محتويات المقال
شهر أكتوبر هو شهر التوعية بمرض سرطان الثدي.. علشان كدة اتكلمنا عليه كذا مرة الشهر ده. دلوقتي هنقولك على 5 عادات تسبب سرطان الثدي لازم تبطليها علشان تساعدي نفسك على تجنب الإصابة بهذا المرض.
عادات لا تتوقعيها تسبب سرطان الثدي
شرب الكحوليات
فيه دراسات ربطت بين شرب الكحول (حتى بكميات بسيطة) وبين احتمالية الإصابة بسرطان الثدي. وفيه دراسات بتقول إن الستات اللي بتشرب مشروبات كحولية عندها 20% احتمالية زيادة للإصابة بسرطان الثدي.
التدخين
هناك عادات تسبب سرطان الثدي لكن معظمنا لا يتوقعها .. طبعًا التدخين مضر لأسباب كتير وبيعرض المدخن لأضرار صحية كتير. لكن كمان فيه دراسات أثبتت إن المدخنات (خاصة الصغيرات في السن – قبل سن انقطاع الدورة) عرضة أكتر من غيرهم إنهم يصابوا بسرطان الثدي. كمان السن اللي بدأتي تدخني فيه وفضلتي أد إيه تدخني كلها عوامل بتزود احتمالية الإصابة.
شوفي هنا .. 10 عادات صحية تحميكي من سرطان الثدي
الأدوية المعتمدة على الهرمونات
فيه وسائل منع حمل بتعتمد بشكل أساسي على إنها ترفع نسبة هرمونات معينة في الجسم عشان الجسم يرفض تخصيب البويضات. المشكلة في الأدوية دي إن رفع نسبة الهرمونات دي ممكن يعرض الستات لمرض سرطان الثدي. عشان كدا بننصحك ما تاخديش أي دوا لمنع الحمل من غير استشارة دكتورك، وما تاخديش دوا معتمد على الهرمونات لفترة طويلة، وممكن كمان تطلبي من دكتورك يشرح لك وسائل مختلفة وتقدر تساعدك من غير ما تؤذيكي.
الأشعة عالية الإشعاع
بعض الأشعة التشخيصية زي الأشعة المقطعية وغيرها بتستخدم إشعاع عالي جدًا. والدراسات ربطت بين التعرض لإشعاع عالي وبين الإصابة بسرطان الثدي. عشان كدا بننصحك ما تتعرضيش للنوع دا من الآشعة إلا لو الدكتور وصفها وكان مفيش أشعة تانية أدق.
المنتجات اللي فيها بارابين
كتير من منتجات التجميل ولوشن البشرة والشعر بيكون فيهم في المكونات عنصر البارابين. بعض العلماء ربطوا بين المادة دي وبين ظهور أورام سرطانية في الثدي. عشان بتحفز هرمونات معينة وبتنشطها. فبننصحك تقللي استخدام المنتجات اللي بتحتوي على البارابين.
نتمنى لك دوام الصحة والسعادة. وبنشجعك إنك تروحي دايمًا للدكتور بأي أسئلة تشغلك عن مرض سرطان الثدي. وبنشجعك جدًا كمان تداومي على الفحص الذاتي وعلى الفحص بالموجات والماموجرام.
المصادر
WebMD
https://www.webmd.com/breast-cancer/ss/slideshow-habits-lower-breast-cancer-risk
التعليق باستخدام حساب فيس بوك