محتويات المقال
اتكلمت قبل كده عن محاولاتي البائسة والمستميتة إني ءأكل عيالي أي نوع من أنواع الفاكهة والخضار. وعشان أعمل كده، اضطريت إني أدخل لهم الخضار والفاكهة في وسط الأكل من غير ما يحسوا. والمقال ده، هيكون تكملة للوصفات اللي نجحت إني أخليها مغذية وفي نفس الوقت طعمها حلو جدًا.
بان كيك بالشوفان
المقادير
- 1 كوب شوفان مطحون أو دقيق أسمر
- 1 كوب لبن.
- بيضة.
- معلقة صغيرة بيكينج باودر.
- 1 أو 2 معلقة صغيرة سكر بني.
- فانيليا.
طريقة عمل بان كيك بالشوفان
- هتخلطي الدقيق مع السكر والفانيليا والبيكينج باودر وهتضيفي عليهم اللبن والبيض وتضربيهم مع بعض كويس قوي.
- هتدهني طاسة تيفال زبدة وتسخنيها وتجيبي مغرفة وتحطي الخليط فيها لحد ما يشكل دايرة وتسيبيه على كل ناحية لحد ما يستوي.
كيكة البلح
المقادير
- 1 كوب شوفان مطحون.
- كوباية زبادي صغيرة أو ½ كوب لبن رايب.
- بيضة.
- معلقة صغيرة فانيلا.
- معلقة صغيرة خل.
- معلقة صغيرة بيكينج باودر.
- عدد 10 أو 15 قطعة من البلح الرطب أو التمر (ممكن تنقعي التمر في ميه عشان يكون طري)
طريقة عمل كيكة البلح
- هتضربي اللبن أو الزبادي مع البيض والفانيليا والبلح مع بعض كويس أوي وبعدين هتضيفي عليهم الشوفان والبيكينج باودر وتضربيهم مع بعض تاني.
- هتدهني صنية تيفال بشوية سمنة أو زبدة وترشي رشة دقيق عليها عشان الكيك ميلزقش في الصنية وبعدين تحطي الخليط فيها.
- هتدخليها الفرن على درجة حرارة 180 وتسيبيها حوالي 40-45 دقيقة.
ناجتس الفراخ بالخضروات
المقادير
- صدور فراخ مسلوقة.
- جزر مبشور.
- كوسة مبشورة.
- بطاطس مسلوقة مبشورة.
- بيضة
- ربع كوباية أو أقل شوفان مطحون.
- ملح وفلفل.
- بابريكا
- بصل وتوم باودر.
طريقة عمل ناجتس الفراخ بالخضراوات
- هتضربي كل المكونات مع بعض وتشكليهم زي ما تحبي وممكن تقطعيهم بالقطاعات بأشكال مختلفة زي القلب والنجمة.
- هتدهنيها بزيت زيتون وتدخليها على صنية في الفرن لحد ما تمسك نفسها.
ملحوظات مهمة
- لو ابنك أو بنتك عندهم حساسية من مكون معين ممكن تبدليه باللي مناسب ليهم.
- وصفة البان كيك ممكن متحطيش سكر خالص وتدهني البان كيك بالعسل أو العسل الأسود.
- وصة الناجتس ممكن تتاكل قبل السنة كفينجر فوود “Finger Food” بس من غير الملح وممكن تفرمي الفراخ من غير ما تتسلق وتحطي المكونات كلها عادي وتعمليها بالبيض والبقسماط وتقليها أو تحطيها في الاير فراير لو مش حابة تستخدمي لولادك زيت كتير.
What’s your Reaction?
التعليق باستخدام حساب فيس بوك