عيد شم النسيم 2020 قرب علينا، ويا رب بدخوله نكون رجعنا لحياتنا الطبيعية وتخلص أزمة فيروس كورونا ونعرف ننزل من بيوتنا تاني ونشوف عيلتنا ونحضنهم من غير خوف علينا ولا عليهم… مستعدين تسمعوا قصة أصل عيد شم النسيم؟ 🙂
شم النسيم من أحلى الاعياد اللي المصريين كلهم باختلاف دياناتهم بيستنوه، عيد مصري كله ألوان وفرحة للكبار والصغيرين، عشان كده هاقول لك النهارده حدوتة أصل عيد شم النسيم اللي تقدري تحكيها لولادك وتعرّفيهم أكتر عن تاريخ العيد ده وتشركيهم معاكي في التحضير والبهجة اللي بتكون فيه.
عيد شم النسيم أو عيد الربيع ده عيد فرعوني كانوا بيحتفلوا بيه في مصر القديمة من آلاف السنين بقدوم الربيع واللي كانوا مسمينه عيد “شموش” وبعدين اتحرّف وبقى اسمه “شم” لحد ما بعد كده زودوا عليه كلمة ” النسيم” عشان الجو وقتها ونسمة الربيع اللي بتيجي كل سنة في معاده.
ومن أهم الأكلات المصرية اللي مرتبطة دايمًا بعيد شم النسيم ومن مظاهر الاحتفال بعيد الربيع من أيام الفراعنة هي البيض، والفسيخ والرنجة، البصل” و من أجمل مظاهر الاحتفال بيه هي تلوين البيض ورسم اشكال مختلفة عليه. وده بيرجع أصلًا لعادة قدماء المصريين في إنهم كانوا بيكتبوا الأمنيات بتاعتهم والدعوات على البيض ويعلّقوه في الشجر اعتقادًا منهم إن دعواتهم كده بتستجاب أسرع. ده غير إن قصة أكل الفسيخ في شم النسيم بترجع للأسرة الفرعونية الخامسة لما بدأ تقديس النيل كرمز للحياة عند قدماء المصريين اللي كانوا متعودين يملّحوا الأسماك بالشكل ده.
وطبعا ما نقدرش ننسي أكل البصل اللي مرتبط بشم النسيم من آلاف السنين وده قصته بترجع إن بنت واحد من ملوك الفراعنة كانت مريضة ومفيش علاج ليها، لحد ما كاهن جرّب يديها عصير من البصل كتجربة علاج وكانت المفاجأة إن حالتها اتحسنت ومن يومها والملك قرر إنهم يحتفلوا دايمًا في شم النسيم بالبصل وياكلوه في عيد الربيع اللي بيرمز ليهم ببداية حياة جديدة. ومع مرور السنين، اتنقلت لنا العادات المصرية القديمة وبقى شم النسيم عيد مصري شعبي بتتجمع فيه كل العيلة يلونوا ويرسموا على البيض ويتصوروا مع بعض ويخرجوا يتبسطوا بالطبيعة والجناين.
كل شم نسيم وانتم طيبين
التعليق باستخدام حساب فيس بوك