مع رتم الحياة السريع اللي عايشين فيه واللي بالضرورة أثر جدًا على العلاقات بين الناس عامةً وعلى الأزواج خاصةً، معظم الرجالة دلوقتي بتشتغل معظم اليوم وبيرجعوا على النوم. وحتى لو بيرجعوا البيت قبل معاد النوم، بيكونوا عايزين يفصلوا، وفي نفس الوقت، الست بيكون عندها احتياج طبيعي بقى إنها تقعد وتتكلم وترغي مع شريك حياتها. وفي الغالب مش هتلاقيه، لأنه يا مشغول يا عايز يفصل في صمت، وتبتدي تشتكي وتقولي “أعمل إيه في زوجي المشغول عني بالعمل”. في المقال ده، هنقول لك كام نصيحة تعمليهم مع جوزك المشغول على طول عشان تقدروا تقضوا وقت سوا ومع الولاد وهو مشغول عادي.
كيف اتعامل مع زوجي اذا كان مشغول؟
-
مواعيد مسبقة:
الراجل المشغول دايمًا في الشغل وعنده أولوية بيكون راجل عملي جدًا وبيحب الالتزام والمواعيد، فإنتي كمراته ريحي قلبه وعوّديه إنك بتاخدي منه مواعيد زيها زي الشغل يحطها في جدول يومه المشغول، مواعيد بقى بالشهر أو بالأسبوع. المهم إنه يبقى عارف قبلها بفترة بوقت ومعاد ومكان الخروجة أو المشوار وطبعًا ما تنسيش تفكريه بيه بلذاذة كل فترة.
-
قواعد الموبايل:
الموبايل من أكبر الكوارث اللي بتسحب وقتنا وطاقتنا من غير ما نحس. اقعدي مع ولادك واتفقوا على قواعد استخدام الموبايل وإنه يتحط مثلًا في مكان معين طول ما إنتو سوا واكتبوها وعلقوها واشركي جوزك لو موجود. لو مش موجود، بلغيه بالقواعد الجديدة، وطبعًا ما تحسسيهوش إن هو المقصود. وفكريه إنه قدوة للولاد، لازم هو أول واحد يلتزم وما يمسكش الموبايل في الوقت اللي قاعدينه مع بعض.
المدة المناسبة لمشاهدة الشاشات للأطفال حسب السن
-
يوم الأجازة:
غالبًا يوم الأجازة بقى هيبقى محتاج ينام ويرتاح أو ينزل القهوة مع أصحابه، وده حق مشروع عادي جنب حقكم إنكم تقضوا وقت سوا. المهم إنك ما تححسيهوش إنه متراقب وإنك معترضة طول الوقت على تصرفاته. شجعيه يفصل مع أصحابه، وفي نفس الوقت اطلبي منه ولو ساعتين سوا أو مع الولاد. وممكن في وقت روقان تتكلمي معاه إنه يبقى أسبوع له وأسبوع معاكم مثلًا.
-
تكنيك الساندوتش:
تكنيك الساندوتش من الطرق اللطيفة قوي للتعامل بين البشر وكنا اتكلمنا عليه قبل كدة في التربية، لما تيجي تتكلمي مع جوزك وتعبري له عن احتياجاتك وإنك محتاجة وقت أكتر معاه. ابدأي كلامك بكلام إيجابي وعن حبك ليه وعن صفاته المميزة. وبعدين ادخلي بقى في التقيل وفهميه ازاي انشغاله عنكم بيأثر فيكم وفي علاقتكم. وفي الآخر، اقفلي كلامك بآخر طبقة من الساندوتش بطريقة إيجابية تاني. الطريقة ده مش بتخلّي الزوج في وضع دفاع عن النفس وبيتقبل الكلام بطريقة اهدي. وفي الغالب هتوصلوا وقتها لحل وإتفاق يرضيكم إنتو الإتنين.
1 comment
ابي زوجي يكويني