محتويات المقال
كلنا بنحلم نشوف ولادنا متميزين وموهوبين وبيعملوا حاجة بيحبوها ويبدعوا فيها، عشان كده، لازم نشجع مواهبهم وقدراتهم اللي بتميزهم من صغرهم.
لكن المشكلة إن أوقات لا هما ولا احنا بنبقى عارفين إيه اللي بيميزهم وممكن يتفوقوا فيه! وده نتيجة حاجات كتير منها إنهم بيزهقوا بسرعة من أي حاجة بيجربوها أو إننا أصلًا ما سمحناش ليهم يكتشفوا نفسهم وسهلا لهم الطريق لتنمية مهاراتهم. في المقال ده، هقول لك على خمس حاجات تساعدك تتكشفي ابنك\بنتك موهوبين في إيه وقدراتهم ممكن تخليهم يتفوقوا وينوروا فين.
نسيب لهم مساحة يكتشفوا بعيد عن توقعاتنا:
أول حاجة نقدر نعملها عشان نساعد ولادنا يكتشفوا نفسهم هي إننا نتحرر من صورة النجاح المزيفة اللي فرضها علينا المجتمع والصورة المثالية اللي مرسومة للطفل الجميل الناجح، ما نقارنش بين ولادنا وبين ولاد غيرنا، مش لازم طفلي يكون بيلعب رياضة معينة عشان كل الولاد بيلعبوها أو عشان أنا كنت بطل فيها زمان، مش لازم يكون بيلعب مزيكا عشان كل ولاد أصحابنا بيعملوا كده، مش لازم ابني يدخل بطولة الجمباز وبنتي تلعب باليه عشان الناس ما تقولش علينا حاجة!
اسمحوا لهم يجربوا ويكتشفوا نفسهم من غير أحكام وأحلام بتاعتنا وبتاعة العالم حوالينا مفروض عليهم هما يحققوها.
نديهم اختيارات مختلفة ونشجعهم يجربوا نفسهم:
بس في نفس الوقت اللي بتقدموا فيه لولادكم تجارب كتير تساعدهم يلاقوا نفسهم ويكتشفوا موهبتهم، لازم ياخدوا وقتهم في كل حاجة بيعملوها ويكملوها للأخر، يعني في رحلة التجارب واكتشاف النفس دي، لازم نبقي عارفين إمتى نطاوع ولادنا لما يقرروا يسيبوا الرياضة اللي بيلعبوها بقى لهم سنين وكانوا متميزين فيها وحابين يكملوا فيها وإمتى لأ، وهل هما قرروا يغيروا النشاط أو الرياضة اللي كانوا مستمتعين بيها عشان هما فعلًا تعبوا ومش لاقيين نفسهم فيها ومش موهوبين ولا قرروا يوقفوه عشان هم رغم موهبتهم وتفوقهم، حسوا إن الموضوع بقى فيه التزام ومجهود أكبر وهم مكسلين يكملوا، في الحالة التانية دي، ممكن نعمل pause فترة ونسيب لهم وقت يرتاحوا فيه وبعدين ياخدوا فرصتهم يرجعوا ينموا موهبتهم ده تاني.
لكن في الحالة الأولى لو الطفل فعلًا رافض تمامًا نوع الرياضة أو أي نشاط هو بيعمله، ما تضغطيش عليه وسيبي له فرصة يجرب حاجة مختلفة حتى لو انتي شايفاه موهوب، مفيش موهبة بتكمل من غير حب وشغف للي بيتعمل.
راقبي اهتمامات ابنك\بنتك بعيد عن الشاشات:
التليفزيون والألعاب الإلكترونية لها تأثير كبير على المهارات الاجتماعية والمهارات الذهنية عند الأطفال، استخدامها بشكل كبير هيمنع اكتشافهم لمهارات حياتية تانية مهمة، شاركيهم اهتماماتهم واتكلمي معاهم كتير عشان تقدري تكتشفي هما بيميلوا لإيه أكتر وممكن يتفوقوا ويتميزوا في إيه، وشجعي وادعمي أي حاجة لاحظتي إنه بيحبها ومهتم بيها مهما كانت صغيرة أو مش مهمة بالنسبة لك لإنها في المستقبل ممكن تتحول لنجاح كبير.
نشاركهم وقت اللعب الحر ونقلل وقتها من التوجيه:
أوقات لما بنقعد نلعب مع الولاد بنفضل متقمصين دور الكبير اللي عايز كل حاجة مظبوطة، ونفضل بقى نعلّق: “لا اقرا القصة من أولها” \ “لا دي مش بتترسم كده”\ “لوّن جوه الرسمة”\ “العربيات مش بتطير”، وغيرها كتير تعليقات ممكن تخرج عفوية مننا لكن للأسف ده بيقلل من قدرتهم على الابتكار وبيحد من خيالهم.
شجعوا اختلافهم وخرجوا نفسكم واللي بتحلموا بيه بره المعادلة:
بمعني إننا ما نحاولش ندخل ولادنا في سكة عشان إحنا بنحلم بيها وراسمين صورة مثالية لولادنا وهم بيحققوا حلمنا إحنا مش حلمهم هما، ساعات كتير ولادنا بيمشوا في سكة معينة عشان ما يعرفوش غيرها أو عشان يرضوا اللي حواليهم، ولادنا طريقهم مختلف وخبرتهم في الحياة وتكوينهم غيرنا، حتى تحدياتهم ومشاعرهم مختلفة، فمش مطلوب منهم يكملوا حلم مش حلمهم.
نتكلم معاهم كتير و نسمع منهم حاسين بإيه:
ابني زمان كان بيسألني بعد التمرين: “مامي هو أنا كنت شاطر النهارده؟” وقتها حسيت إن فيه حاجة غلط وإنه بيتمرن لهدف ليا مش بتاعه، فبدأت اسأله بعد التمرين أو بعد أي نشاط بيدخله أسئلة زي: “انت حاسس بإيه بعد التمرين النهارده؟”\ ” اتبسطت في الكورس ده ولا حسيت إنك زهقان؟”\ “إيه أكتر وقت حبيته في درس الموسيقى؟” وبدأت أسمع منه وأفهم أكتر هل هو مستمتع ومتحمس فعلًا للي بيعمله ولا تقضية واجب وخلاص؟
في النهاية إ،يماننا بولادنا ودعمنا لهم هو أكتر حاجة هتساعدهم يكتشفوا نفسهم ويجربوا لإن كل الأطفال متميزة بطريقة أو بأخرى، بس كل واحد مختلف ومتميز وقادر يوظف قدراته بطريقته الخاصة.
لو قدرتي تساعدي طفلك يكتشف قدراته و موهبته، شاركينا في التعليقات تحت بالحاجة اللي ساعدتك على كده.
المصادر
التعليق باستخدام حساب فيس بوك