اجتماع الأسرة ده واحد من أهم وأجمل أدوات التربية الإيجابية واللي بيسهّل علينا حاجات كتير في تحديات كل يوم مع ولادنا. لإنه مش بس بيعلّم الولاد مهارات أساسية وبيختصر علينا وقت ومجهود لكن كمان بيقوّي العلاقة بين كل أفراد الأسرة وبيعرّفهم قيمة ترابطهم كأسرة وبيبقى زي تقليد للعيلة كده يبني في عقولهم وقلوبهم الصغيرة ذكريات حلوة طول العمر. في المقال ده، هاقول لك إزاي تعملي اجتماع أسرة ناجح في بيتك وإيه أهميته وفايدته لولادك.
تعالوا نعرف الأول اجتماع الأسرة (family meetings) هتعلّم ولادنا إيه؟
اجتماع الأسرة بيعلّم الأطفال مهارات حياتية كتير زي مهارة حل المشكلات. لما نقول كلنا مشكلة مضايقانا كعيلة أو مشكلة عند واحد فينا وكلنا نفكر إزاي نحلها ونعرض أفكارنا، بيعلمهم كمان مهارة الاستماع الفعال، يعني أتعود إني أسمع كلام اللي قدامي للآخر بتركيز من غير ما أقاطعه. بيعلّم الآطفال كمان مهارة التعاون، ومهارة التعامل مع المشاعر ومع الغضب خصوصًا. ده غير بقى إنه بيعلّمهم أهمية شكر الغير وتقديره لإن من قوانين اجتماع الاسرة إنه يبدأ بكل فرد في الأسرة يشكر حد من أسرته على أي حاجة يحبها وينتهي بهزار وضحك وده اللي بيدوّب كتير من الجليد بالذات في فترة المراهقة.
تسع خطوات سحرية لاجتماع أسرة ناجح
1. بعد ما نفهّم الولاد فكرة الاجتماع ده لينا كلنا ونأكد عليهم حرية التعبير والكلام في أي حاجة يحبوها، نختار أي حاجة عندنا تقوم بدور المايك زي: ريموت التليفزيون مثلًا أو موبايل. المهم إنها هتكون حاجة اللي يمسكها هيكون الدور بتاعه هو بس في الكلام منعًا للمقاطعات وكمان تبقى حاجة لذيذة وتضحّك للأطفال وتعمل جو بهجة في الاجتماع.
2. نبدأ الاجتماع بأن كل واحد فينا يختار أي حد من أفراد الأسرة يشكره على أي حاجة كنوع من أنواع الامتنان، وكمان الخطوة دي مهمة جدًا لأنها بتخلق نوع من التواصل والمشاعر الطيبة قبل بداية الاجتماع.
3. أجندة الاجتماع: ودي ورقة بنكون حاطّينها في مكان معروف لينا كلنا من قبل الاجتماع بأسبوع وكل ما تقابلنا مشكلة أو موضوع محتاج مناقشة طويلة، نكتبه في الأجندة عشان نرجع له في اجتماع الأسرة.
4. نبدأ بعد كده بعرض المشكلة اللي محتاجة مناقشة ونبدأ نفكّر مع بعض في حلول وكل واحد يقول رأيه في الدور بتاعه ونكتب في الورقة كل الحلول والأفكار اللي اتعرضت (حتى لو كانت مش منطقية) بس لازم الطفل يحس إن له صوت مسموع ورأي بيتاخد بيه.
5. بعد كده، نبدأ نفلتر الأفكار ونصفيها ونسأل الأغلبية عن رأيهم وإيه المتاح اللي ممكن تنفيذه من الأفكار دي.
6. نكتب اتفاقاتنا كلها ونجربها لحد الاجتماع اللي بعده عشان نشوف نفعت ولّا لا.
7. أهم حاجة إننا هنختم بنكتة/هزار/موقف بيضحّك، أي جو لذيذ يخلّي الولاد مبسوطين وتربط الاجتماع الأسري بالنسبة لهم بأفكار إيجابية.
8. مهم جدًا كمان إن الاجتماع ده ما يكونش شبه “حديث الثلاثاء” بتاع ونيس كله مواعظ ونصايح ومحاضرات تخلّي الولاد يهربوا منه.
9. ما ننساش إننا نحترم رأي بعض ونشكر ولادنا على مشاركتهم أفكارهم معانا ونشجعهم.
في النهاية، بافكّرك إنك ما تستعجليش النتايج وتزهقي بسرعة لو لقيتي ولادك مش مستجيبين، لإن في الأول هيبان إنه مش فارق معاهم ومش مهتمين، لا وكمان زهقانين بس بعد ما يفهموا الفكرة ويشاركوا أكتر من مرة، هيقدروا يحسوا بأهميته وقيمته بالنسبة لهم وإنه طريقة حلوة عشان يقدروا يقولوا رأيهم وطلباتهم.
التعليق باستخدام حساب فيس بوك