الطفل في شهوره الأولى بيحتاج للشعور بالدفا زي ما كان في الرحم، ومع زيادة برودة الشتاء، كل أم هتقلق وتسأل نفسها: ازاي أعرف إن طفلي الرضيع بردان؟ وهل الأغطية بتوفر له الدفا اللي محتاجه؟ تدفئة الرضيع وقت النوم تحديدًا بتؤرق الأمهات جدًا، ده لأن الرضيع ما بيقدرش يعبر عن اللي حاسس به زي الكبار، وتأثير البرودة على جسمه الضعيف ممكن يسبب له الأمراض. عشان كده، هنقول لك ازاي تعرفي إن الرضيع يشعر بالبرد، وجمعنا لك نصايح تتبعيها لضمان الدفا لطفلك في الشتاء.
ازاي أعرف إن طفلي بردان؟
فيه طريقة سهلة وكويسة جدًا لمعرفة لو كان الطفل الرضيع بيحس بالبرد أو الحر، وهي إنك تلمسي بإيدك (اللي مش باردة) صدر الطفل أو بطنه أو الجزء الخلفي من رقبته. لو كان حاسس بالبرد، المناطق دي بتكون باردة، أما لو كان حاسس بالحر فهتكون سخنة، ولو كانت المناطق دي معتدلة الحرارة، فده معناه أن الطفل بخير.
برودة الإيدين مش من علامات شعور الرضيع بالبرد، لإن بعض الأطفال والكبار إيديهم بتكون باردة في كل الفصول. لكن ارتعاش الطفل دليل أكيد على شعوره بالبرد، فلو شوفتي طفلك ييرتعش، لازم تدخليه فورًا في مكان دافي، واحرصي إنه يكون لابس ملابس تقيلة ومتغطي.
نصائح لضمان تدفئة الرضيع في الشتاء
- تدفئة الرضيع وقت النوم
- مراعاة درجة حرارة الغرفة
- طعام الرضيع بالليل
- تغيير الحفاض في الشتاء
- ملابس الرضيع في الشتاء
1. تدفئة الرضيع وقت النوم
اعرفي إن كل ما طفلك يحس بالدفا، ده بيخليه ينام أسرع وأفضل، ووجودك هو مصدر الدفا والامان الأساسي لطفلك. علشان كده، حاولي تكوني موجودة جنب طفلك دايمًا. وخصوصًا عند بداية دخوله في النوم. ولما تيجي تقومي من جنبه، حطي قطعة من ملابسك جنبه علشان يشم فيها ريحتك، فيكمل نومه من غير قلق. ولو حس بالقلق يرجع ينام تاني بسرعة.
2. درجة حرارة الغرفة في الشتاء
وفري لطفلك غرفة بتتميز بدرجة حرارة مناسبة. والأفضل إنها تكون أوضة صغيرة عشان تكون أدفى من الأوض الواسعة، وبلاش تخرجيه من الأوضة لأوضة تانية فجأة ومختلفة في درجة الحرارة عن الأوضة اللي كان فيها. لازم تغيري هدومه قبل ما تخرجيه بحيث تكون أثقل. وحاجة كمان، اتأكدي من تدفئة غرفة طفلك والهواء المحيط بيها قبل النوم. لإنه الطفل لازم يتنفس هوا دافي، واظبطي درجة حرارة الأوضة بحيث تكون 22 لـ 24 درجة مئوية. اتأكدي إن كل الشبابيك مقفولة كويس علشان ما يتسربش الهواء البارد للبيت. افرشي سجاجيد تقيلة في الأوضة عشان برودة الأرض ما تطلعش في الأوضة رغم تدفئتها.
3. طعام الرضع بالليل
لازم تعرفي إن التمثيل الغذائي (أو الحرق يعني) بيقل عند النوم. علشان كده، بتكون درجة حرارة الجسم أقل وقت النوم، عشان كده، احرصي على تقديم رضعة كافية ومشبعة لطفلك قبل النوم علشان تحسسه بالدفا، وغطيه كويس، الغطا ما بيمنعش عنه التنفس.
4. تغيير الحفاض قبل النوم
لازم تغيري حفاض طفلك قبل النوم وتتأكدي إنه نظيف ومش مبلول، لإنه لو حصل تسريب، طفلك هيحس بالرطوبة والبرد. وده ممكن يصيبه بالالتهابات الجلدية، واللي بدورها بتخليه يتضايق ويعيط كتير. علشان كده، لما تيجي تغيري له، اعملي ده بسرعة علشان الطفل ما يحسش بالبرد.
ملابس الطفل في الشتاء؟
توصي أكاديمية طب الأطفال إن الطفل يلبس ملابس نوم مكونة من قطعة واحدة علشان سهولة الحركة، لإن كتر الملابس والطبقات ممكن تسبب تعرق الطفل ومع أي نسمة هوا، ممكن ييجي له برد. اختاري الملابس المصنوعة من القطن والخامات الطبيعية الرقيقة، وتجنبي الأقمشة السميكة علشان الطفل يقدر يحرك إيديه ورجليه. وعلشان تدفيه، لبسيه شراب شتوي للحفاظ على دفء قدميه والقفازات للحفاظ على دفء إيديه، الأطراف هي المناطق الأكثر عرضة للإحساس بالبرد.
غطي راسه وهو نايم باستخدام آيس كاب قطن، ويفضل إنك تستخدمي بطانية واحدة لتغطية الطفل والحفاظ على دفاه بشرط إنك تثبتي أطراف البطانية تحت مرتبة السرير علشان تضمني إنه يفضل متغطي لما يتحرك وهو نايم. ولازم يفضل وشه مكشوف علشان ما يتعرضش للاختناق.
وفي الآخر، لو لاقيتي إن طفلك مش بينام كويس بعد ما هيئتي له كل سبل النوم، فده ممكن معناه إحساسه بالبرد الداخلي. شوفي مناخيره وإيده وخده. لو كانوا باردين أو لونهم أحمر، يبقى طفلك عنده لسعة برد. وعلشان كده، اتأكدي من تدفئة المحيط اللي حواليه وزودي له قطعة ملابس واحضنيه. تدفئة الرضع وقت النوم في فصل الشتاء مهمة جدًا، فمعظم الرضع اللي بتيجي لهم نزلات البرد والإنفلونزا بيكون السبب الرئيسي إنهم مش دافيانين كفاية في وقت الليل.
التعليق باستخدام حساب فيس بوك