اعتماد الطفل على نفسه من سن صغير له فوايد كتير قوي على شخصيته وثقته بنفسه. بس كتير بنبقى مش عارفين نعمل إيه وازاي، وهل لما بنحمّلهم مسؤولية كده بنضغط عليهم؟ طب هل مساعدتي له كده دلع واتكالية؟ طب لما ما ساعدهوش، كده باظلمه؟ كل الأسئلة دي هنعرف إجاباتها في مقال النهارده وهنعرف ازاي ندرّب ولادنا ونجهزهم لتحمل المسؤولية والاعتماد على نفسهم.
قواعد الاعتماد على النفس
- ما نعملش لولادنا أبدًا حاجة يعرفوا يعملوها لنفسهم.
للأسف أوقات كتير بنعمل حاجات لولادنا بسيطة ممكن تكون بداية لتعليمهم المسؤولية واعتماد علي نفسهم. بنعملها من باب السرعة/عايزين ننجز في الوقت/خايفين إنهم ما يعملوهاش كويس. زي مثلًا تحضير شنطة المدرسة أو تحضير لبس التمرين أو مساعدتهم في اللبس وهم يعرفوا يعملوا ده، وحاجات تانية كتير تدخلنا فيها بيكون سبب إنهم هم كمان يكسلوا فيتكلوا علينا أكتر أو يصدقوا إنهم ما يقدروش يتعاملوا لوحدهم فيفضلوا معتمدين علي وجودنا ومساعدتنا طول الوقت.
اعرفي أكتر عن حماية الأم الزايدة لولادها ونتيجتها على شخصيتهم من هنا: هل أنا باربي ولادي بطريقة الهيليكوبتر؟
- اشركيهم في مسؤوليات بالتدريج مناسبة لسنهم. البداية دايمًا بتكون بالمسؤوليات البسيطة في البيت على حسب سنهم، زي لم اللعب/يشيلوا لبسهم في الدواليب/ياكلوا بنفسهم وهم صغيرين، وطبعًا بيكون فيه في الأول اعتراض لإنهم لسه مش متعودين وتلاقيهم مرة يتحمسوا ومرة يكسلوا، بس بالصبر وبالتعاطف مع إحساسهم ده والتعامل بطريقة kind and firm هيعرفوا إن ده شيء يخصهم ولازم يعملوه.
اعتماد الطفل علي نفسه – مصدر الصورة: pinterest
- خصصي وقت كفاية للتمرين على كل مسؤولية جديدة، ده أداة مهمة جدًا من أدوات التربية الإيجابية، وهي إننا ما نستعجلش أبدًا النتايج لإن استعجالنا بيسبب لنا ولهم إحباط.
- بيّني ثقتك فيهم وشجعيهم على كل خطوة جديدة قدروا يعملوها لنفسهم، وفرّحيهم بنفسهم إنهم كبروا وبيعتمدوا على نفسهم، أنا فاكرة ابني الكبير لما اتعلم أخيرًا يربط رباط الجزمة لوحدهم عملنا له فرح في البيت وكان فخور بإنجازه قوي.
- اخلقي بيئة في بيتك تساعدهم على الاستقلال، زي إن دايمًا يكون عند الولاد البراح يختاروا الحاجات اللي تخصهم ياكلوا إيه/يلبسوا إيه/حتى في المذاكرة يعملوا إيه الأول، الاختيارات بتدي للأطفال إحساس بالحرية والاستقلال والقيادة فيتشجعوا ويثقوا إنهم يقدروا يعتمدوا على نفسهم أكتر.
- اسمحي لهم بالأخطاء وشجعيهم يتعلموا منها من غير خوف من عقاب، ومن غير ما تجري تنقذيهم، وتصلحي غلطاتهم مكانهم.
التعليق باستخدام حساب فيس بوك