مع دخول شهر فبراير 2022، أول حاجة بنفكر فيها هي عيد الحب وحيرة شراء هدايا الفلانتين لتسعد حبايبنا. علشان كده، تعتبر الأبراج واحدة من أسهل الطرق اللي بنختار بيها الهدية المناسبة، وعيد الحب مش بس بيكون بين رجل وست، إنما هو بيكون لكل أشكال الحب اللي بتملى قلبنا. يعني الحب بين أفراد العيلة، حب الأصدقاء والأصحاب. علشان كده قولنا السنه دي نفكر بطريقة مختلفة، وهي اختيار هدايا عيد الحب 2022 حسب كل برج.
الأبراج مش بس حاجة بنتابعها في حتة الأبراج اليومية وإنما كمان في التعرف على ملامح شخصية اللي بنحبه والسنة دي توقعات الأبراج للحب كانت مختلفة ومتنوعة، عمومًا خلينا ندخل في المهم ونشوف حبايبنا يناسبهم إيه بناء على برجهم، وهنقول لك تواريخ الأبراج كمان علشان لو محتارة هم برج إيه.
أفكار هدية عيد الحب لــ برج الحمل
تاريخ ميلاد برج الحمل هم اللي اتولدوا في الفترة من 21 مارس لحد 19 أبريل وسواء امرأة برج الحمل أو رجل برج الحمل. فالاتنين بيشتركوا إن شخصياتهم حماسية وعاطفية جدًا، وده بيخلي أفكر الهدايا بتنحصر بين إما رحلات حماسية في أماكن جديدة، أو قضاء يوم مليان مغامرة في مكان مختلف زي الصحراء أو البحر وتظهري استعدادك للمشاركة معاه لأن ده بيبسط جدًا أصحاب برج الحمل، ولو ده صعب عليكي فيه الجانب العاطفي لو جبتي له حاجة عليها اسمه أو بيت شعر خاص ليه فهو هيحب الفكرة جدًا.
أفكار هدايا عيد الحب لـ برج الثور
مواليد برج الثور بيكونوا بين 20 إبريل لحد 20 مايو وهم ملوك العند، لكن على الرغم من روحهم العنيدة جدًا إلا إن الأمور اللي بتعجبهم تنحصر بين حاجتين، الحاجات الغالية جدًا والقيمة، والأكل اللذيذ، بس كده بكل بساطة، يعني يا هتلاقي نفسك بتجيبي حاجة أنتيك رائعة وسعرها فعلًا غالي أو قضاء عشاء جميل في فندق فخم، في الحالتين سعادة برج الثور سواء رجل أو امرأة هتكون في قمتها.
هدية عيد الحب لـ برج الجوزاء
برج الجوزاء هم مواليد الفترة ما بين 21 مايو لحد 20 يونيو، يعني برج كل حاجة وعكسها، يعني هتلاقي في روحهم منتهى الحماس، والاستعداد لدخول مغامرة جديدة في أي وقت، وفي نفس الوقت وقار وشياكة الثقافة والعقل. علشان كده، سواءً الهدية هتيجي لرجل برج الجوزاء أو امرأة برج الجوزاء فالهدايا يا هتكون يوم مغامرة جميل أو دعوة لحفلة في الأوبرا أو متحف ثقافي جديد.
هدايا الفلانتين لـ برج السرطان
برج السرطان واحد من الأبراج المائية وده له معنى واحد بس، هو سرعة التأثر بأي لفتة لطيفة مهما كانت بسيطة، وعمومًا مواليد برج السرطان في الفترة ما بين 21 يونيو لحد 22 يوليو. يبقى بكل بساطة سواء كانت الهدية لرجل أو امرأة برج السرطان فكل اللي هنحتاجه تجهيز قاعدة لطيفة أو خروجة بسيطة في مكان مفتوح أو حتى برواز عليه صورة تجمعكم هتعتبر أحلى هدية تتقدم ليهم.
هدية الفلانتين لـ برج الأسد
ملوك الكوكب والنمبر وان في أي حاجة، أيوة هم مصدقين عن نفسهم كده وبيحبوا الناس تعاملهم كده، يعني اللي مولود ما بين 23 يوليو لحد 22 أغسطس يبقى تعرفي إنك في حضرة الأسد سواءً كان رجل برج الأسد أو امرأة برج الأسد، وبالتالي هم عايزين هدايا تتناسب مع ملك الغابة، يعني احنا بنتكلم على مستوى الورود الحمراء الفخمة، المجوهرات الأنيقة، عربية جديدة طبعا، أو رحلة فخمة في فندق فخم، حقيقي هدية برج الأسد محتاجة ميزانية قوية وفي تمام صحتها.
