عيد شم النسيم من أكتر الأعياد اللي بنحبها خلال السنة وعلى الرغم إنه دايمًا بييجي في نص الأسبوع لأنه دايمًا بييجي يوم الإتنين. السنة دي تاريخ عيد شم النسيم 2020 هو 20 أبريل. كلنا بنحب أكلة الفسيخ والرنجة، حتى لو ظهرت وسطنا مجموعة متمردة مش بتحبهم، ده مش هيخلينا نتأثر أو نمتنع عن الأكلة دي. بس كل واحدة فينا بتعاني في الأكلة دي من حاجتين: ريحة الإيدين، وريحة البيت بعدها. بخصوص الإيدين هيكون ليها مقال منفصل. بس تعالي نتكلم عن ازاي نحل مشكلة الأكلة دي بخصوص ريحتها خصوصًا لو اتاكلت في البيت مش في مكان مفتوح، لإنك بتحسي إن كل ركن في البيت بقى طبق فسيخ ورنجة. علشان كده، هاقول لك على شوية حلول سهلة وهتفرق معاكي كتير.
لو عايزة تعرفي نصائح قبل ما تشتري الفسيخ والرنجة، دوسي هنا.
أول الخطوات هي إنك تتخلصي من كل بواقي الأكلة دي وتخرجي كيس القمامة بره البيت. تفتحي كل الشبابيك والبلكونات في كل غرف البيت. تشغّلي مراوح في الشقة كلها، وتغسلي أطباق الأكل كلها مباشرة بعد الانتهاء من الأكل. ولو فضل حاجة من الفسيخ والرنجة يتشالوا في علب محكمة الغلق في التلاجة.
دوسي هنا عشان تعرفي طريقة عمل سلطة الرنجة بالطحينة
طرق تخلصك من الروايح الكريهة في البيت
- الليمون/القرنفل: طريقة سهلة جدًا، هتجيبي حلة وتمليها مياه وتقطّعي فيها شرائح ليمون أو قرون القرنفل. هتسيبيها تغلي من 10 دقايق لـ30 دقيقة. هتلاقي الريحة انتشرت في البيت كله والوضع رجع لطبيعته.
- اخبزي: كيكة مثلًا أو تارت أو أي نوع مخبوزات بتحبيه وشاطرة فيه. اللي هيحصل إن ريحة الخبيز المنعشة الدافية هتقدر تغطي بمكوناتها من فانيليا أو قرفة أو ليمون أو برتقال هتقدر تغطي على أي ريحة مش محببة في بيتك.
- الشمع: الشمع المعطر منتشر تقريبًا في كل مكان وبكل الروائح والأحجام، بس انتبهي إنها تكون بعيدة عن وصول الأطفال ليها وبعيدة عن أي نسيج قابل للاشتعال.
- الخل: اغلي شوية خل، هاتي حلة فيها كوباية مياه مع كوبايتين خل وسيبيهم يغلوا لمدة نص ساعة. هتلاقي ريحة الفسيخ والرنجة اختفوا من البيت.
- القهوة: لو كنتي من النوع كييف القهوة، ففكرة إنك تطحني بعض حبوبها وتعملي قهوتك المفضلة تسيبيها تغلي على نار هادية. فمن نتايجه انتشار ريحة القهوة المنعشة في البيت والقضاء على أي ريحة انتي مش عايزاها.
الخمس طرق دول من أسهل الطرق اللي أكيد هتلاقي واحدة أو اتنين منها في البيت عندك وتقدري تستخدميها بكل سهولة. شم النسيم 2020 جاي في فترة صعبة علينا كلنا، بس احنا اتعودنا إننا نقاوم الصعوبات والزعل بالتجمع والفرحة. ما تخليش أي حاجة تحرمك من الانبساط مع أسرتك وكل سنة وانتي طيبة.
التعليق باستخدام حساب فيس بوك