محتويات المقال
ابني أول ما كمل ست سنين بدأ يطلب إننا نجيب له كلب. وعلى مدار سنة كاملة بقى مع كل مناسبة تعدي علينا، طلبه الأول والأخير هو إنه يتبنى كلب ويربيه في البيت. ولأني عارفة إن تربية الكلاب رغم جمالها وفوايدها على ابني، إلا إنها مسؤولية كبيرة جدًا وقرار مهم خاصةً بالنسبة لإن عمري ما ربيت حيوان أليف قبل كده، فكان لازم أسأل نفسي أسئلة كتير قبل ما أوافق أو أرفض طلب ابني. ولأني عارفة إن أطفال كتير في نفس سن ابني عندهم نفس الطلب وكلنا بنسمع يوميًا: “مامي، نفسي أجيب كلب”، فأنا قررت أشارك معاكم أفكاري والحاجات اللي عملت حسابها وفكرت فيها قبل ما آخد قرار.
تربية الكلب ممكن تفيد ابني بإيه؟
أنا عارفة إن تربية الحيوانات الأليفة عمومًا والكلاب خصوصًا بتساعد جدًا في تعليم الطفل المسؤولية، وكمان الكلب بيدّي للإنسان حب غير مشروط؛ بيحب صاحبه تحت أي ظرف وفي أي وقت، بيكون بالنسبة له كل حاجة. لكن بعد بحث شوية في الموضوع، اكتشفت إن الدراسات بتقول إن الأطفال اللي بيربوا كلاب من صغرهم، ثقتهم بنفسهم وفي قدراتهم بتكون عالية جدًا نتيجة مسؤوليتهم تجاه الكلب اللي بيتحملوها من صغرهم واللي طبعًا لازم تكون متماشية مع سنهم.
ده غير إن دراسات كتير أكدت إن الطفل اللي بيربي كلب بيكون إحساسه بالتعاطف تجاه غيره أعلى وإحساسه كمان إنه إنسان مهم ومقبول وعنده نظام دعم قوي لإن الكلاب بتقدم لأصحابها حب دايم وغير مشروط بيخلي الطفل دايمًا حاسس إنه محبوب ومقبول زي ما هو مهما حصل. الأبحاث كمان أثبتت إن لعب الطفل مع الكلب بتاعه بيعلي هرمون الدوبامين وهرمون السيراتونين اللي مسؤولين عن زيادة السعادة وتقليل التوتر.
وفي المؤتمر السنوى للأمريكان كوليدج للحساسية والربو والجهاز المناعي اللي بيتعمل كل سنة في ولاية بوسطن في أمريكا، الباحثين أكدوا بدراسات إن وجود كلب في البيت مفيد للأطفال في حمايتهم من مرض الأكزيما ومرض الربو. طبعًا بعد ما اتطمنت على ابني وقريت كل الدراسات والأبحاث دي وعرفت أكتر عن التأثير الإيجابي لوجود الكلب في حياة الأطفال بقيت متحمسة جدًا، بس بقى فاضل حاجة مهمة جدًا وهي إني اتطمن على الكلب!
إيه أنسب سن الطفل ممكن يشيل فيه مسؤولية تربية كلب؟
ده كان أهم سؤال بييجي في بالي مع كل مرة أنس يطلب مني إنه يربي كلب. هل فيه سن مناسب ابني هيكون مستعد يشيل مسؤولية تربيته وأكله وشربه واللعب معاه وتمشيته وصحته وغيرها كتير؟ فبعد تفكير وبحث كتير، اكتشفت إن مفيش سن معين مناسب إن الطفل يقدر يربي كلب ويشيل مسؤوليته. وإن الأهم من سن الطفل هو إنه يبقى عارف إن الكلب ده روح، هيحبه ويعيش معاه ويكون مسؤول عنه والمسؤولية دي مش بسيطة ومحتاج تجهيز وتدريب مش لعبة هيلعب بيها شوية ويسيبها.
فقعدت مع أنس وطلبت منه يفكر في تلات أسباب هو ليه عايز يربي كلب، عشان اتأكد إنه مش شبطان فيه شوية وهينسى. وبعد ما كتب لي أسبابه وكانت مقنعة الحقيقة، قعدت واتكلمت معاه عن كل المسؤوليات اللي هتبقى عليه وكتبنا مع بعض جدول بالحاجات اللي محتاجين نتعلمها عن الكلاب وحياتهم والعناية بيهم في الفترة الجاية. وفي نفس الفترة دي، اتفقنا إنه هيبقى مسؤول عن مهام معينة بصفة يومية في البيت يعملها عشان هو كمان يتأكد من نفسه ويتمرن إنه هيقدر يواظب على مهمة يوميًا من غير انقطاع ومش هيزهق أو ينسى مثلًا. وأخيرًا، بقى فاضل إني اتطمن على نفسي وبيتي.
هل بيتنا مستعد لاستقبال كلب؟
الكلاب بتحتاج تتمشى يوميًا وتلعب في مكان مفتوح، وبتحتاج لحد متواجد في البيت يحط لهم الأكل ويلاعبهم. وده طبعًا من الحاجات المهمة اللي كان لازم أفكر فيها وأشرك ابني فيها قبل ما ناخد القرار. ده غير إن الكلاب اللي لسه مولودة بتكون عاملة زي البيبي الصغير بالظبط ومحتاجين اهتمام وتدريب زي الأطفال. فكان لازم اتأكد إني عندي المكان المناسب والوقت الكفاية والقدرة إني أعمل كده.
في النهاية، الكلاب من أجمل مخلوقات ربنا. ولو قررنا نتبنى كلب ونعيّشه وسطنا، لازم نتأكد 100% إننا قد المسؤولية دي. عشان ما نضطرش بعد ما نتبناهم ويرتبطوا بينا إننا نتخلص منهم لأن ده حقيقي بيكسر قلبهم. وما تنسيش لو قررتوا تتبنوا كلب إنك تتأكدي الأول من الدكتور إن لا طفلك ولا أي حد في البيت عنده حساسية تجاه الكلاب.
التعليق باستخدام حساب فيس بوك