هدايا الفلانتين لـ برج العذراء
يعني برج الخصوصية والغموض وفي نفس الوقت الأهتمام الكبير بنظام الحياة الصحي، تاريخ ميلاد برج العذراء في الفترة ما بين 23 أغسطس لحد 22 سبتمبر يبقى كده عرفنا حنا بنتعامل مع مين، سواء كان امرأة أو رجل، فالاتنين بيشتركوا في حبهم إن الهدية تكون خاصة أو متفصلة ليهم، مش مجرد هدية من محل، وهيحبوا جدًا هدية اشتراك سنوي في جيم كبير، أو مجموعة مستحضرات تجميل غالية.
هدية الفلانتين لـ برج الميزان
على الرغم ما يتمتع بيه مواليد برج الميزان من توازن ودبلوماسية إلا إنهم في غاية الرومانسية من جواهم، عموما هم مواليد الفترة من 23 سبتمبر لحد 22 أكتوبر. امراة برج الميزان بتعحب الهدايا الرومانسية زي خاتم رقيق أو سلسلة صغيرة، ونفس الموضوع مع رجل برج الميزان بيحب الهدايا الشخصية زي مثلًا كرافاتة أو ساعة أو محفظة، يعني حاجة في منتهى السهولة والجمال زيهم بالضبط.
هدايا الفلانتين لـ برج العقرب
مواليد 23 أكتوبر لحد 21 نوفمبر هما جماعة برج العقرب، وعلى الرغم من كل التحذيرات الدولية والفضائية من التعامل معاهم من منطلق من خاف سلم وكل ما يظهروه من تعقيد، إلا إنه في حقيقة الأمر هما جواهم جانب طفولي لطيف بيتأثر جدًا سواءً كان رجل برج العقرب أو امرأة برج العقرب، هم بيحبوا الهدايا الخاصة والخاصة جدًا يعني حاجة تكون ليهم هم بس ومحدش يستخدمها معاهم زي نظارة شمسية، لعبة بازل puzzle، أو برواز أسود أنيق لصورة بتجمعكم.
هدية الفلانتين لـ برج القوس
من الأبراج النارية اللطيفة اللي مليانة حياة بمعنى الكلمة، عيد ميلادهم بيكون في الفترة ما بين 22 نوفمبر لحد 21 ديسمبر، الحلو فيهم سواء كان امرأة برج القوس أو رجل برج القوس إنهم بيحبوا جدًا المفاجأت، يعني حفلة من غير ترتيب، أو حتى رحلة في اللحظة الأخيرة، جو التغيير المفاجيء ده مفضل ليهم جدًا.
هدايا عيد الحب لـ برج الجدي
من الأبراج الترابية والمودية جدًا في نفس الوقت، وقتهم بيكون من 22 ديسمبر لحد 19 يناير. زي ما قلت إنهم بيتمتعوا بحالة موودية قوية جدًا، يعني شوية يكونوا في منتهى السعادة والانطلاق وفجأة في منتهى الحزن والانغلاق، ليه؟ ما نعرفش! بس الحل السحري لهم وأفضل هدية لهم هي التسوق، يعني ياخدوا فرصتهم في تنقية هديتهم على مزاجهم بدون تحديد تكلفة، الموضوع ده بيسعدهم جدًا سواء كان امرأة برج الجدي أو رجل برج الجدي.
هدايا عيد الحب لـ برج الدلو
من ألطف الأبراج على الإطلاق في موضوع الهدايا، عيد ملادهم بيكون من 20 يناير لحد 18 فبراير، الحلو فيهم إنهم فعليًا وبجد وبحق وحقيقي بيفرحوا بأي حاجة مهما كانت في غاية البساطة أو في منتهى البذخ. في الحالتين فرحتهم واحدة وتقديرهم واحد وحقيقي من قلبهم، يعني مافيش أي شكل من أشكال الحيرة في إسعادهم، يعني الموضوع يقع على عاتق ذوقك وميزانيتك فقط.
هدايا الفلانتين لـ برج الحوت
آخر برج مائي في دايرة الأبراج، وبيكون في الفترة ما بين 19 فبراير لحد 20 مارس، بيحبوا جدًا كل الأعمال اليدوية، سواءً كانت رسم أو نحت أو خياطة أو أي شكل من أعمال دي خصوصًا امرأة برج الحوت. علشان كده، لو فكرت في هدية ليهم من الأفضل تكون أنت عاملها بإيدك مهما كانت بسيطة.
هما دول الـ12 برج وشكل الهدايا اللي بيحبها كل واحد فيهم، ولو إنتي سينجل ده لا يعني تتحرمي من الإحتفال بالعكس ليكي كل الحق في الاحتفال وده اللي هتعرفيه من 10 طرق للإحتفال بعيد الحب لو إنتي سينجل، وللرجالة اللي زوجاتهم حوامل ومش عارفين إيه اللي يبسطهم الحل هتلاقيه هنا، وفي الآخر وعلشان سهرة الفلانتين تكمل شوفي ترشيحاتنا لأفلام رومانسية لليلة الجميلة دي.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك