محتويات المقال
فيه خرافات مشهورة عن الستات، وفيه ستات فعلًا مصدقة في الخرافات دي. خرافات زي إن سن الست بيؤثر على جمالها، أو إن جمال الست له مقاييس معينة، أو سن معين بيخلص بعده. بس بما إن سن الأربعين بيخوف بعض الستات، قررنا نقول لك بعض نصائح عن سن الأربعين للمرأة.
نصائح لجمال المرأة في سن الأربعين
- الترطيب.
- الأكل الصحي.
- الرياضة.
- النوم.
- ظبطي دولابك.
- زوري الكوافير أكتر.
- المساج.
- الماسكات.
- الفيتامينات.
- حافظي على العلاقة الحميمة.
يلا بينا نبدأ ..
1. الترطيب
الترطيب هنا مقصود به ترطيب من جوا وبرا الجسم. يعني تشربي ميا كتير، وتستخدمي كريمات مرطبة يوميًا مرتين على الأقل عن طريق كريم نهار وكريم ليل.
2. الأكل الصحي
طبعًا معروف إيه هو الأكل الصحي، بروتين وخضار ونشويات قليلة ودهون أقل. لكن اللي عادةً بننساه في الأكل الصحي هو تقليل الملح والسكر. الملح بيعلّي الصوديوم وده بيحبس الميا في الجسم، وكمان بيعلي خطورة الإصابة بضغط الدم.
3. الرياضة
ممارسة الرياضة هتساعد جسمك يكون مرن وبيساعد بشرتك تكون نضرة ومحتفظة برونقها وشبابها.
4. النوم
طبعًا، كلنا كأمهات عندنا مليون حاجة تسبب الأرق. لكن الأرق من أكبر أعداء البشرة النضرة والمود الحلو والجسم المرتاح. فيه دراسة اتعملت في 2013 في جامعة كليفلاند ربطت بين قلة النوم وبين ظهور علامات الكبر والتجاعيد على البشرة. عشان كده، بننصحك إنك دايمًا تاخدي كفايتك من النوم.
5. ظبطي دولابك
سن الأربعين في عمر أمهاتنا وجداتنا كانوا بيتكسفوا يلبسوا ألوان معينة أو قصات معينة. اوعي تتمسكي بالعادة دي. افتكري دايمًا إن طبعًا راحتك تيجي الأول، لكن كمان الراحة مش معناها تلبسي لبس ما يحسسكيش بجمالك وما يبرزهوش. هاتي هدوم جميلة مقاسك وملونة بألوان مبهجة.
6. زوري الكوافير أكتر
اتجرئي في قصات شعرك أكتر. واهتمي بالباديكير والمانيكير، وجربي الألوان المبهجة في الضوافر، مش كلها nude وfrench. خدي بالك، استثمارك في وقتك في الكوافير هيحسسك إن مودك حلو وإن شكلك حلو وإنك مقبلة على الحياة أكتر، وثقتك في شكلك أكبر.
7. المساج
مش بس الكوافير مهم واستثمارك في وقتك هناك مهم، كمان المساج مهم جدًا، لإنك كل ما استرخيتي، كل ما جسمك هدي وكل ما أعصابك هديت، وكل ما بالتبعية وشك هيكون أهدا والتجاعيد مش هتظهر.
8. الماسكات
الماسكات بتساعد الوش ينفذ اللي انتي عايزاه منه. عايزة بشرة موحدة، ماسك، عايزة تتخلصي من آثار حبوب أو من رؤوس سودا، ماسك، عايزة نضارة، ماسك. هنا وهنا هتلاقي ماسكات مختلفة للبشرة.
9. الفيتامينات
التقدم في العمر بيسبب فقدان بعض العناصر من الجسم أو عدم إنتاجها بشكل كامل زي ما كنتي متعودة. عشان كده، من احتياجات المرأة في سن الأربعين التعويض بالفيتامينات من أوميجا 3، وفيتامين هـ، وغيرها. وطبعًا، قبل ما تاخدي أي فيتامين، لازم ترجعي لدكتورك.
10. حافظي على العلاقة الحميمة
النصيحة دي ممكن تتخيلي إن مالهاش علاقة بالمظهر، لكن الحقيقة إن لها علاقة قوية. د. ديفيد ويكس رئيس قسم علم نفس كبار السن في مستشفى إدنبره الملكي سابقًا بيقول إن ممارسة العلاقة الحميمة بانتظام بتخلي الشخص يبان أصغر من 5 – 7 سنين.
التعليق باستخدام حساب فيس بوك