“ماما، هو ليه كريم بيتهم كبير وفيه جنينة واحنا لا؟ أنا عايز أعيش عندهم أحسن.” أو “هي ليه صاحبتي بتلبس ماركات وانتم مش موافقين تجيبوا لي جزمة جديدة.”
ممكن في يوم من الأيام تكوني سمعتي جملة زي دي من حد من أطفالك أو لقيتيهم بيشتكوا إن أصحابهم عندهم حاجات أحسن منهم أو أغلى منهم ويبدؤوا يحسوا بعدم الرضا وبالسخط على طريقة حياتهم، وقتها أكيد هتحسي بالإحباط وبالغضب إنهم مش حاسين بقيمة حياتهم بعد كل تعبكم ده وتبدأي تتعاملي مع مشاعرهم بإنكار شديد وتهاجميهم أو تأنبيهم على طريقة تفكيرهم وإن المظاهر ده شيء مالوش قيمة وتنهي الحوار بالجملة الشهيرة “احنا مالناش دعوة بحد”. بس للأسف الجملة دي مش هي اللي هتصلح الإحساس اللي طفلك حاسس بيه ومش هي اللي هتساعده يتطور شعوره بالرضا والاكتفاء وتقبل اختلاف الناس عن بعض.
من الحاجات المهمة اللي لازم تعرفيها لما طفلك يقارن نفسه بغيره عشان تقدري تستوعبي طفلك وتقدّري مشاعره هي إن دي طبيعة بشرية موجودة في نفوس البشر كلهم باختلاف سنهم ومستواهم. طبيعة ربنا خلقها فينا إن الإنسان دايمًا يحلم بالأحسن لما يشوفه ويتمناه. وإن من الحاجات اللي بتفرق في ثقة الطفل في نفسه هي رضاه عن مستواه الاجتماعي واحنا دورنا كأمهات نساعدهم لما يقارنوا نفسهم بأصحابهم إن الشعور اللي حاسّين بيه يتحول لشيء إيجابي يساعدهم يكونوا أحسن وما يتحولش لحسد أو غيرة.
إزاي أقدر أساعد ولادي لما يتعرضوا لتحدي مقارنة نفسهم بغيرهم؟
* فهميهم إن ده طبيعي جدًا وبيّني إنك مقدرة إن نفسهم يكون عندهم الحاجة دي أو يعيشوا في مكان زي ده. ممكن تحكي لهم قصة عنك وانتي طفلة، لما حسيتي بنفس شعورهم وقارنتي مثلًا عربية باباكي بعربية الجيران واتمنيتي تكوني بتركبي العربية بتاعتهم وفكرتي في إيه وقتها عشان يحسوا إننا في مركب واحدة وإني مش باكلمهم من برج عالي.
* اسأليهم: تفتكروا ليه في فروق اجتماعية بين الناس؟ وده بيدل على إيه؟ وهل ده حاجة نقدر نغيرها ولا لأ؟ واسمعي منهم دماغهم بيدور فيها إيه واشرحي لهم الفروق بين الناس وإنهم كمان ممكن يكون عندهم حاجة مش عند غيرهم.
* خليهم يقولوا لك إيه المناطق اللي في حياتهم اللي هم متميزين فيها وراضيين عنها وإيه اللي مش راضيين عنه موجود عند غيرهم ومش عندهم. لو في حاجة تقدروا توفروها وما عندكوش فيها مشكلة، وافقوا عليها وفهموهم إيه إمكانياتكم بكل فخر.
* اسأليهم هيتصرفوا إزاي لما يحسوا ويفكروا بالشكل ده تاني؟ هل مثلًا يشوفوا إيه الحاجة المفضلة والمميزه عنهم ويبدؤوا يفكروا فيها؟ أو مثلًا يدعوا ربنا لما يكبروا يجيب بيت بجنينة زي صحابهم؟ أو يحوّشوا عشان يشتروا حاجة أغلى؟ طريقة الأسئلة في الحوار مع الأطفال أحسن بكتير من المحاضرات والمواعظ لأنها بتخلي مخهم مفتح وعندهم قابلية للتفكير والمناقشة.
* أهم حاجة توصل لهم إن كلنا بنمر بالمشاعر دي وإن طبيعي ما يكونش عندنا كل اللي عند غيرنا وما نلومهمش أو نحسسهم بالذنب عشان أفكار فكروا فيها بشكل تلقائي. وفي نفس الوقت ما نقعدش ننفخ فيهم ونقول لهم هم قد إيه أحسن بكتير من الناس اللي عندها الحاجات دي ونفكرهم باباهم بيشتغل إيه ولا ساكنين فين ولا أي حاجة تاني ممكن تعلمهم المنظرة بدل ما تساعدهم يتعاملوا مع أفكارهم ومشاعرهم.
التعليق باستخدام حساب فيس بوك