي حجم مناسب (18-20 ملم) علشان وذلك للتأكد من خروج البويضة من حويصلتها وبالتالي زيادة نسبة حدوث الحمل بإذن الله.
إيه هي نسبة حدوث حمل مع الإبرة التفجيرية؟
الإبرة التفجيرية مكملة لوظيفة منشط المبيض وهي نفسها مش بتزود بذاتها فرصة حدوث الحمل لكنها بتأكد فعالية التنشيط، وعمومًا نسبة حدوث الحمل مع التنشيط تتراوح من 45 إلي 50 في المية في حالة إن مفيش أسباب تانية بتسبب تأخير الحمل.
إيه الوقت المناسب اللي تاخد فيه السيدة الإبرة التفجيرية؟
لما تبلغ حويصلة البويضة حجم بين 18 الي 20 ملم وده بيبان بمتابعة التبويض بالموجات الصوتية.
إيه هي أعراض الحمل بعد الإبرة التفجيرية وإزاي اعرف إنها نجحت؟
نجاح الإبرة التفجيرية يكون بخروج البويضة من حويصلتها، وده بيتضح بعمل موجات صوتية بعد أخد الإبرة بـ 36 ساعة، وبيتضح صغر حجم الحويصلة ووجود سائل بسيط حول المبيض خلف الرحم.
أما عن أعراض الحمل فبتتأخر اسبوعين بعد الإبرة وبيكون بتأخر ميعاد الدورة الشهرية أساسًا وبعض السيدات بيحسوا بارتفاع طفيف في درجة الحرارة (نص درجة بس) أو زيادة التبول أو رغبة في النوم.
هل ينفع استخدام الإبرة التفجيرية في حملين ورا بعض؟
ممكن استخدامها حسب إرشادات الطبيب ولا تؤخذ بدون متابعة للتبويض.
إيه هي أعراضها الجانبية وسلبياتها؟
-العرض الأساسي هو تضخم المبيض وتكوين أكياس متضخمة في المبيض إذا أُخذت بدون متابعة للتبويض وبدون إشراف طبي.
-ارتفاع بسيط في درجة الحرارة.
-ألم بسيط في مكان الحقن.
لو محصلش حمل بعد استعمالها، إمتى ممكن تتكرر تاني؟
ماتتكررش إلا بمعرفة الطبيب وممكن استعمالها مع تنشيط المبيض أكتر من مرة حسب الحالة واللي يقرره الطبيب.
إيه هي الأسباب اللي ممكن تتسبب في عدم الحمل مع استخدامها؟
-وجود أسباب تانية لتأخر الانجاب.
-استعمالها بدون متابعة للتبويض وبالتالي في توقيت مش صحيح.
هل في علاقة بين الحمل في توأم واستعمال الإبرة التفجيرية؟
الإبرة التفجيرية تستعمل بعد تنشيط التبويض اللي بينتج عنه غالبًا أكثر من بويضة، واللي ممكن ينتج عنها توأم بعد تلقيحها بالحيوانات المنوية.
وبنفكرك دايمًا عزيزتي بإنك لازم ترجعي للطبيب قبل استعمال أي وسائل منشطة أو لما تلاحظي أي أعراض مش طبيعية.
مع تمنياتنا لكِ بحمل آمن وسليم.
التعليق باستخدام حساب فيس بوك