موضوع الـ co sleeping قُتِل بحثًا بقى له كتير، نساعد ولادنا إنهم يناموا؟ ولّا يعتمدوا على نفسهم؟ طب نساعدهم لحد امتى؟ طيب يناموا أصلًا في سريرهم ولّا جنبنا من أول يوم؟ كل ده بقى كوم، وإن ابنك أو بنتك يكون عندهم 8 – 9 سنين ولسه مصرّين يناموا جنبكم ويقلقوا طول الليل وما يعرفوش يناموا غير في حضنكم ده كوم.
خليني أقول إني كأم باستمتع جدًا بنومي جنب ولادي وبحضنهم الصغير ده في نص الليل وكلبشتهم فيا. بس بيفضل جوايا خناقة إنه كبر ولازم يبقى بينام في أوضته على الأقل يبقى معظم الوقت والاستثناء جنبي مش العكس. لكن بدأت ألاحظ على ابني الكبير ذو التمن سنوات إنه رجع كإنه بيبي عايز ينام جنبي بأي شكل وده حصل بعد ولادة أخوه الصغير وكنت متفهمة جدًا رد الفعل الطبيعي، لكن بعد سنتين ونص من عمر أخوه الصغير، كان لازم ألاقي حل. في المقال ده، هاقول لكم عملت وما زلت باعمل إيه عشان ابني يتعود على النوم في أوضته.
نصائح لنوم الأطفال المستقل
- الرفض يكون بلذاذة:
يعني إني لما أرفض إنه ينام جنبنا مش لازم يكون بقفش ومحاضرات إنه بيتدلع أو كبر و”عيب عليك” وبتاع، لإن ده بيحسسهم بالرفض وبيخليهم يتحايلوا بكل الطرق عشان يتطمنوا ويثبتوا لنفسهم عكس كده. فلما نرفض، نراعي إن كلامنا يكون باين فيه تفهم لرغبتهم دي وإننا كمان بنحب نتدفي بحضنهم، لكن كل واحد له سريره وننفذ اللي احنا متفقين عليه برده.
- ندور سوا على حلول:
نسألهم عن سبب إنهم رافضين يناموا في سريرهم، وهم غالبًا سبب واحد من اتنين، يا هيقول لك بتوحشيني ودي أمرها سهل، يا هيقول لك إنه بيخاف وده طبيعي ومتوقع. فساعتها تبدأي تسمعي منه وتدوّروا برضه على حلول، هتلاقيها في المقال ده الخوف عند الأطفال.
- نساعدهم يحبوا أوضتهم:
ممكن نعمل إعادة تزيين أو تشكيل لأوضتهم بطريقة يحبوها ويشاركوا فيها ونشجعهم إننا بنرتب سوا الشكل الجديد اللي هيبقوا مرتاحين في النوم فيه.
- بيئة هادية:
نحاول علي قد ما نقدر تكون الأوضة من حواليهم ألوانها هادية وديكوراتها بسيطة ومفيش أشكال ورسومات كتير على الحيطة لإن ده بيزوّد توترهم ويخلّي خيالهم الواسع يتخيل حاجات تخوّفهم قبل النوم، فكل ما كان المكان اللي بيناموا فيه أهدا، كل ما هينعكس عليهم.
- الشاشات:
نمنع الشاشات بجميع أنواعها تمامًا قبل النوم بساعتين، لإنها بتؤثر جدًا على جودة النوم والأحلام اللي بتجي لهم وهدوء مخهم قبل النوم، فبالتالي بتخليهم يقلقوا كتير.
- الاتفاقات وجمالها:
باعمل مع ابني اتفاق لطيف قوي بيشجعه ينام باقي الأسبوع في أوضته، وهو إننا مختارين يوم التلات ومسميينه يوم الكامبينج (التخييم) وبننام كلنا سوا احنا الأربعة في نفس الأوضة، اللي يفرش بقى جنب السرير واللي ينام على مرتبة، وده طبعًا ممتع جدًا جدًا للأطفال وهو فعلًا بيستنى اليوم ده من أول الأسبوع. بس قصاد ده، اتفاقنا إنه يلتزم وينام في أوضته باقي الأيام عشان نوصل ليوم الكامبينج، فده بيشجعه كتير علي النوم لوحده.
وأخيرًا احتياجهم لينا ده احتياج طبيعي وفطري وجميل مش محتاج مننا غير شوية تفهم على شوية مثابرة في تمرينهم، وبكرة يكبروا ويبقوا رجالة وستات بيتكسفوا أصلًا يناموا جنبنا.
1 comment
حلو بس مقلتوش الرد يكون إيه لو السبب هو ان بتوحشيني وبحب انام جنبك