محتويات المقال
مع نمو مخ الطفل وانفتاحه على الحياة أكتر، خياله بيبدأ يوسع وإدراكه لوجود مخاطر في الحياة بيكبر. ممكن نلاقيه فجأة بقى بيخاف من حاجات ما كانش بيخاف منها زي الكلاب أو الضلمة أو يتخيل أشباح مثلًا أو يتخيل وجود حرامي تحت السرير أو من الأعاصير أو السيول وغيره. ممكن يكون الطفل بيتعرض إنه يشوفه في التليفزيون أو يسمع قصة من صاحبه يترجمها بطريقة مخيفة في عقله الباطن أو حتى يقرا في كتاب أو يتعلم عن الكوارث الطبيعية فيبدأ يفكر فيها ويخاف إنه يتعرض لها.
أهم حاجة محتاجين نعرفها هي إن الخوف ده شعور فطري وطبيعي وأساسي في نمو الطفل وإن مفيش داعي لتوترنا أو إحساسنا بالاستفزاز من ولادنا لما نلاقيهم خايفين من حاجة من وجهة نظرنا ما بتخوفش. لإن في الحالة دي، الطفل بيكون مش محتاج غير إننا نحتويه ونساعده يطوّر مهارة التغلب على المخاوف اللي بتنمو في أي إنسان بالتدريج مش في يوم وليلة.
اتاكد إزاي إن خوف طفلي طبيعي مش مرضي؟
طول ما خوف الطفل لسه في النطاق الطبيعي والعادي اللي مش بيمنعه من ممارسة حياته بشكل طبيعي. الخوف المرضي إنه ما يرضاش يروح رحلة مع المدرسة عشان ممكن يشوف كلب في الطريق وهم رايحين، أو يكون خوف بشكل مبالغ فيه زي إنه يسبب له أرق أو كوابيس بصورة مستمرة أو قيء أو رعشة في الجسم. لو لاحظتي أعراض الخوف دي على طفلك بننصحك بزيارة أخصائي نفسي أطفال يقدر يساعدك.
أساعد طفلي إزاي يتغلب على الخوف الطبيعي؟
- أول حاجة لما يقول لك إنه خايف من حاجة مهما كانت بالنسبة لك مش مخيفة أو جواكي حاسة إنه بيتدلع، لازم تبيني تفهمك لمشاعره وتعاطفك معاه اتعاطفي معاه بس في نفس الوقت من غير مبالغة أو حماية زايدة منك وما تقوليلوش “مفيش حاجة تخوّف” أو “انت راجل، مفيش راجل بيخاف”.
- ما تسخريش من مشاعر الخوف أو تتريقي عليها أو تحكيها لحد تاني على أساس إنها هزار وحاجة بتضحك لإن ده فعلًا بيجرح الأطفال جدًا من غير ما نحس وانتهاك لخصوصيتهم وبيخليهم يبنوا حواجز ما بيننا ويفقدوا الثقة في إنهم يحكوا لنا اللي حاسّين بيه لإنهم بيتوقعوا إنكم هتروحوا تحكوا لأصحابكم وقرايبكم أي حاجة تخصهم وكمان تضحكوا عليهم.
- ما تلوميهوش أو تزعقي له على خوفه ولا تغصبيه يعمل حاجة خايف منها لأنه في الحالة دي خوفه ممكن يتحول لفوبيا.
- ما تحاوليش تشتتي انتباهه عن الحاجة اللي مخوفاه اعتقادًا منك إنه كده هينساها أو هيبطل يخاف. الطريقة دي ممكن تريحك على المدى القصير لكن على المدى البعيد هيفضل الخوف مدفون جوه الطفل ومش هتكوني قدرتي تساعديه يطور مهارة المواجهة والتغلب على مخاوفه.
- اتكلموا في سبب خوفه وفكروا مع بعض وساعديه يدوّر على حلول واتفقوا على خطوات تساعده في التغلب على خوفه بالتدريج بمساعدتك وشجعيه واشكريه على أقل إنجاز يعمله في التغلب على الخوف.
- اقري معاه تفسيرات علمية أو اتفرجوا على فيديو بيشرح الحاجة اللي خايف منها زي صوت الرعد أو الفياضانات وفهّميه سببها وبتحصل ليه وفين وهل هو مُعرّض فعلًا تحصل له وإيه الاحتياطات اللي الناس بياخدوها في الحالات دي، عشان يقدر يفهم إن ده طبيعي في الحياة وإن شعور الخوف مش عيب بس له حلول.
- خليكي صبورة وما تستعجليش النتايج وشجّعيه على كل محاولة يقوم بيها في التغلب على خوفه واشكريه عليها.
لو المقال مفيد بالنسبة لك، شاركينا في التعليقات انتِ كمان إيه أكتر حاجة ابنك بقى يخاف منها فجاة وساعدتيه إزاي؟
المصادر
- https://childmind.org/article/help-children-manage-fears/
- https://kidshealth.org/en/parents/anxiety.html
- https://www.healthychildren.org/English/health-issues/conditions/emotional-problems/Pages/Understanding-Childhood-Fears-and-Anxieties.aspx
التعليق باستخدام حساب فيس بوك