ارتفاع ضغط الدم واحدة من الحالات الشائعة جدًا في الفترة دي، وعلى الرغم من كده، فهي لها خطورة شديدة لو تم إهمالها أو تجاهلها، والخطورة مش بتقتصر على الأم بس ولكن على الجنين كمان، بمجرد ظهور حالة ارتفاع ضغط دم عليكي خلال الحمل، يبقى تعرفي إنك محتاجة مراقبة طبية مستمرة طول فترة الحمل.
أنواع ارتفاع ضغط الدم في الحمل
ارتفاع ضغط الدم خلال فترة الحمل في حد ذاته أنواع، يعني له عدة أسباب وأنواع، وبالتالي طرق التعامل معاه بتختلف. علشان كده، تعالي نقول لك إيه هي أنواع ارتفاع ضغط الدم في الحمل.
-
ضغط الدم المزمن
ودي حالة بتحصل لما الأم نفسها تصاب مرض ضغط الدم قبل الحمل بحوالي 20 أسبوع، بس بيكون صعب تحديد الحالة دي، لإن مرض ضغط الدم في بدايته بيكون من غير أعراض.
-
ضغط الدم الحملي
حالة بتصاب بيها بعض السيدات بعد الأسبوع الـ20 من الحمل. في الحالة دي، لما الأم بتقوم بتحاليل، بيظهر إن ما فيش أي زيادة للبروتينات في البول أو أي علامات تانية بتقول إن فيه تلف بيحصل لأعضاء الجسم الداخلية. لكن مع الأسف، الإهمال في الحالة دي بيسبب إصابة الأم بحالة طبية اسمها مقدمات ارتعاج.
-
ضغط دم مزمن مع مقدمات ارتعاج:
الحالة دي بتحصل للسيدات اللي عندهم فعلًا مرض ضغط الدم المزمن وبيتعالجوا منه وحصل لهم فجأة ارتفاع في بروتينات البول.
-
مقدمات ارتعاج:
هي حالة طبية قد تصيب السيدة الحامل في حالة ظهور ضغط الدم المرتفع عليها بعد الأسبوع الـ20 من الحمل، وبتكون الحالة دي مصحوبة دايمًا بظهور علامات تلف على أعضاء الجسم زي الكلى أو الكبد أو الدم أو الدماغ، وعدم التدخل السريع في علاج الحالة دي قد يسبب خطورة مميتة على الأم والجنين. ده غير طبعًا الإصابة بنوبات ارتعاج.
في الماضي، كان مش بيتم تشخيص حالات مقدمات الارتعاج، طالما ما ظهرش بروتينات في البول، بس مع التقدم الحالي في عالم الطب، الأطباء بيحطوا احتمال الإصابة بالحالة دي بمجرد ظهور ضغط الدم العالي على الأم.
ليه ارتفاع ضغط الدم في الحمل خطر؟
خطورة ارتفاع ضغط الدم خلال الحمل إنها ممكن تسبب حالات مرضية ممكن توصل إنها مميتة للأم والجنين. علشان كده، الأطباء مش بيتهاونوا أبدًا في الحالة دي، فارتفاع ضغط الدم ممكن يسبب الآتي:
- قلة نمو الجنين:
من الحالات اللي ممكن تصيب الجنين، في حالة ارتفاع ضغط دم الأم، هو تأثر نموه في الرحم انخفاض في معدل نموه أو تباطؤ في نموه.
- انخفاض تدفق الدم إلى المشيمة:
لما بيحصل انخفاض في تدفق الدم في المشيمة بيحصل نقص في إمداد الجنين بالأكسجين والغذاء وده في حد ذاته خطر جدا على معدل نموه الطبيعي في الرحم، وانخفاض وزنه، وممكن توصل للولادة المبكرة اللي في حد ذاتها خطر على حياة الجنين، لإنه بيتولد غير مكتمل نمو الأعضاء، واللي ممكن يسبب له مشاكل في التنفس وبالتالي تعرض حياته للخطر.
- انفصال المشيمة:
دي حالة مصحوبة بارتفاع ضغط الدم، واللي بيحصل إن المشيمة بتنفصل عن جدار الرحم واللي بتسبب نزيف حاد للأم واللي بيشكل خطوة على حياتها وحياة الجنين.
- الولادة المبكرة:
في بعض الحالات لما يظهر للأطباء إن ارتفاع ضغط الدم بيشكل خطورة على الأم والجنين، بيضطر الطبيب لأخذ خطوة الولادة المبكرة لإنقاذهم.
- ضرر لأعضاء الجسم:
ارتفاع ضغط الدم في الحمل وعدم الاهتمام بعلاجه ممكن يسبب تلف لأعضاء الأم الداخلية زي القلب والكلى والكبد، والأمر ممكن يوصل لوضع مميت للأم.
