فيه بعض الأسئلة اللي ولادنا بيسألوها لما بيبدؤوا يلاحظوا الفرق بين الأديان في حياتهم اليومية والفرق بين الأعياد بينهم وبين أصحابهم. واحنا دورنا من أول يوم يسألوا فيه السؤال ده إننا نكون واضحين وحقيقين كفاية في شرح الفرق بين الديانات المختلفة وضرورة قبولنا واحترامنا لاختلافات الغير باختلاف دياناتهم. فموضوع اختلاف الأديان والأطفال حاجة مش سهل توصيلها لما تكون الأسئلة زي:
“ماما يعني إيه مسيحي” .. “هو يعني إيه صاحبي مسلم” .. ” ليه في الحصة بتاعة الدين بنتقسم في المدرسة” .. “ليه فيه عيد عند صاحبي مش بنحتفل بيه”
-
اختلاف الأديان والأطفال .. نشرح لهم احنا ولا نستني لما يسألوا؟
غالبا الأطفال بتبدأ تلاحظ الفرق وإن أصلا فيه ديانات مختلفة على سن ابتدائي ولما يبدؤوا يستوعبوا فكرة الأعياد ورمضان والطقوس الدينية عامة، فليه صاحبي عنده مناسبة أو عيد وأنا لا، فيبدأ يسأل. فيفضل إننا نستنى لما يسألوا عشان ما نكونش بنديهم معلومة تحسسهم إن ده شيء يستدعي الاهتمام والتصنيف أو التفريق بين الناس ويمشوا يسألوا أصحابهم “إنت مسلم ولا مسيحي”. عشان بعد كده، نبدأ نفهمهم إن الدين ده حاجة بين الشخص وربنا بس مش حقنا نتدخل فيها.
-
ازاي نشرح اختلاف الأديان بطريقة مناسبة لسن ولادنا؟
- أول حاجة نشكرهم على سؤالهم وقوة ملاحظتهم وإنهم جم سألونا إحنا عشان يفضلوا متشجعين يلجأوا لينا في أي حاجة تخطر في بالهم.
- نحكي لهم قصص نزول الأديان ونحكي لهم عن كل الرسل اللي ربنا بعثها لينا برسالة ومناهج الدين.
- نشرح لهم إن كلنا بنعبد ربنا بطرق مختلفة، كلنا بنصلي وكلنا بنصوم وكلنا مأمورين نعبد ربنا ومأمورين إن أخلاقنا تكون كويسة، كلنا زي بعض حرام عندنا الكذب والغش والسرقة وغيرهم. وكلنا مشتركين إن ربنا بعت لنا رسالة الدين برسالة حب وسلام للبشرية.
- في فرق في أداء العبادات، المسلم بيصلي في المسجد والمسيحي بيصلي في الكنيسة بس في الآخر كلنا بنعبد ربنا وبندعيه.
- سواء كنا أسرة مسلمة أو مسيحية، ولادنا ممكن هيسألوا سؤال بديهي طفولي “يعني إحنا هندخل الجنة وهم هيدخلوا النار؟” لازم تكون إجابتنا منطقية بإننا ما نعرفش لأن ربنا له حسابات غير البشر، لكن في نفس الوقت احنا مقتنعين بديانتنا والطريقة اللي بنعبد بيها ربنا وممكن نجيب لهم أدلة من القرآن أو الإنجيل “حسب ديانتنا” نوريهم فيها كلام ربنا اللي بيقول لنا إن ده المطلوب مننا وإن ده اللي اتأمرنا بيه.
مهم جدا نربط ولادنا بدينهم وعقيدتهم اللي بنكبّرهم عليها، وفي نفس الوقت نفتكر إننا نشجعهم على قبول وإحترام وعدم الحكم أو التقليل من عقائد غيرهم، لأن قبل ده ما يكون مفيد لولاد غيرنا فهو مفيد لولادنا ولصحتهم وسلامهم النفسي.
التعليق باستخدام حساب فيس بوك