شكوى متكررة بين أمهات الـ toddlers وبيتهيألي كتير مننا سمعنا نصيحة “عضّيه زي ما عضكّ” أو “اضربيه على إيده عشان يبطل” وفيه ناس جربوها ووقفت السلوك فعلًا بس هي في النهاية برضه غلط جدًا للأسف. غلط ليه؟ عشان الطفل بيتعلم بالتقليد، بيصوّر اللي بنعمله وبيبقى بالنسبة له الطبيعي والمقبول لو ضربتيه أو رديتي له اللي عمله، هيبقى ده العادي عشان نعبّر عن غضبنا وهيبقى أسلوب حياة.
ولو الطريقة دي ساعدتك على المدي القصير، فهي مضرة علي المدي البعيد، ومش لازم يخاف أو يتوجع عشان يعرف إن ده غلط!
ده تطور طبيعي في حياة الأطفال، بيبدؤوا به يكتشفوا ويتعلموا يعبروا عن مشاعرهم / عن غضبهم / بيلفتوا انتباهنا / عملوها بالصدفة أول مرة، لقوا رد فعل أوفر مننا، فعجبهم كده… إلخ.
طيب نتصرف ازاي بقى؟
مهم إننا نكون هاديين ما ندّيش رد فعل جامد، لا نصوّت ولا نزعق ولا حتى نضحك، لإن رد الفعل الأوفر بيستفزهم وبيخليهم يتمسكوا بيها أكتر. نكون firm بإننا نمسك إيديهم بالراحة (بالراحة) ونقول لهم إن كده غلط بس صوتنا وتعبير وشنا يبقى حازم ونطلب منهم يطبطبوا على اللي ضربوه أو عضوه.
نصائح عامة للتصرف مع ضرب الأطفال
- نركز لو الطفل بيسنن نكون محضرين قدامه دايمًا حاجة ساقعة يعض عليها.
- ما نشغّلش التلفزيون قدامهم على أي مشاهد فيها عنف أو ضرب، حتى لو بهزار، ونفتكر إنهم مش هياخدوا بالهم.
- نبدأ نعلّمهم بالتدريج يعبروا عن مشاعرهم بكلمات سهلة لإن عدم قدرتهم لسه على التعبير سبب كبير قوي فإنهم يلجؤوا للضرب أو العض، عشان يحاولوا يوصلوا لنا اللي عايزينه.
- لو حاسّين إنهم بيعملوا كده لفت انتباه، سيبوا موبايلاتكم وانزلوا اقعدوا جنبهم على الأرض، العبوا معاهم، اقروا لهم قصة وادوهم وقت كفاية وانتم منتبهين لهم بجد.
- آخر وأهم حاجة ما نضربهمش على إيديهم أبدًا لما يعملوا كده، كل ما كان رد فعلنا هادي وثابت في كل مرة، كل ما هنعدّي المرحلة دي أسرع وأسهل إن شاء الله.
هما في الآخر غلابة قوي والله وما يعرفوش الدنيا لسه غير من عينينا احنا لا بيعندوا ولا قاصدين يضايقونا مثلًا، دول لسه زرع صغنن يا دوب بيفتًحوا.
التعليق باستخدام حساب فيس بوك