- أمراض القلب والأوعية الدموية:
الأم اللي بتصاب باتفاع ضغط الدم اللي بيوصلها لمرحلة ما قبل تسمم الحمل، لازم تكون على دراية إن فرصة إصابتها بأمراض القلب والأوعية الدموية عالية، ولازم تهتم بالحالة دي لإن العلاج المبكر بيقلل من الإصابة بتلف الأعضاء.
تعرفي إزاي إنك مصابة بارتفاع ضغط الدم في الحمل؟
بمجرد حدوث حمل، فمتابعتك لقياس ضغط دمك بشكل دوري موضوع أساسي لازم ما تكسليش عنه حتى لو انتي حاسة إنك في حالة صحية جيدة، ارتفاع ضغط الدم في البداية بيكون غير مصحوب بأعراض، هنقول لك لو الأرقام دي ظهرت لك هيبقى معناها إيه:
ارتفاع بسيط/طفيف لضغط الدم:
لما يكون ضغط الدم ما بين 120/129 على 80 ده بيعتبر ارتفاع ضغط دم بسيط، لكنه بيعبر إن الحالة ممكن تتفاقم لو تم إهمالها.
مرحلة أولى من ارتفاع ضغط الدم:
دي المرحلة اللي قراية الضغط بتكون ما بين 130/139 على 80/89.
مرحلة تانية من ارتفاع ضغط الدم:
دي المرحلة الخطر بجد اللي قياس ضغط الدم بيسجل 140 وأكتر على 90 وأكتر.
عمومًا تسجيل القراية العالية دي بعد الأسبوع الـ20 من الحمل بفاصل زمني مش بيزيد عن 4 ساعات بيتم تشخيصه كارتفاع ضغط دم حملي.
مدى أمان العلاج الدوائي
صحيح أغلب الأدوية بتكتب تحذير إنها غير آمنة على الحوامل، بس لو ظهرت عليكي حالة ارتفاع ضغط الدم، أو حتى كنتي مريضة ضغط، الطبيب هيوصف لك دواء مهم جدًا الانتظام عليه وبجرعات معينة. التزامك بيها بيحفظك انتي والجنين من الخطر، وممنوع تمامًا إنك تفكري تغيري من الجرعة أو تقللي منها من تلقاء نفسك، لازم الطبيب المختص هو اللي ينصح بكده.
اعرفي عن تورم القدمين أثناء الحمل هنا
نصائح أخيرة:
مهم تعرفي إن التوتر الزيادة أو التجاهل الزيادة في الحالتين الموضوع خطر عليكي وعلى الجنين. ومهم جدًا تحطي في اعتبارك إن حياتك مهمة زي بالضبط حياة الجنين، وإن الإصابة بارتفاع ضغط الدم في الحمل مش ذنب إلا لو كنتي بتتبعي أسلوب حياة غير صحي، وبالتالي لازم تتوقفي فورًا عن ممارسته، ودي شوية نصائح مهمة جدًا ليكي:
اعرفي هنا ممنوعات الحمل والحاجات اللي ما تعمليهاش في فترة الحمل
1. اشربي مياه كتير جدًا. طول ما انتي بتشربي، جسمك هيفضل مترطب وقدرته على التخلص من السموم أكتر، وبالتالي انخفاض لضغط الدم.
2. كلي فواكه وخضروات، لإن العناصر الغذائية الصحية فيهم كفيلة إنها تمدك بالطاقة، وبتساعد جسمك على إنه يتكيف مع الحمل بأقل الأضرار.
3. مارسي نشاط رياضي زي المشي أو حتى الرياضة الخفيفة المسموح بيها للحوامل طبعًا بعد استشارة طبيبك، لأن حالتك ممكن ما تسمحش بممارسة الرياضة.
أشهر 10 مشاكل شائعة خلال فترة الحمل
4. نامي كويس، النوم بيعتبر وسيلة تعافي لجسمك. كل ما تنامي بشكل كافي وبوضع مريح، كل ما ساعد على خفض ضغط دمك.
5. انتظمي على المكملات الغذائية اللي وصفها لك الطبيب.
6. ابعدي عن التوتر والأخبار السيئة على قد ما تقدري.
حامل وزهقانة: 10 طرق تسلية ليكي أثناء الحمل
فترة الحمل مش سهلة، تكون مخلوق كامل جواكي عملية مش سهلة أبدًا، بس اهتمامك بصحتك في الفترة دي هتخلي العملية دي تمر بأقل الخساير، انتي أهم عنصر في معادلة سعادة بيتك، ما تنسيش نفسك أبدًا.
المصادر:
webteb.com
mayoclinic.org
التعليق باستخدام حساب فيس بوك