من كام يوم، كلنا شوفنا إعلان فودافون الجديد اللي بيورينا إن الأمهات مهما قفشوا أو ما عجبهمش حاجة ولادهم بيعملوها، فهم مش بيحبوا حد يوجّه ولادهم أو يعلق على تصرفاتهم! والناس اتقسمت لنصين: نص بيقول هي دي الحقيقة واللي بيحصل والإعلان واقعي ولذيذ، والنص التاني شافها من وجهة نظر تانية وهي إن الإعلان فيه رسالة تربوية غلط وإن مفروض الأم لما تشوف ابنها بيعمل حاجة غلط تقومه بدل ما “تطبل له”.
بالفيديو: 10 إعلانات هتلمس قلب كل أم
خلوني أقول لكم رأيي في الموضوع ده بما إني لما شوفت الإعلان، ضحكني جدًا وعجبني. الإعلان عجبني لإن شئنا أم أبينا، هي دي الأم، هي دي فطرتنا، ما بنستحملش على ولادنا الهوا، قلبنا بيوجعنا مع كل احتمالية لمشاعر سلبية تعدّي عليهم، أنا بابقى قاعدة في تمرين ابني هاتشل من الروقان بتاع ابني عادي، وفي نفس الوقت، أول ما الكابتن يقفش عليه، بازعل وباتوتر، وده مش معناه أبدًا إننا هنحرج الناس ونطاوع ولادنا في الغلط عشان محدش يكلمهم، بس فطرتنا مش هنعرف نغيرها، ولادنا أولًا ومن بعدهم أي حاجة تانية تيجي.
الحب غير المشروط
أول ما شفت الإعلان جه في بالي فكرة “الحب والقبول غير المشروط” اللي كل الدراسات التربوية بتنادي بيها واللي هي أسلم طريق لبناء طفل سعيد وسوي نفسيًا، إني أحب ابني وأقبله في كل أحواله، ولما يعمل غلط ما احسسهوش بالرفض وأساعده يصلح خطأه بدعم وتقبل مني.
والإعلان مبروز ده بطريقة كوميدية فيها تهويل طبعًا لزوم الإعلان، عادي! يعني مش صح أكيد إني أحرج الكابتن مثلًا وأرد عليه جامد قصاد ابني لمجرد الدفاع عن ابني أو عشان أوصل لابني إني قابلاه وبحبه في كل حالاته مثلًا!
فالإعلان في الآخر مش المكان أو المصدر اللي مطلوب من الناس تاخد منه معلومة أو نصيحة تربوية، ومش كورس تربية عشان نشوفه نتعلم منه ازاي ندعم ولادنا في الصح والغلط.
تعديل التصرفات
لكن مفيش أم فينا تنكر فكرة إنا مهما زعلنا من ولادنا ومهما علقنا علي تصرفاتهم وحاولنا نعدلها، فهو في حاجة في قلبنا كدة مش بتستحمل كلمة عليهم ولا تعديل من حد تاني، صح بقي ولا غلط فدي مشاعر مفيش حكم عليها، لكن الحكم في الآخر على تصرفاتنا ناحية المشاعر دي، هادعم ابني وأقويه في الغلط لحد ما يتدلع ولا هادعم ابني برضه وأدي له حب غير مشروط وأشجعه يصلح من غير ما أقويه في الغلط؟
في الآخر، خلينا متفقين إن الإعلان نقل لينا صورة حقيقية عن مشاعرنا كأمهات وترجم المثل اللي بيقول “أدعي على ابني وأكره اللي يقول آمين”، عشان الأمومة دي أغرب وأقوى مشاعر ممكن أي واحدة فينا تحسها، ميكس غريب مالوش تفسير، الأمومة حب بيوجع القلب من كتر قوته وحلاوته.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك